ਓਟਵਾ, 15 ਜੁਲਾਈ (ਪੋਸਟ ਬਿਊਰੋ) : ਕਿਊਬਿਕ ਸਥਿਤ ਕ੍ਰੈਡਿਟ ਯੂਨੀਅਨ ਡੇਯਾਰਡਿਨਸ ਵਿਖੇ ਕਈ ਮਿਲੀਅਨ ਕੈਨੇਡੀਅਨਾਂ ਦੀ ਨਿਜੀ ਜਾਣਕਾਰੀ ਦੀ ਉਲੰਘਣਾ ਹੋਣ ਦੇ ਸਬੰਧ ਵਿੱਚ ਸੋਮਵਾਰ ਨੂੰ ਓਟਵਾ ਵਿੱਚ ਹਾਊਸ ਆਫ ਕਾਮਨਜ਼ ਦੀ ਪਬਲਿਕ ਸੇਫਟੀ ਐਂਡ ਨੈਸ਼ਨਲ ਸਕਿਊਰਿਟੀ ਕਮੇਟੀ ਵਿੱਚ ਸ਼ਾਮਲ ਐਮਪੀਜ਼ ਵੱਲੋਂ ਹੰਗਾਮੀ ਮੀਟਿੰਗ ਕੀਤੀ ਗਈ।
ਜੂਨ ਵਿੱਚ ਇਸ ਵੱਡੀ ਵਿੱਤੀ ਸੰਸਥਾ ਨੇ ਇਹ ਖੁਲਾਸਾ ਕੀਤਾ ਸੀ ਕਿ ਨੌਕਰੀ ਤੋਂ ਕੱਢੇ ਗਏ ਇੱਕ ਕਰਮਚਾਰੀ ਵੱਲੋਂ ਇਸ ਨਿਜੀ ਜਾਣਕਾਰੀ ਤੱਕ ਪਹਿਲਾਂ ਪਹੁੰਚ ਕੀਤੀ ਗਈ ਤੇ ਫਿਰ 2.7 ਮਿਲੀਅਨ ਕੈਨੇਡੀਅਨਾਂ ਤੇ 173,000 ਕਾਰੋਬਾਰਾਂ ਸਬੰਧੀ ਜਾਣਕਾਰੀ ਨੂੰ ਲੀਕ ਕਰ ਦਿੱਤਾ। ਲੀਕ ਕੀਤੀ ਗਈ ਜਾਣਕਾਰੀ ਵਿੱਚ ਸਬੰਧਤ ਵਿਅਕਤੀਆਂ ਦੇ ਨਾਂ, ਪਤੇ, ਜਨਮ ਤਾਰੀਕ, ਸੋਸ਼ਲ ਇੰਸ਼ੋਰੈਂਸ ਨੰਬਰ, ਈਮੇਲ ਐਡਰੈੱਸ ਤੇ ਡੇਯਾਰਡਿਨਸ ਦੇ ਕਲਾਇੰਟਸ ਦੀਆਂ ਟਰਾਂਜ਼ੈਕਸ਼ਨ ਸਬੰਧੀ ਆਦਤਾਂ ਸ਼ਾਮਲ ਹਨ।
ਵਿਰੋਧੀ ਧਿਰਾਂ ਦੇ ਮੈਂਬਰਾਂ ਦੀ ਸਾਂਝੀ ਬੇਨਤੀ ਉੱਤੇ ਕਾਮਨਜ਼ ਕਮੇਟੀ ਸੋਮਵਾਰ ਨੂੰ ਪਾਰਲੀਆਮੈਂਟ ਹਿੱਲ ਉੱਤੇ ਦੁਪਹਿਰ ਨੂੰ ਮੁਲਾਕਾਤ ਲਈ ਰਾਜ਼ੀ ਹੋਈ ਤੇ ਇਸ ਮੁੱਦੇ ਉੱਤੇ ਵਿਚਾਰ ਵਟਾਂਦਰਾ ਤੇ ਇਸ ਮਾਮਲੇ ਨੂੰ ਸਾਂਭਣ ਦੇ ਹੱਲ ਲੱਭਣ ਬਾਬਤ ਗੱਲਬਾਤ ਸੁ਼ਰੂ ਕੀਤੀ ਗਈ। ਇਹ ਫੈਸਲਾ ਵੀ ਕੀਤਾ ਗਿਆ ਕਿ ਜਿਨ੍ਹਾਂ ਕਲਾਇੰਟਸ ਦੇ ਸੋਸ਼ਲ ਇੰਸ਼ੋਰੈਂਸ ਨੰਬਰ (ਸਿਨ) ਲੀਕ ਹੋਏ ਹਨ ਉਨ੍ਹਾਂ ਨੂੰ ਨਵੇਂ ਨੰਬਰ ਜਾਰੀ ਕੀਤੇ ਜਾਣ। ਜਨਤਕ ਸੁਣਵਾਈ ਸ਼ਾਮ ਤੱਕ ਜਾਰੀ ਰਹਿਣ ਦੀ ਸੰਭਾਵਨਾ ਸੀ।
ਇਸ ਮੀਟਿੰਗ ਦੌਰਾਨ ਐਮਪੀਜ਼ ਨੇ ਵੱਖ ਵੱਖ ਫੈਡਰਲ ਏਜੰਸੀਆਂ ਤੇ ਡਿਪਾਰਟਮੈਂਟਸ ਦੇ ਅਧਿਕਾਰੀਆਂ ਦੇ ਪੱਖ ਸੁਣੇ। ਇਨ੍ਹਾਂ ਵਿੱਚ ਕੈਨੇਡਾ ਰੈਵਨਿਊ ਏਜੰਸੀ ਤੇ ਡੇਯਾਰਡਿਨਸ ਦੇ ਨੁਮਾਇੰਦੇ ਵੀ ਸ਼ਾਮਲ ਸਨ। ਡੇਯਾਰਡਿਨਸ ਦੇ ਸੀਈਓ ਗਾਇ ਕੌਰਮੀਅਰ ਨੇ ਕਮੇਟੀ ਨੂੰ ਦੱਸਿਆ ਕਿ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ ਤੇ ਜੋ ਕੁੱਝ ਵੀ ਇਸ ਕੇਸ ਵਿੱਚ ਹੋਇਆ ਉਸ ਦੀ ਚੀਰਫਾੜ ਜਲਦਬਾਜ਼ੀ ਵਾਲੀ ਗੱਲ ਹੈ। ਪਰ ਉਨ੍ਹਾਂ ਆਸ ਪ੍ਰਗਟਾਈ ਕਿ ਉਨ੍ਹਾਂ ਦੀ ਸੰਸਥਾ ਨਾਲ ਵਾਪਰੀ ਇਸ ਘਟਨਾ ਤੋਂ ਬਾਕੀ ਕੈਨੇਡੀਅਨ ਆਰਗੇਨਾਈਜ਼ੇਸ਼ਨਜ਼ ਸਬਕ ਜ਼ਰੂਰ ਸਿੱਖ ਸਕਦੀਆਂ ਹਨ।
ਕੌਰਮੀਅਰ ਨੇ ਕਮੇਟੀ ਨੂੰ ਦੱਸਿਆ ਕਿ ਇਸ ਲੀਕ ਲਈ ਜਿ਼ੰਮੇਵਾਰ ਕਰਮਚਾਰੀ ਨੇ ਸਾਰੇ ਨਿਯਮਾਂ ਦੀਆਂ ਧੱਜੀਆਂ ਉਡਾ ਦਿੱਤੀਆਂ। ਉਨ੍ਹਾਂ ਦੱਸਿਆ ਕਿ ਜਿਵੇਂ ਹੀ ਉਸ ਦੀ ਇਸ ਹਰਕਤ ਦਾ ਉਨ੍ਹਾਂ ਨੂੰ ਪਤਾ ਲੱਗਿਆ ਤਾਂ ਉਨ੍ਹਾਂ ਦੀ ਕੰਪਨੀ ਨੇ ਫੌਰੀ ਸਖ਼ਤ ਐਕਸ਼ਨ ਲਿਆ। ਉਨ੍ਹਾਂ ਆਖਿਆ ਕਿ ਕ੍ਰੈਡਿਟ ਯੂਨੀਅਨ ਉਹ ਸੱਭ ਕਰ ਚੁੱਕੀ ਹੈ ਤੇ ਕਰ ਰਹੀ ਹੈ ਜੋ ਸਾਨੂੰ ਕਰਨਾ ਚਾਹੀਦਾ ਸੀ। ਉਨ੍ਹਾਂ ਸਲਾਹ ਦਿੱਤੀ ਕਿ ਕਮੇਟੀ ਸਰਕਾਰ ਨੂੰ ਇੱਕ ਐਡਵਾਇਜ਼ਰੀ ਗਰੁੱਪ ਕਾਇਮ ਕਰਨ ਦੀ ਸਿਫਾਰਿਸ਼ ਕਰੇ ਤਾਂ ਕਿ ਡਿਜੀਟਲ ਡਾਟਾ ਤੇ ਪਛਾਣ ਲਈ ਨਵਾਂ ਫਰੇਮਵਰਕ ਕਾਇਮ ਕੀਤਾ ਜਾ ਸਕੇ। ਜਿਹੜੇ ਵੀ ਵਿਅਕਤੀ ਫਾਇਨਾਂਸ਼ੀਅਲ, ਟੈਲੀਕਮਿਊਨੀਕੇਸ਼ਨਜ਼ ਤੇ ਲੀਗਲ ਸੈਕਟਰਜ਼ ਵਿੱਚ ਕੰਮ ਕਰਦੇ ਹਨ ਉੱਥੇ ਅਜਿਹੀ ਸਾਵਧਾਨੀ ਵਰਤਨੀ ਬਹੁਤ ਜ਼ਰੂਰੀ ਹੈ। ਉਨ੍ਹਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਆਖਿਆ ਕਿ ਯਥਾਸਥਿਤੀ ਇਸ ਮਸਲੇ ਦਾ ਕੋਈ ਹੱਲ ਨਹੀਂ ਹੈ। ਸਾਨੂੰ ਅੱਜ ਦੇ ਜ਼ਮਾਨੇ ਵਿੱਚ ਬਹੁਤ ਜਿ਼ਆਦਾ ਸਾਵਧਾਨ ਰਹਿਣ ਦੀ ਲੋੜ ਹੈ।