ਪ੍ਰਯਾਗਰਾਜ, 15 ਜੁਲਾਈ (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਦੇ ਪ੍ਰਯਾਗਰਾਜ ਵਿੱਚ ਇੰਡੀਅਨ ਚਰਚ ਦੇ ਟਰੱਸਟੀਜ਼, ਡਾਇਸਿਸ ਆਫ ਲਖਨਊ ਹੇਠ ਆਉਂਦੀ 100 ਅਰਬ ਰੁਪਏ ਦੀ ਜ਼ਮੀਨ ਵੇਚ ਕੇ ਪੈਸੇ ਦੀ ਵੰਡ ਕਰਨ ਦਾ ਸਨਸਨੀਖੇਜ ਮਾਮਲਾ ਸਾਹਮਣੇ ਆਇਆ ਹੈ। ਦੋਸ਼ ਹੈ ਕਿ ਫਰਜ਼ੀ ਦਸਤਾਵੇਜ਼ ਨਾਲ ਸਿਵਲ ਲਾਈਨਸ ਦੀ ਸੌ ਅਰਬ ਦੀ ਜ਼ਮੀਨ ਦੂਜੇ ਅਦਾਰਿਆਂ ਵਿੱਚ ਫਰਜ਼ੀ ਤਰੀਕੇ ਨਾਲ ਟਰਾਂਸਫਰ ਕਰ ਕੇ ਵੇਚੀ ਗਈ ਹੈ।
ਇਸ ਕੇਸ ਵਿੱਚ ਬਿਸ਼ਪ ਡਾਇਓਸਿਸ ਆਫ ਲਖਨਊ, ਮੈਟਰੋਪਾਲੀਟਨ ਚਰਚ ਆਫ ਇੰਡੀਅਨ ਜਾਨ ਅਗਸਟ੍ਰੀਨ ਨੇ ਸਿਵਲ ਲਾਈਨਸ ਥਾਣੇ ਵਿੱਚ ਕੇਸ ਦਰਜ ਕਰਾਇਆ ਹੈ। ਅਰਬਾਂ ਦੀ ਜਾਇਦਾਦ 'ਚ ਹੇਰ ਫੇਰ ਦੇ ਮਾਮਲੇ ਵਿੱਚ ਬਿਸ਼ਪ ਸਮੇਤ 16 ਵੱਡੇ ਅਧਿਕਾਰੀਆਂ ਨੂੰ ਨਾਮਜ਼ਦ ਕੀਤਾ ਗਿਆ ਹੈ। ਇਨ੍ਹਾਂ ਅਦਾਰਿਆਂ ਦੀਆਂ ਜਾਇਦਾਦਾਂ ਬਾਰੇ ਪਹਿਲਾਂ ਵੀ ਕੇਸ ਦਰਜ ਹੁੰਦੇ ਰਹੇ ਹਨ। ਇਸ ਵਾਰ ਰਾਜਾਜੀਪੁਰਮ, ਲਖਨਊ ਦੇ ਵਸਨੀਕ ਬਿਸ਼ਪ ਜਾਨ ਅਗਸਟ੍ਰੀਨ ਨੇ ਸਿਵਲ ਲਾਈਨਸ ਥਾਣੇ 'ਚ ਜਿਹੜਾ ਕੇਸ ਦਰਜ ਕਰਵਾਇਆ ਹੈ, ਉਸ ਵਿੱਚ ਕਈ ਬੇਪਛਾਣ ਦੋਸ਼ੀ ਵੀ ਹਨ। ਸਾਰਿਆਂ ਉਤੇ ਦੋਸ਼ ਹੈ ਕਿ ਫਰਜ਼ੀ ਸੁਸਾਇਟੀ, ਐਸੋਸੀਏਸ਼ਨ ਬਣਾ ਕੇ ਫਰਜ਼ੀ ਦਸਤਾਵੇਜ਼ਾਂ ਜ਼ਰੀਏ ਡਾਇਸਸ ਆਫ ਲਖਨਊ ਦੀ ਪ੍ਰਯਾਗਰਾਜ ਸਥਿਤ 25 ਮਹਾਤਮਾ ਗਾਂਧੀ ਮਾਰਗ, ਸਿਵਲ ਲਾਈਨਸ ਦੀ ਅਰਬਾਂ ਦੀ ਜਾਇਦਾਦ ਦੀ ਬਾਂਦਰ ਵੰਡ ਕੀਤੀ।
ਕੇਸ ਦਰਜ ਕਰਵਾਉਣ ਵਾਲੇ ਬਿਸ਼ਪ ਜਾਨ ਅਗਸਟ੍ਰੀਨ ਨੇ ਇਸ ਬਾਰੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ, ਡੀ ਜੀ ਪੀ, ਓ ਪੀ ਸਿੰਘ ਨਾਲ ਮੁਲਾਕਾਤ ਕਰ ਕੇ ਦਸਤਾਵੇਜ਼ ਸੌਂਪੇ। ਜਾਂਚ ਤੋਂ ਬਾਅਦ ਸਿਵਲ ਲਾਈਨਸ ਥਾਣੇ 'ਚ ਗੰਭੀਰ ਧਾਰਾਵਾਂ 'ਚ ਕੇਸ ਦਰਜ ਹੋਇਆ। ਜਾਨ ਆਗਸਟ੍ਰੀਨ ਦਾ ਕਹਿਣਾ ਹੈ ਕਿ ਸੌ ਅਰਬ ਦੀ ਜ਼ਮੀਨ ਤਾਂ ਸਿਰਫ ਪ੍ਰਯਾਗਰਾਜ ਵਿੱਚ ਵੇਚੀ ਗਈ ਹੈ। ਦੇਸ਼ ਭਰ 'ਚ ਅਰਬਾਂ ਦੀ ਜਾਇਦਾਦ ਹੜੱਪੀ ਗਈ ਹੈ। ਉਨ੍ਹਾਂ ਦਾ ਦੋਸ਼ ਹੈ ਕਿ ਫਰਜ਼ੀ ਸੁਸਾਇਟੀ, ਟਰੱਸਟ ਬਣਾ ਕੇ ਇਹ ਦੇਸ਼ ਦਾ ਸਭ ਤੋਂ ਵੱਡਾ ਘੁਟਾਲਾ ਹੈ।