ਸੋਲਨ, 15 ਜੁਲਾਈ (ਪੋਸਟ ਬਿਊਰੋ)- ਹਿਮਾਚਲ ਦੇ ਸੋਲਨ ਨੇੜੇ ਕੁਮਾਰਹੱਟੀ ਵਿਖੇ ਕੱਲ੍ਹ ਬਾਅਦ ਦੁਪਹਿਰ ਇੱਕ ਚਾਰ ਮੰਜ਼ਿਲਾ ਹੋਟਲ ਅਚਾਨਕ ਢਹਿ ਗਿਆ, ਜਿਸ ਕਾਰਨ ਦੋ ਵਿਅਕਤੀਆਂ ਦੀ ਮੌਤ ਹੋ ਗਈ। ਘਟਨਾ ਵਾਪਰਨ ਸਮੇਂ ਹੋਟਲ ਵਿੱਚ ਮੌਜੂਦ 50 ਵਿਅਕਤੀਆਂ ਤੋਂ ਕਈ ਮਲਬੇ ਹੇਠ ਦੱਬੇ ਗਏ।
ਮਿਲੀਆਂ ਖਬਰਾਂ ਮੁਤਾਬਕ ਜਿਸ ਸਮੇਂ ਇਹ ਹੋਟਲ ਡਿੱਗਾ, ਉਸ ਵਿੱਚ 50 ਤੋਂ ਵੱਧ ਵਿਅਕਤੀ ਭੋਜਨ ਕਰਨ ਲਈ ਮੌਜੂਦ ਸਨ। ਇਨ੍ਹਾਂ ਵਿੱਚ ਫੌਜ ਦੇ 30 ਜਵਾਨ ਸ਼ਾਮਲ ਸਨ। ਸ਼ਾਮ ਤੱਕ 21 ਜਵਾਨਾਂ ਨੂੰ ਜ਼ਖਮੀ ਹਾਲਤ ਵਿੱਚ ਕੱਢਿਆ ਜਾ ਚੁੱਕਾ ਸੀ, ਪਰ ਬਾਕੀ 13 ਜਵਾਨ ਮਲਬੇ ਹੇਠ ਦੱਬੇ ਹੋਏ ਸਨ। ਬਚਾਏ ਗਏ ਜਵਾਨਾਂ ਵਿੱਚੋਂ ਦੋ ਦੀ ਹਾਲਤ ਗੰਭੀਰ ਦੱਸੀ ਜਾਂਦੀ ਹੈ। ਅੱਠ ਹੋਰਨਾਂ ਵਿਅਕਤੀਆਂ ਨੂੰ ਵੀ ਬਚਾਅ ਲਿਆ ਗਿਆ। ਹਿਮਾਚਲ ਪ੍ਰਦੇਸ਼ ਵਿੱਚ ਕਿਸੇ ਹੋਟਲ ਦੇ ਇਸ ਤਰ੍ਹਾਂ ਡਿੱਗਣ ਦੀ ਇਹ ਆਪਣੀ ਕਿਸਮ ਦੀ ਪਹਿਲੀ ਘਟਨਾ ਹੈ। ਰਾਤ ਤੱਕ ਇਹ ਪਤਾ ਨਹੀਂ ਲੱਗ ਸਕਿਆ ਸੀ ਕਿ ਹੋਟਲ ਕਿਵੇਂ ਅਚਾਨਕ ਢਹਿ ਢੇਰੀ ਹੋ ਗਿਆ। ਇਸ ਤਿੰਨ ਮੰਜ਼ਿਲਾ ਹੋਟਲ ਦੇ ਹੇਠਾਂ ਇੱਕ ਢਾਬਾ ਸੀ, ਜਦ ਕਿ ਉਪਰਲੀਆਂ ਮੰਜ਼ਿਲਾਂ 'ਤੇ ਲੋਕਾਂ ਦੇ ਰਹਿਣ ਲਈ ਪ੍ਰਬੰਧ ਸੀ। ਉਕਤ ਹੋਟਲ ਦੀ ਇਮਾਰਤ ਸੜਕ ਦੇ ਬਿਲਕੁਲ ਨਾਲ ਸੀ ਅਤੇ ਪਿਛਲੇ ਪਾਸੇ ਢਲਾਣ ਸੀ। ਫੌਜ ਦੇ ਸੂਤਰਾਂ ਮਤਾਬਕ ਜਿਹੜੇ ਜਵਾਨ ਮਲਬੇ ਹੇਠ ਦੱਬੇ ਗਏ, ਉਹ ਡਗਸ਼ਾਈ ਛਾਉਣੀ ਨਾਲ ਸੰਬੰਧਤ ਹਨ।