ਪਾਤੜਾਂ, 15 ਜੁਲਾਈ (ਪੋਸਟ ਬਿਊਰੋ)- ਪੰਜਾਬ ਦੇ ਡਾਇਰੈਕਟੋਰੇਟ ਆਫ ਆਯੁਰਵੈਦ ਤੇ ਸਟੇਟ ਡਰੱਗ ਲਾਇਸੈਂਸਿੰਗ ਅਥਾਰਟੀ ਵੱਲੋਂ ਵੱਖ-ਵੱਖ ਜ਼ਿਲ੍ਹਿਆਂ ਨੂੰ ਜਾਰੀ ਕੀਤੇ ਜਾਂਦੇ ਅਫੀਮ ਦੇ ਕੋਟੇ ਵਿੱਚੋਂ ਸਭ ਤੋਂ ਵੱਧ ਅਫੀਮ ਦਾ 365 ਕਿਲੋ ਅੰਮ੍ਰਿਤਸਰ ਨੂੰ ਮਿਲਿਆ ਹੈ। ਜਲੰਧਰ ਨੂੰ 10 ਕਿਲੋ ਅਫੀਮ ਮਿਲੀ ਗਈ ਹੈ ਤੇ ਬਾਕੀ ਦੇ ਕਿਸੇ ਜ਼ਿਲ੍ਹੇ ਨੂੰ ਅਫੀਮ ਦਾ ਕੋਟਾ ਨਹੀਂ ਦਿੱਤਾ ਗਿਆ। ਵਿਭਾਗ ਵੱਲੋਂ ਸਾਲ 2011 ਤੋਂ ਇਹ ਅਫੀਮ ਦਾ ਕੋਟਾ ਸਮੁੱਚੇ ਰਾਜ 'ਚ ਦੇਣਾ ਬੰਦ ਕਰ ਦਿੱਤਾ ਗਿਆ ਸੀ, ਪਰ ਸਰਹੱਦੀ ਇਲਾਕੇ ਵਿੱਚ ਅਫੀਮ ਦਾ ਕੋਟਾ ਜਾਰੀ ਕਰਨਾ ਸ਼ੱਕ ਦੇ ਘੇਰੇ ਵਿੱਚ ਆਉਂਦਾ ਹੈ।
ਆਰ ਟੀ ਆਈ ਵਰਕਰ ਅਤੇ ਲੋਕ ਜਾਗ੍ਰਿਤੀ ਮੰਚ ਦੇ ਸੂਬਾ ਪ੍ਰਧਾਨ ਬ੍ਰਿਜ ਭਾਨ ਬੁਜਰਕ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਬੋਰਡ ਆਫ ਆਯੁਰਵੈਦਿਕ ਅਤੇ ਯੂਨਾਨੀ ਸਿਸਟਮ ਮੁਹਾਲੀ ਤੋਲੋਂ ਸੂਚਨਾ ਅਧਿਕਾਰ ਐਕਟ 2005 ਤਹਿਤ ਜਨਵਰੀ 2008 ਤੋਂ ਲੈ ਕੇ 31 ਦਸੰਬਰ 2018 ਤੱਕ ਖਰੀਦ ਕੀਤੀ ਗਈ ਅਫੀਮ ਦੀ ਮਾਤਰਾ, ਕੁੱਲ ਕੀਮਤ, ਸਪਲਾਈ ਦੇਣ ਵਾਲੇ ਰਾਜ ਤੇ ਜ਼ਿਲ੍ਹਿਆਂ ਨੂੰ ਜਾਰੀ ਕੀਤੇ ਅਫੀਮ ਦੇ ਕੋਟੇ ਦੀ ਜਾਣਕਾਰੀ ਮੰਗੀ ਗਈ ਸੀ। ਜਵਾਬ ਵਿੱਚ ਪੰਜਾਬ ਦੇ ਡਾਇਰੈਕੋਟੋਰੇਟ ਆਫ ਆਯੁਰਵੈਦ ਤੇ ਸਟੇਟ ਡਰੱਗ ਲਾਇਸੈਂਸਿੰਗ ਅਥਾਰਟੀ ਨੇ ਦੱਸਿਆ ਹੈ ਕਿ ਸਾਲ 2008 ਤੋਂ ਲੈ ਕੇ ਸਾਲ 2011 ਤੱਕ ਅੰਮ੍ਰਿਤਸਰ ਜ਼ਿਲ੍ਹੇ ਨੂੰ ਕਰੀਬ 365 ਕਿਲੋ ਅਫੀਮ ਦਾ ਕੋਟਾ ਜਾਰੀ ਹੋਇਆ ਹੈ ਤੇ ਸਾਲ 2008 ਦੌਰਾਨ ਜ਼ਿਲ੍ਹਾ ਜਲੰਧਰ ਨੂੰ 10 ਕਿਲੋ ਅਫੀਮ ਦਾ ਕੋਟਾ ਮਿਲਿਆ ਸੀ। ਸਾਲ 2008 ਦੌਰਾਨ ਅੰਮ੍ਰਿਤਸਰ ਨੂੰ 155 ਕਿਲੋ, ਸਾਲ 2009 ਵਿੱਚ 105 ਕਿਲੋ, 2010 'ਚ 70 ਕਿਲੋ, 2011 'ਚ 35 ਕਿਲੋ ਅਫੀਮ ਦਾ ਕੋਟਾ ਜਾਰੀ ਕੀਤਾ ਗਿਆ। ਬ੍ਰਿਜ ਭਾਨ ਬੁਜਰਕ ਨੇ ਕਿਹਾ ਕਿ ਰਾਜ ਦੇ ਹੋਰ ਕਿਸੇ ਜ਼ਿਲ੍ਹੇ ਨੂੰ ਇਸ ਦੌਰਾਨ ਅਫੀਮ ਦਾ ਕੋਟਾ ਨਹੀਂ ਮਿਲਿਆ ਤੇ ਸਾਲ 2011 ਤੋਂ ਬਾਅਦ ਕਿਸੇ ਵੀ ਫਰਮ ਨੂੰ ਅਫੀਮ ਸਪਲਾਈ ਨਹੀਂ ਕੀਤੀ ਗਈ। ਵਿਭਾਗ ਵੱਲੋਂ ਅਫੀਮ ਦੀ ਕੁੱਲ ਕੀਮਤ ਨਹੀਂ ਦੱਸੀ ਗਈ। ਅਫੀਮ ਦਾ ਕੋਟਾ ਨਾਰਕੋਟਿਕਸ ਕਮਿਸ਼ਨਰ ਗੌਰਮਿੰਟ ਆਫ ਇੰਡੀਆ ਮਨਿਸਟਰੀ ਆਫ ਫਾਈਨਾਂਸ ਡਿਪਾਰਟਮੈਂਟ ਆਫ ਰੈਵੀਨਿਊ ਸੈਂਟਰਲ ਬਿਊਰੋ ਆਫ ਨਾਰਕੋਟਿਕਸ, ਗਵਾਲੀਅਰ ਵੱਲੋਂ ਜਾਰੀ ਕੀਤਾ ਜਾਂਦਾ ਹੈ, ਪਰ ਅੰਮ੍ਰਿਤਸਰ ਨੂੰ ਤਿੰਨ ਕੁਇੰਟਲ 65 ਕਿਲੋ ਅਫੀਮ ਦਾ ਕੋਟਾ ਜਾਰੀ ਕਰਨਾ ਕਿਤੇ ਨਾ ਕਿਤੇ ਸ਼ੱਕ ਦੇ ਘੇਰੇ 'ਚ ਆਉਂਦਾ ਹੈ ਜਦੋਂ ਕਿ ਰਾਜ ਦੇ ਤਕਰੀਬਨ ਬਾਕੀ ਸਾਰੇ ਹੀ ਜ਼ਿਲ੍ਹੇ ਕਾਲੀ ਨਾਗਣੀ ਦੀ ਸਪਲਾਈ ਤੋਂ ਵਾਂਝੇ ਹੀ ਰਹੇ ਹਨ।