ਪਟਿਆਲਾ, 15 ਜੁਲਾਈ (ਪੋਸਟ ਬਿਊਰੋ)- ਬਿਜਲੀ ਚੋਰੀ ਰੋਕਣ ਦੇ ਮੰਤਵ ਨਾਲ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਦੀ ਮੁਹਿੰਮ ਦੇ ਸਾਰਥਿਕ ਨਤੀਜੇ ਸਾਹਮਣੇ ਆਏ ਹਨ। ਪੰਜਾਬ ਪਾਵਰ ਕਾਰਪੋਰੇਸ਼ਨ ਦੇ ਸੀ ਐਮ ਡੀ ਇੰਜੀਨੀਅਰ ਬਲਦੇਵ ਸਿੰਘ ਸਰਾਂ ਨੇ ਦੱਸਿਆ ਹੈ ਕਿ ਜੁਲਾਈ ਦੇ ਦੋ ਹਫਤਿਆਂ ਵਿੱਚ ਬਿਜਲੀ ਨਿਗਮ ਦੇ ਵੰਡ ਸਰਕਲ ਦੀਆਂ ਟੀਮਾਂ ਵੱਲੋਂ ਵੱਡੇ ਪੱਧਰ 'ਤੇ ਛਾਪੇ ਮਾਰੇ ਗਏ ਅਤੇ ਬਿਜਲੀ ਚੋਰੀ ਕਰਨ ਵਾਲੇ 2643 ਖਪਤਕਾਰਾਂ ਨੂੰ 521.13 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਹੈ। ਉਨ੍ਹਾਂ ਦੱਸਿਆ ਕਿ 39953 ਖਪਤਕਾਰਾਂ ਦੇ ਛਾਪੇ ਮਾਰ ਗਏ, ਉਨ੍ਹਾਂ ਨੇ ਛਾਪੇ ਮਾਰਨ ਵਾਲੇ ਪੰਜ ਜ਼ੋਨਾਂ ਦੀਆਂ ਟੀਮਾਂ ਦੀ ਸ਼ਲਾਘਾ ਕੀਤੀ ਤੇ ਕਿਹਾ ਕਿ ਅੰਮ੍ਰਿਤਸਰ ਜ਼ੋਨ ਦੀਆਂ ਟੀਮਾਂ ਨੇ 19290 ਖਪਤਕਾਰਾਂ ਦੀ ਚੈਕਿੰਗ ਕੀਤੀ ਅਤੇ 1026 ਖਪਤਕਾਰਾਂ ਨੂੰ 161.68 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਹੈ।
ਇਸ ਸੰਬੰਧ ਵਿੱਚ ਉਨ੍ਹਾਂ ਦੱਸਿਆ ਕਿ ਬਠਿੰਡਾ ਜ਼ੋਨ ਦੇ 1514 ਖਪਤਕਾਰਾਂ ਦੀ ਜਾਂਚ ਵਿੱਚ 590 ਖਪਤਕਾਰਾਂ ਨੂੰ 131.54 ਲੱਖ ਤੇ ਪਟਿਆਲਾ ਜ਼ੋਨ ਵਿੱਚ 442 ਖਪਤਕਾਰਾਂ ਨੂੰ 76.84 ਲੱਖ ਦੇ ਜੁਰਮਾਨੇ ਪਾਏ ਹਨ। ਉਦਯੋਗਿਕ ਸ਼ਹਿਰ ਲੁਧਿਆਣਾ ਦੀ ਜਾਂਚ ਕਰ ਕੇ 160 ਖਪਤਕਾਰਾਂ ਨੂੰ 37.94 ਲੱਖ ਅਤੇ ਜਲੰਧਰ ਜ਼ੋਨ ਦੀਆਂ ਟੀਮਾਂ ਨੇ 7125 ਖਪਤਕਾਰਾਂ ਦੀ ਜਾਂਚ ਕੀਤੀ ਅਤੇ 165 ਖਪਤਕਾਰਾਂ ਨੂੰ 83.86 ਲੱਖ ਜੁਰਮਾਨਾ ਲਾਇਆ ਹੈ। ਉਨ੍ਹਾਂ ਦੱਸਿਆ ਕਿ ਬਿਜਲੀ ਨਿਗਮ ਦੇ ਅਧਿਕਾਰੀਆਂ ਤੇ ਸਟਾਫ ਨੂੰ ਵਜੀਦਕੇ, ਜ਼ੀਰਾ, ਫਾਜ਼ਿਲਕਾ ਵਿਖੇ ਜਾਂਚ ਤੋਂ ਰੋਕਿਆ ਗਿਆ। ਵਜੀਦਕੇ ਵਿਖੇ ਬਿਜਲੀ ਚੋਰੀ ਰੋਕਣ ਵਾਲੇ ਲੋਕਾਂ ਵਿਰੁੱਧ ਸਟਾਫ ਦੇ ਕੰਮ ਵਿੱਚ ਵਿਘਨ ਪਾਉਣ ਬਾਰੇ ਕੇਸ ਦਰਜ ਕਰਾਇਆ ਗਿਆ ਹੈ।