ਕਪੂਰਥਲਾ, 15 ਜੁਲਾਈ (ਪੋਸਟ ਬਿਊਰੋ)- ਜਿ਼ਲਾ ਕਪੂਰਥਲਾ ਦੀ ਪੁਲਸ ਨੇ ਨਕਲੀ ਸੀਮੈਂਟ ਬਣਾਉਣ ਵਾਲੀ ਫੈਕਟਰੀ ਦਾ ਪਰਦਾ ਫਾਸ਼ ਕਰ ਕੇ ਸੀਮੈਂਟ ਦੀਆਂ ਸੈਂਕੜੇ ਬੋਰੀਆਂ ਅਤੇ ਮਸ਼ੀਨਰੀ ਬਰਾਮਦ ਕੀਤੀ ਤੇ ਚਾਰ ਦੋਸ਼ੀਆਂ ਨੂੰ ਗ੍ਰਿਫਤਾਰ ਕੀਤਾ ਹੈ। ਇਹ ਕਾਰਵਾਈ ਇੱਕ ਕੈਂਟਰ ਦੇ ਫੜੇ ਜਾਣ ਪਿੱਛੋਂ ਉਸ ਦੇ ਕਲੀਨਰ ਦੀ ਨਿਸ਼ਾਨਦੇਹੀ ਉਤੇ ਕੀਤੀ ਗਈ ਹੈ। ਇਸ ਕੈਂਟਰ ਵਿੱਚ ਨਕਲੀ ਸੀਮੈਂਟ ਲਿਜਾਇਆ ਜਾ ਰਿਹਾ ਸੀ ਕਿ ਪੁਲਸ ਨੂੰ ਸੂਚਨਾ ਮਿਲ ਗਈ। ਨਾਕਾ ਦੇਖ ਕੇ ਕੈਂਟਰ ਚਾਲਕ ਗੱਡੀ ਖੜ੍ਹੀ ਕਰ ਕੇ ਫਰਾਰ ਹੋ ਗਿਆ, ਪਰ ਕਲੀਨਰ ਫੜਿਆ ਗਿਆ।
ਡੀ ਐੱਸ ਪੀ ਕਪੂਰਥਲਾ ਹਰਿੰਦਰ ਸਿੰਘ ਗਿੱਲ ਨੇ ਦੱਸਿਆ ਕਿ ਪੁਲਸ ਨੂੰ ਸੂਚਨਾ ਮਿਲੀ ਸੀ ਕਿ ਹਰਕੀਰਤ ਸਿੰਘ ਵਾਸੀ ਨਰੋਤਮ ਵਿਹਾਰ ਕਪੂਰਥਲਾ ਅਤੇ ਚਰਨਜੀਤ ਸਿੰਘ ਵਾਸੀ ਸੁਲਤਾਨਪੁਰ ਲੋਧੀ ਨੇ ਹਰਜਿੰਦਰ ਸਿੰਘ ਵਾਸੀ ਔਜਲਾ ਜੋਗੀ ਤੋਂ ਰਾਜਪੁਰ ਰੋਡ ਉਤੇ ਇੱਕ ਗੋਦਾਮ ਵਰਗੀ ਹਵੇਲੀ ਕਿਰਾਏ 'ਤੇ ਲਈ ਹੈ, ਜਿੱਥੇ ਆਪਣੇ ਨੌਕਰਾਂ ਸ਼ਿਵ ਕੁਮਾਰ, ਰਾਜੂ, ਮਯਕਰ, ਆਤਮਾ ਰਾਮ ਕੰਦਈ, ਪਰਮਜੀਤ ਸਿੰਘ ਤੋਂ ਨਕਲੀ ਏ ਸੀ ਸੀ ਅਤੇ ਅੰਬੂਜਾ ਸੀਮੈਂਟ ਬਣਵਾਉਂਦੇ ਹਨ। ਕੱਲ੍ਹ ਵੀ ਉਹ ਨਕਲੀ ਏ ਸੀ ਸੀ ਅਤੇ ਅੰਬੂਜਾ ਸੀਮੈਂਟ ਕੈਂਟਰ ਵਿਚ ਲੱਦ ਕੇ ਸ਼ਹਿਰ ਵੱਲ ਆ ਰਹੇ ਸਨ। ਪੁਲਸ ਨੇ ਔਜਲਾ ਫਾਟਕ 'ਤੇ ਨਾਕਾਬੰਦੀ ਕਰ ਕੇ ਉਸ ਕੈਂਟਰ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ ਤਾਂ ਚਾਲਕ ਪਰਮਜੀਤ ਸਿੰਘ ਗੱਡੀ ਛੱਡ ਕੇ ਦੌੜ ਗਿਆ, ਪਰ ਕਲੀਨਰ ਆਤਮਾ ਰਾਮ ਨੂੰ ਪੁਲਸ ਨੇ ਫੜ ਲਿਆ ਅਤੇ ਕੈਂਟਰ 'ਚੋਂ ਨਕਲੀ ਏ ਸੀ ਸੀ ਸੀਮੈਂਟ ਦੇ 100 ਬੋਰੇ ਮਿਲੇ। ਕਲੀਨਰ ਦੀ ਨਿਸ਼ਾਨਦੇਹੀ 'ਤੇ ਪੁਲਸ ਨੇ ਪਿੰਡ ਔਜਲਾ ਵਿੱਚ ਚੱਲਦੀ ਨਕਲੀ ਸੀਮੈਂਟ ਬਣਾਉਣ ਦੀ ਫੈਕਟਰੀ ਅਤੇ ਗੋਦਾਮ ਵਿੱਚ ਛਾਪਾ ਮਾਰ ਕੇ ਸ਼ਿਵ ਕੁਮਾਰ, ਰਾਜੂ ਅਤੇ ਮਯਕਰ ਨੂੰ ਨਕਲੀ ਏ ਸੀ ਸੀ ਅਤੇ ਅੰਬੂਜਾ ਸੀਮੈਂਟ ਬਣਾਉਂਦੇ ਹੋਏ ਗ੍ਰਿਫਤਾਰ ਕਰ ਲਿਆ। ਇਸ ਛਾਪੇ ਮੌਕੇ ਫੈਕਟਰੀ ਮਾਲਕ ਹਰਕਿਰਤ ਸਿੰਘ ਉਰਫ ਬਾਬਾ, ਚਰਨਜੀਤ ਸਿੰਘ ਉਰਫ ਸੋਨੂੰ ਅਤੇ ਪਰਮਜੀਤ ਸਿੰਘ ਫਰਾਰ ਹੋ ਗਏ। ਗ੍ਰਿਫਤਾਰ ਦੋਸ਼ੀਆਂ ਤੋਂ ਕੁੱਲ 401 ਬੋਰੀਆਂ ਨਕਲੀ ਸੀਮੈਂਟ ਮਾਰਕਾ ਏ ਸੀ ਸੀ 40 ਬੋਰੇ 43 ਗ੍ਰੇਡ ਓ ਪੀ ਸੀ ਸੀਮੈਂਟ ਅਤੇ 300 ਬੋਰੇ ਕਾਲੀ ਰਾਖ, ਇੱਕ ਕੈਂਟਰ, ਇੱਕ ਇਲੈਕਟ੍ਰਾਨਿਕ ਕੰਡਾ ਮਾਰਕਾ ਗੋਲਡ ਫੇਸ, ਪਲਾਸਟਿਕ ਦੇ ਵੱਡੇ 10 ਕੀਪ, 10 ਵੱਡੇ ਜਗ ਪਲਾਸਟਿਕ, ਬੋਰਿਆਂ ਦੀ ਸਿਲਾਈ ਕਰਨ ਵਾਲੀ ਮਸ਼ੀਨ, ਸਿਲਾਈ ਧਾਗਾ 40 ਰੋਲ, 156 ਬੋਰੇ ਖਾਲੀ ਬਾਰਦਾਨਾ ਏ ਸੀ ਸੀ ਅੰਬੂਜਾ ਸੀਮੈਂਟ ਬਰਾਮਦ ਹੋਏ।