ਨੇਵਾਰਕ, 15 ਜੁਲਾਈ (ਪੋਸਟ ਬਿਊਰੋ)- ਭਾਰਤੀ ਸਟਾਰ ਮੁੱਕੇਬਾਜ਼ ਵਿਜੇਂਦਰ ਸਿੰਘ ਨੇ ਅਮਰੀਕੀ ਪੇਸ਼ੇਵਰ ਸਰਕਟ ਵਿੱਚ ਸ਼ੁਰੂਆਤ ਕਰਦੇ ਹੋਏ ਆਪਣੇ ਤੋਂ ਕਿਤੇ ਵੱਧ ਤਜਰਬੇਕਾਰ ਮਾਈਕ ਸਨਾਈਡਰ 'ਤੇ ਤਕਨੀਕੀ ਨਾਕਆਊਟ ਰਾਹੀਂ ਜਿੱਤ ਹਾਸਲ ਕੀਤੀ। ਅੱਠਗੇੜ ਦੀ ਸੁਪਰ ਮਿਡਲਵੇਟ ਬਾਊਟ ਵਿੱਚ ਹਰਿਆਣਾ ਦੇ 33 ਸਾਲਾ ਮੁੱਕੇਬਾਜ਼ ਨੇ ਚਾਰ ਰਾਊਂਡ ਵਿੱਚ ਦਬਦਬਾ ਬਣਾ ਕੇ ਸਰਕਟ ਵਿੱਚ ਲਗਾਤਾਰ 11ਵੀਂ ਜਿੱਤ ਹਾਸਲ ਕੀਤੀ।
ਇਹ ਜਿੱਤ ਉਨ੍ਹਾਂ ਨੂੰ ਚੌਥੇ ਗੇੜ ਦੇ ਦੂਜੇ ਮਿੰਟ ਵਿੱਚ ਮਿਲੀ ਜਦ ਵਿਜੇਂਦਰ ਨੇ ਸਨਾਈਡਰ ਨੂੰ ਲਗਾਤਾਰ ਸਿੱਧੇ ਪੰਚ ਨਾਲ ਪਸਤ ਕਰ ਦਿੱਤਾ ਜਿਸ ਨਾਲ ਰੈਫਰੀ ਨੂੰ ਬਾਊਟ ਇਸ ਭਾਰਤੀ ਮੁੱਕੇਬਾਜ਼ ਦੇ ਪੱਖ ਵਿੱਚ ਕਰਨ ਲਈ ਮਜਬੂਰ ਹੋਣਾ ਪਿਆ। ਵਿਜੇਂਦਰ ਨੇ ਕਿਹਾ ਕਿ ਮੈਨੂੰ ਦਬਦਬਾ ਬਣਾਉਣ ਵਿੱਚ ਚਾਰ ਰਾਊਂਡ ਲੱਗੇ। ਮੈਂ ਦੋ ਜਾਂ ਤਿੰਨ ਰਾਊਂਡ ਦੀ ਉਮੀਦ ਕੀਤੀ ਸੀ, ਪਰ ਮੈਨੂੰ ਇਸ ਦੇ ਚਾਰ ਰਾਊਂਡ ਲੱਗ ਗਏ।
ਇਹ ਵਿਜੇਂਦਰ ਦੀ ਅੱਠਵੀਂ ਨਾਕਆਊਟ ਜਿੱਤ ਹੈ। ਪੂਰੀ ਬਾਊਟ ਦੌਰਾਨ 38 ਸਾਲ ਦੇ ਸਨਾਈਡਰ ਦੇ ਪੰਚ ਵਿੱਚ ਵੱਧ ਦਮ ਨਹੀਂ ਦਿਖਾਈ ਦਿੱਤਾ, ਜਦ ਕਿ ਇੱਕ ਸਾਲ ਤੋਂ ਵੱਧ ਸਮੇਂ ਬਾਅਦ ਵਾਪਸੀ ਕਰ ਰਹੇ ਵਿਜੇਂਦਰ ਦੇ ਪੰਚ ਕਾਫੀ ਸਟੀਕ ਅਤੇ ਦਮਦਾਰ ਸਨ। ਸਥਾਨਕ ਮੁੱਖ ਦਾਅਵੇਦਾਰ ਖਿਲਾਫ ਵਿਜੇਂਦਰ ਨੂੰ ਕਿਤੇ ਵੀ ਖਤਰਾ ਦਿਖਾਈ ਨਹੀਂ ਦਿੱਤਾ ਤੇ ਉਨ੍ਹਾਂ ਨੇ ਸਨਾਈਡਰ ਦੇ ਕਮਜ਼ੋਰ ਹਮਲੇ ਨੂੰ ਆਸਾਨੀ ਨਾਲ ਰੋਕ ਦਿੱਤਾ। ਸਨਾਈਡਰ ਦਾ ਜਿੱਤ ਦਾ ਰਿਕਾਰਡ 13-5-3 ਹੈ। ਵਿਜੇਂਦਰ ਨੇ ਬਾਊਟ ਤੋਂ ਬਾਅਦ ਕਿਹਾ ਕਿ ਲੰਬੇ ਸਮੇਂ ਬਾਅਦ ਰਿੰਗ ਵਿੱਚ ਵਾਪਸੀ ਕਰਨਾ ਸ਼ਾਨਦਾਰ ਹੈ। ਅਮਰੀਕਾ ਵਿੱਚ ਆਉਣਾ ਤੇ ਜਿੱਤ ਹਾਸਲ ਕਰਨਾ ਸ਼ਾਨਦਾਰ ਹੈ। ਇਹ ਅਸਲ ਵਿੱਚ ਕਾਫੀ ਰੋਮਾਂਚਕ ਸੀ। ਮੈਂ ਅਮਰੀਕਾ ਵਿੱਚ ਸ਼ੁਰੂ ਦੀ ਜਿੱਤ ਦਰਜ ਕਰ ਕੇ ਕਾਫੀ ਖੁਸ਼ ਹਾਂ। ਵਿਜੇਂਦਰ ਪਿਛਲੇ ਦਿਨੀਂ ਦੱਖਣੀ ਦਿੱਲੀ ਦੀ ਸੀਟ ਤੋਂ ਆਮ ਚੋਣਾਂ ਵਿੱਚ ਕਾਂਗਰਸ ਵੱਲੋਂ ਚੋਣ ਲੜੇ ਸਨ, ਪਰ ਉਸ ਵਿੱਚ ਉਨ੍ਹਾਂ ਨੂੰ ਹਾਰ ਮਿਲੀ ਸੀ। ਹਾਲ ਆਫ ਫੇਮ ਬਾਬ ਅਰੂਮ ਦੇ ਟਾਮ ਰੈਂਕ ਪ੍ਰੋਮੋਸ਼ੰਸ ਇਸ ਸਾਲ ਦੋ ਹੋਰ ਮੁਕਾਬਲਿਆਂ ਵਿੱਚ ਹਿੱਸਾ ਲੈਣਾ ਚਾਹੁੰਦੇ ਹਨ।