ਓਟਵਾ, 14 ਜੁਲਾਈ (ਪੋਸਟ ਬਿਊਰੋ) : ਸਰਕਾਰ ਦੇ ਕੁੱਝ ਨਵੇਂ ਏਅਰ ਪੈਸੈਂਜਰ ਪ੍ਰੋਟੈਕਸ਼ਨ ਨਿਯਮ ਇਸ ਹਫਤੇ ਤੋਂ ਪ੍ਰਭਾਵੀ ਹੋਣ ਜਾ ਰਹੇ ਹਨ। ਪਰ ਡਿਲੇਅ ਜਾਂ ਰੱਦ ਹੋਈਆਂ ਫਲਾਈਟਸ ਲਈ ਮੁਆਵਜ਼ੇ ਦੀ ਆਸ ਲਾਈ ਬੈਠੇ ਲੋਕਾਂ ਨੂੰ ਇਸ ਸਾਲ ਦੇ ਅੰਤ ਤੱਕ ਉਡੀਕ ਕਰਨੀ ਹੋਵੇਗੀ।
ਐਮਰਜੰਸੀ ਏਅਰਕ੍ਰਾਫਟ ਮੇਨਟੇਨੈਂਸ ਨਾਲ ਸਬੰਧਤ ਜੇ ਕਿਸੇ ਨੂੰ ਆਪਣੀ ਫਲਾਈਟ ਰੱਦ ਹੋਣ ਦੇ ਮਾਮਲੇ ਦਾ ਨਿਪਟਾਰਾ ਕਰਵਾਉਣਾ ਹੈ, ਉਸ ਨੂੰ ਵੀ ਹਾਲ ਦੀ ਘੜੀ ਇਹ ਵਿਚਾਰ ਛੱਡਣਾ ਹੋਵੇਗਾ। ਇਸ ਤਥਾ ਕਥਿਤ ਪੈਸੈਂਜਰ ਬਿੱਲ ਆਫ ਰਾਈਟਸ ਦਾ ਪਹਿਲਾ ਹਿੱਸਾ ਸੋਮਵਾਰ ਤੋਂ ਲਾਗੂ ਹੋਣ ਜਾ ਰਿਹਾ ਹੈ। ਏਅਰਲਾਈਨ ਦੇ ਕੰਟਰੋਲ ਵਾਲੇ ਕਾਰਨਾਂ ਕਰਕੇ ਜੇ ਯਾਤਰੀਆਂ ਨੂੰ ਨੁਕਸਾਨ ਝੱਲਣਾ ਪਿਆ ਤਾਂ ਏਅਰਲਾਈਨ ਨੂੰ 2,400 ਡਾਲਰ ਦਾ ਮੁਆਵਜ਼ਾ ਸਬੰਧਤ ਯਾਤਰੀਆਂ ਨੂੰ ਦੇਣਾ ਹੋਵੇਗਾ। ਜਿਨ੍ਹਾਂ ਯਾਤਰੀਆਂ ਦਾ ਸਮਾਨ ਗੁਆਚ ਜਾਂਦਾ ਹੈ ਜਾਂ ਨੁਕਸਾਨਿਆ ਜਾਂਦਾ ਹੈ ਉਨ੍ਹਾਂ ਨੂੰ ਏਅਰਲਾਈਨ ਵੱਲੋਂ 2100 ਡਾਲਰ ਦਿੱਤੇ ਜਾਣਗੇ ਤੇ ਉਨ੍ਹਾਂ ਦੀ ਬੈਗੇਜ ਫੀਸ ਵੀ ਰਿਫੰਡ ਕੀਤੇ ਜਾਣਯੋਗ ਹੋਵੇਗੀ।
ਜੇ ਫਲਾਈਟ ਡਿਲੇਅ ਹੁੰਦੀ ਹੈ ਤਾਂ ਅਜਿਹੇ ਵਿੱਚ ਏਅਰਲਾਈਨ ਨੂੰ ਯਾਤਰੀਆਂ ਦੇ ਇਲਾਜ ਦੇ ਵੀ ਕੁੱਝ ਪ੍ਰਬੰਧ ਕਰਨੇ ਹੋਣਗੇ। ਜੇ ਟੇਕ ਆਫ ਵਿੱਚ ਬਹੁਤੀ ਦੇਰ ਹੁੰਦੀ ਹੈ ਤਾਂ ਤਿੰਨ ਘੰਟੇ ਬਾਅਦ ਯਾਤਰੀਆਂ ਨੂੰ ਜਹਾਜ਼ ਵਿੱਚੋਂ ਉਤਰਨ ਦਿੱਤਾ ਜਾਵੇਗਾ। ਇਸ ਦੇ ਨਾਲ ਹੀ ਏਅਰਲਾਈਨਜ਼ ਨੂੰ ਮਿਊਜ਼ੀਕਲ ਇੰਸਟਰੂਮੈਂਟਸ ਦੀ ਸਾਂਭ ਸੰਭਾਲ ਲਈ ਵੀ ਸਪਸ਼ਟ ਨੀਤੀਆਂ ਬਣਾਉਣੀਆਂ ਹੋਣਗੀਆਂ ਤੇ ਸਾਰੇ ਯਾਤਰੀਆਂ ਨੂੰ ਉਨ੍ਹਾਂ ਦੇ ਅਧਿਕਾਰਾਂ ਦੇ ਨਾਲ ਨਾਲ ਫਲਾਈਟ ਵਿੱਚ ਹੋਣ ਵਾਲੀ ਦੇਰ ਤੇ ਫਲਾਈਟ ਦੇ ਰੱਦ ਹੋਣ ਬਾਰੇ ਵੀ ਨਿਯਮਿਤ ਅਪਡੇਟਜ਼ ਦੇਣੇ ਹੋਣਗੇ।
ਇਸ ਦੌਰਾਨ ਦੀ ਏਅਰ ਟਰਾਂਸਪੋਰਟ ਐਸੋਸਿਏਸ਼ਨ ਆਫ ਕੈਨੇਡਾ, ਜੋ ਕਿ ਲੀਡਿੰਗ ਏਅਰਲਾਈਨਜ਼ ਦੀ ਨੁਮਾਇੰਦਗੀ ਕਰਦੀ ਹੈ, ਵੱਲੋਂ ਇਹ ਸਪਸ਼ਟ ਕੀਤਾ ਗਿਆ ਹੈ ਕਿ ਇਨ੍ਹਾਂ ਨਵੇਂ ਨਿਯਮਾਂ ਕਾਰਨ ਹਵਾਈ ਕਿਰਾਇਆਂ ਵਿੱਚ ਵੀ ਵਾਧਾ ਹੋਵੇਗਾ।