ਓਨਟਾਰੀਓ, 14 ਜੁਲਾਈ (ਪੋਸਟ ਬਿਊਰੋ) : ਓਨਟਾਰੀਓ ਪਾਰਕ ਵਿੱਚ ਕੈਂਪਿੰਗ ਕਰਨ ਗਈਆਂ ਦੋ 16 ਸਾਲਾ ਲੜਕੀਆਂ ਦੇ ਤਿੰਨ ਦਿਨ ਪਹਿਲਾਂ ਚੈੱਕਪੁਆਇੰਟ ਉੱਤੇ ਰਿਪੋਰਟ ਨਾ ਕਰਨ ਕਾਰਨ ਉਨ੍ਹਾਂ ਦੇ ਲਾਪਤਾ ਹੋਣ ਦਾ ਡਰ ਪੈਦਾ ਹੋ ਗਿਆ ਹੈ।
ਕਿਚਨਰ, ਓਨਟਾਰੀਓ ਦੀਆਂ ਮਾਰਟਾ ਮਾਲੇਕ ਤੇ ਮਾਇਆ ਮਿਰੋਟਾ ਨੂੰ ਐਲਗੌਂਕੁਇਨ ਪ੍ਰੋਵਿੰਸ਼ੀਅਲ ਪਾਰਕ ਤੋਂ ਲੱਭਣ ਲਈ ਪੁਲਿਸ ਹੈਲੀਕਾਪਟਰ, ਸੂਹੀਆ ਕੁੱਤਿਆਂ ਤੇ ਨੈਚੂਰਲ ਰਿਸੋਰਸਿਜ਼ ਐਂਡ ਫੌਰੈਸਟਰੀ ਮੰਤਰਾਲੇ ਦੇ ਜਹਾਜ਼ ਦੀ ਮਦਦ ਲਈ ਜਾ ਰਹੀ ਹੈ। ਆਖਰੀ ਵਾਰੀ ਇਨ੍ਹਾਂ ਲੜਕੀਆਂ ਨੂੰ ਵੀਰਵਾਰ ਨੂੰ ਕੈਂਪਿੰਗ ਵਾਲੇ ਸਾਜ਼ੋ ਸਾਮਾਨ ਨਾਲ ਵੇਖਿਆ ਗਿਆ ਸੀ। ਪੁਲਿਸ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਟੈਂਟ ਵੀ ਸੀ ਤੇ ਕਈ ਦਿਨਾਂ ਵਾਸਤੇ ਖਾਣਾ ਵੀ ਸੀ। ਆਪਣੇ ਸਾਥੀ ਕੈਂਪਰਜ਼ ਦੇ ਨਾਲ ਜਦੋਂ ਸ਼ੁੱਕਰਵਾਰ ਨੂੰ ਉਹ ਪਹਿਲਾਂ ਤੋਂ ਹੀ ਤੈਅਸੁ਼ਦਾ ਚੈੱਕਪੁਆਇੰਟ ਉੱਤੇ ਨਹੀਂ ਪਹੁੰਚੀਆਂ ਤਾਂ ਉਨ੍ਹਾਂ ਦੇ ਲਾਪਤਾ ਹੋਣ ਦੀ ਰਿਪੋਰਟ ਲਿਖਾਈ ਗਈ।
ਪੁਲਿਸ ਨੇ ਦੱਸਿਆ ਕਿ ਲੜਕੀਆਂ ਕੋਲ ਸੈੱਲਫੋਨ ਵੀ ਨਹੀਂ ਹੈ। ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਿਸ ਈਸਟ ਰੀਜਨ ਦੇ ਬਿੱਲ ਡਿੱਕਸਨ ਨੇ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਸਾਡਾ ਧਿਆਨ ਉਨ੍ਹਾਂ ਨੂੰ ਲੱਭਣ ਵਿੱਚ ਲੱਗਿਆ ਹੋਇਆ ਹੈ। ਅਸੀਂ ਇਨ੍ਹਾਂ ਲੜਕੀਆਂ ਨੂੰ ਜਲਦ ਹੀ ਲੱਭ ਲਵਾਂਗੇ। ਪੁਲਿਸ ਨੇ ਦੱਸਿਆ ਕਿ ਦੋਵਾਂ ਲੜਕੀਆਂ ਨੂੰ ਕੈਂਪਿੰਗ ਦਾ ਕਾਫੀ ਤਜਰਬਾ ਹੈ। ਵਾਲੰਟੀਅਰਜ਼ ਤੇ ਪਾਰਕ ਸਟਾਫ ਦੀ ਟੀਮ ਵੱਲੋਂ ਵੀ ਲੜਕੀਆਂ ਦੀ ਭਾਲ ਵਿੱਚ ਮਦਦ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਦੱਸਿਆ ਕਿ ਮਿਰੋਟਾ ਪੰਜ ਫੁੱਟ ਲੰਮੀ ਹੈ ਤੇ ਉਸ ਦੇ ਲੰਮੇਂ ਸੁਨਹਿਰੇ ਭੂਰੇ ਵਾਲ ਹਨ ਜਦਕਿ ਮਾਲੇਕ ਛੇ ਫੁੱਟ ਲੰਮੀਂ ਹੈ।