ਸੱਚੀਆਂ ਘਟਨਾਵਾਂ 'ਤੇ ਆਧਾਰਤ ਫਿਲਮ ਦਾ ਨਿਰਮਾਣ ਹਮੇਸ਼ਾ ਫਿਲਮ ਮੇਕਰਜ਼ ਨੂੰ ਆਕਰਸ਼ਿਤ ਕਰਦਾ ਰਿਹਾ ਹੈ। ਇਸੇ ਲੜੀ ਹੇਠ ਅਗਲੀ ਫਿਲਮ ‘ਬਟਲਾ ਹਾਊਸ’ ਆ ਰਹੀ ਹੈ। ਇਸ ਦਾ ਟ੍ਰੇਲਰ ਲੋਕਾਂ ਦੇ ਸਾਹਮਣੇ ਆ ਚੁੱਕਾ ਹੈ। ਦਿੱਲੀ ਵਿੱਚ ਸਾਲ 2008 ਵਿੱਚ ਹੋਏ ਐਨਕਾਊਂਟਰ ਵਿੱਚ ਦੋ ਅੱਤਵਾਦੀਆਂ ਨੂੰ ਪੁਲਸ ਨੇ ਮਾਰ ਦਿੱਤਾ ਸੀ। ਇਸ ਉੱਤੇ ਉਦੋਂ ਕਈ ਸਿਆਸੀ ਆਗੂਆਂ ਨੇ ਸਵਾਲ ਉਠਾਏ ਸਨ। ਟ੍ਰੇਲਰ ਵਿੱਚ ਅਜਿਹਾ ਨਜ਼ਰ ਨਹੀਂ ਆ ਰਿਹਾ ਹੈ।
ਬੀਤੇ ਦਿਨੀਂ ਫਿਲਮ ਦੇ ਟ੍ਰੇਲਰ ਦੀ ਲਾਂਚ ਦੇ ਮੌਕੇ ਨਿਰਦੇਸ਼ਕ ਨਿਖਿਲ ਅਡਵਾਨੀ ਨੇ ਸਾਫ ਕੀਤਾ ਕਿ ਫਿਲਮ ਵਿੱਚ ਸਿਆਸੀ ਨੇਤਾਵਾਂ ਵੱਲੋਂ ਕੀਤਾ ਵਿਰੋਧ ਵੀ ਦਿਖਾਇਆ ਗਿਆ ਹੈ। ਉਸ ਵਿੱਚ ਦਿਗਵਿਜੇ ਸਿੰਘ, ਅਰਵਿੰਦ ਕੇਜਰੀਵਾਲ, ਅਮਰ ਸਿੰਘ ਸਮੇਤ ਕਈ ਸਿਆਸੀ ਨੇਤਾਵਾਂ ਦਾ ਜ਼ਿਕਰ ਹੈ, ਪਰ ਉਨ੍ਹਾਂ ਦੇ ਨਾਂਅ ਅਸਲੀ ਹੋਣਗੇ ਜਾਂ ਬਦਲੇ ਗਏ ਹੋਣਗੇ, ਇਸ ਦਾ ਜਵਾਬ ਨਿਖਿਲ ਟਾਲ ਗਏ। ਉਨ੍ਹਾਂ ਕਿਹਾ ਕਿ ਇਸ ਲਈ ਤੁਹਾਨੂੰ ਫਿਲਮ ਦੇਖਣੀ ਹੋਵੇਗੀ। ਫਿਲਮ 15 ਅਗਸਤ ਨੂੰ ਰਿਲੀਜ਼ ਹੋ ਰਹੀ ਹੈ। ਉਸੇ ਦਿਨ ਅਕਸ਼ੈ ਕੁਮਾਰ ਦੀ ‘ਮਿਸ਼ਨ ਮੰਗਲ’ ਅਤੇ ਪ੍ਰਭਾਸ ਦੀ ‘ਸਾਹੋ’ ਵੀ ਰਿਲੀਜ਼ ਹੋਵੇਗੀ। ਤਿੰਨਾਂ ਫਿਲਮਾਂ ਦੀ ਇੱਕੋ ਦਿਨ ਰਿਲੀਜ਼ ਨਾਲ ਪ੍ਰੋਡਿਊਸਰ ਜਾਨ ਇਬਰਾਹੀਮ ਪ੍ਰੇਸ਼ਾਨ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਛੁੱਟੀਆਂ 'ਤੇ ਰਿਲੀਜ਼ ਫਿਲਮਾਂ ਵੱਡੀ ਓਪਨਿੰਗ ਦਿੰਦੀਆਂ ਹਨ।