ਪਿਛਲੇ ਕਾਫੀ ਸਮੇਂ ਤੋਂ ਸਾਲ 1982 ਵਿੱਚ ਰਿਲੀਜ਼ ਹੋਈ ਮਲਟੀ ਸਟਾਰਰ ਫਿਲਮ ‘ਸੱਤੇ ਪੇ ਸੱਤਾ’ ਦੀ ਰੀਮੇਕ ਨੂੰ ਲੈ ਕੇ ਕਈ ਖਬਰਾਂ ਆਈਆਂ ਹਨ। ਇਸ ਵਿੱਚ ਅਮਿਤਾਭ ਬੱਚਨ ਦਾ ਰੋਲ ਕੌਣ ਨਿਭਾਉਣ ਵਾਲੇ ਹਨ, ਇਸ ਬਾਰੇ ਕਈ ਨਾਂਅ ਸਾਹਮਣੇ ਆਏ ਸਨ, ਜਿਨ੍ਹਾਂ ਵਿੱਚ ਸ਼ਾਹਰੁਖ ਖਾਨ ਦਾ ਨਾਂਅ ਵੀ ਸ਼ਾਮਲ ਸੀ। ਫਰਾਹ ਖਾਨ ਦੇ ਨਿਰਦੇਸ਼ਨ ਵਿੱਚ ਬਣਨ ਵਾਲੀ ਇਸ ਫਿਲਮ ਬਾਰੇ ਜਿਹੜੀ ਤਾਜ਼ਾ ਖਬਰ ਆਈ ਹੈ, ਉਹ ਰਿਤਿਕ ਰੋਸ਼ਨ ਦੇ ਪ੍ਰਸ਼ੰਸਕਾਂ ਨੂੰ ਖੁਸ਼ ਕਰੇਗੀ।
ਫਿਲਮ ਦੇ ਕਰੀਬੀ ਸੂਤਰ ਨੇ ਦੱਸਿਆ, ‘ਸੱਤੇ ਪੇ ਸੱਤਾ’ ਦੀ ਰੀਮੇਕ ਫਿਲਮ ਨੂੰ ਰਿਤਿਕ ਰੋਸ਼ਨ ਨੇ ਸਾਈਨ ਕਰ ਲਿਆ ਹੈ। ਉਹ ਇਸ ਵਿੱਚ ਮੁੱਖ ਕਿਰਦਾਰ ਨਿਭਾਉਣਗੇ। ‘ਸੁਪਰ 30’ ਫਿਲਮ ਦੀ ਪ੍ਰਮੋਸ਼ਨ ਵਿੱਚ ਮਸ਼ਰੂਫ ਰਿਤਿਕ ਲਈ ਇਹ ਦੂਜਾ ਮੌਕਾ ਹੋਵੇਗਾ, ਜਦੋਂ ਉਹ ਅਮਿਤਾਭ ਬੱਚਨ ਵਾਲੀ ਫਿਲਮ ਦੇ ਰੀਮੇਕ ਦਾ ਹਿੱਸਾ ਬਣਨਗੇ। ਇਸ ਤੋਂ ਪਹਿਲਾਂ ਉਹ ਕਲਾਸਿਕ ਫਿਲਮ ‘ਅਗਨੀਪਥ’ ਦੀ ਰੀਮੇਕ ਵਿੱਚ ਅਮਿਤਾਭ ਬੱਚਨ ਦਾ ਆਈਕਾਨਿਕ ਵਿਜੈ ਦੀਨਾਨਾਥ ਚੌਹਾਨ ਦਾ ਕਿਰਦਾਰ ਨਿਭਾ ਚੁੱਕੇ ਹਨ। ‘ਸੱਤੇ ਪੇ ਸੱਤਾ’ ਦੀ ਰੀਮੇਕ ਦਾ ਨਿਰਮਾਣ ਰੋਹਿਤ ਸ਼ੈਟੀ ਕਰਨ ਵਾਲੇ ਹਨ। ਇਹ ਪਹਿਲੀ ਵਾਰ ਹੋਵੇਗਾ ਕਿ ਰੋਹਿਤ ਅਤੇ ਰਿਤਿਕ ਇੱਕ ਫਿਲਮ ਵਿੱਚ ਇਕੱਠੇ ਕੰਮ ਕਰਨਗੇ। ਜਿੱਥੋਂ ਤੱਕ ਫਿਲਮ ਅਦਾਕਾਰਾ ਦੀ ਗੱਲ ਹੈ, ਹੇਮਾ ਮਾਲਿਨੀ ਦੇ ਕਿਰਦਾਰ ਲਈ ਪਹਿਲਾਂ ਕੈਟਰੀਨਾ ਕੈਫ ਦਾ ਨਾਂਅ ਸਾਹਮਣੇ ਆ ਰਿਹਾ ਸੀ, ਪਰ ਕੈਟਰੀਨਾ ਨੇ ਖੁਦ ਇਸ ਖਬਰ ਤੋਂ ਇਨਕਾਰ ਕਰ ਦਿੱਤਾ ਸੀ। ਹੁਣ ਦੀਪਿਕਾ ਪਾਦੁਕੋਣ ਦਾ ਨਾਂਅ ਇਸ ਰੋਲ ਲਈ ਅੱਗੇ ਆ ਰਿਹਾ ਹੈ।