ਮੋਗਾਦਿਸ਼ੂ, 14 ਜੁਲਾਈ (ਪੋਸਟ ਬਿਊਰੋ)- ਸੋਮਾਲੀਆ ਦੇ ਬੰਦਰਗਾਹ ਸ਼ਹਿਰ ਕਿਸਮਾਓ ਦੇ ਇੱਕ ਹੋਟਲ 'ਚ ਅੱਤਵਾਦੀ ਹਮਲੇ ਵਿੱਚ ਘੱਟੋ ਘੱਟ 26 ਲੋਕਾਂ ਦੀ ਮੌਤ ਹੋ ਗਈ, ਜਦ ਕਿ 56 ਹੋਰ ਜ਼ਖਮੀ ਹੋ ਗਏ।
ਸਥਾਨਕ ਅਧਿਕਾਰੀਆਂ ਦੇ ਮੁਤਾਬਕ ਜੁਜ਼ਬਾਲੈਂਡ ਸੂਬੇ ਦੇ ਪ੍ਰਧਾਨ ਅਹਿਮਦ ਮਡੋਬੇ ਨੇ ਦੱਸਿਆ ਹੈ ਕਿ ਕੀਨੀਆ, ਕੈਨੇਡਾ, ਅਮਰੀਕਾ ਤੇ ਤਨਜਾਨੀਆ ਦੇ 10 ਵਿਦੇਸ਼ੀ ਨਾਗਰਿਕ ਇਸ ਹਮਲੇ ਵਿੱਚ ਮਾਰੇ ਗਏ ਹਨ। ਮਡੋਬੇ ਨੇ ਦੱਸਿਆ ਕਿ ਅਲ ਸ਼ਬਾਬ ਦੇ ਆਤਮਘਾਤੀ ਹਮਲਾਵਰ ਨੇ ਸ਼ੁੱਕਰਵਾਰ ਰਾਤ ਵਿਸਫੋਟਕਾਂ ਨਾਲ ਭਰਿਆ ਵਾਹਨ ਹੋਟਲ 'ਚ ਮਾਰ ਦਿੱਤਾ, ਜਿਸ ਪਿੱਛੋਂ ਭਾਰੀ ਹਥਿਆਰਾਂ ਨਾਲ ਲੈੱਸ ਕਈ ਬੰਦੂਕਧਾਰੀ ਗੋਲੀਬਾਰੀ ਕਰਦੇ ਹੋਏ ਹੋਟਲ 'ਚ ਦਾਖਲ ਹੋ ਗਏ। ਮਡੋਬੇ ਨੇ ਕਿਹਾ ਕਿ ਹੋਟਲ 'ਚ ਅਕਸਰ ਨੇਤਾ ਅਤੇ ਸਥਾਨਕ ਅਧਿਕਾਰੀ ਆਉਂਦੇ ਸਨ। ਜੁਜ਼ਬਾਲੈਂਡ ਸੁਰੱਖਿਆ ਬਲਾਂ ਨੇ ਹਮਲਾਵਰਾਂ ਵਿੱਚੋਂ ਤਿੰਨਾਂ ਨੂੰ ਮਾਰ ਦਿੱਤਾ, ਪਰ ਚੌਥਾ ਆਤਮਘਾਤੀ ਹਮਲਾਵਰ ਸੀ। ਉਨ੍ਹਾਂ ਕਿਹਾ ਕਿ ਹੋਟਲ ਵਿੱਚ ਠਹਿਰੇ ਹੋਏ ਤਿੰਨ ਕੀਨੀਆਈ, ਤਿੰਨ ਤਨਜਾਨੀਆ, ਦੋ ਅਮਰੀਕਾ ਅਤੇ ਇੱਕ-ਇੱਕ ਕੈਨੇਡਾ ਤੇ ਬ੍ਰਿਟੇਨ ਦੇ ਨਾਗਰਿਕ ਮਾਰੇ ਗਏ। ਸੋਮਾਲੀਆ ਦੀ ਪੱਤਰਕਾਰ ਯੂਨੀਅਨ ਨੇ ਪੁਸ਼ਟੀ ਕੀਤੀ ਕਿ ਮ੍ਰਿਤਕਾਂ ਵਿੱਚ ਦੋ ਪੱਤਰਕਾਰ ਸ਼ਾਮਲ ਹਨ। ਉਨ੍ਹਾਂ ਵਿੱਚ ਐੱਸ ਬੀ ਸੀ ਟੀ ਵੀ ਦੇ ਪੱਤਰਕਾਰ ਮੁਹੰਮਦ ਉਮਰ ਸਹਰ ਦੇ ਨਾਲ ਇੱਕ ਟੀ ਵੀ ਦੇ ਸੰਸਥਾਪਕ ਹੋਡਾਨ ਨਲੇਯੇਹ ਵੀ ਇਸ ਹਮਲੇ 'ਚ ਮਾਰੇ ਗਏ। ਅਲ ਕਾਇਦਾ ਨਾਲ ਜੁੜੇ ਅੱਤਵਾਦੀ ਸਮੂਹ ਨੇ ਇਸ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ।