ਲਾਸ ਏਂਜਲਸ, 14 ਜੁਲਾਈ (ਪੋਸਟ ਬਿਊਰੋ)- ਅਮਰੀਕਾ ਦੇ ਕੈਲੀਫੋਰਨੀਆ ਵਿੱਚ ਇੱਕ ਪੁਲਸ ਅਫਸਰ ਨੇ 13 ਸਾਲ ਦੀ ਲੜਕੀ ਹੱਨਾ ਵਿਲੀਅਮਜ਼ ਨੂੰ ਗੋਲੀ ਮਾਰ ਕੇ ਮਾਰ ਦਿੱਤਾ ਹੈ। ਹੱਨਾ ਨੇ ਨਕਲੀ ਬੰਦੂਕ ਨਾਲ ਅਧਿਕਾਰੀ 'ਤੇ ਨਿਸ਼ਾਨਾ ਸੇਧਿਆ ਸੀ। ਅਧਿਕਾਰੀ ਨੇ ਉਸ ਨੂੰ ਅਸਲੀ ਬੰਦੂਕ ਮੰਨ ਕੇ ਗੋਲੀ ਚਲਾ ਦਿੱਤੀ। ਇਸ ਘਟਨਾ ਵਿੱਚ ਲੜਕੀ ਦੀ ਮੌਤ ਹੋ ਗਈ। ਘਟਨਾ ਨਾਲ ਜੁੜੀ ਵੀਡੀਓ ਫੁਲਰਟਨ ਪੁਲਸ ਵਿਭਾਗ ਨੇ ਜਾਰੀ ਕੀਤੀ ਹੈ।
ਪਤਾ ਲੱਗਾ ਹੈ ਕਿ ਪੰਜ ਜੁਲਾਈ ਨੂੰ ਹੋਈ ਇਸ ਘਟਨਾ ਦੀ ਵੀਡੀਓ ਵਿੱਚ ਸਾਫ ਨਜ਼ਰ ਆਇਆ ਕਿ ਕਿਸ ਤਰ੍ਹਾਂ ਗੋਲੀ ਲੱਗਣ ਦੇ ਬਾਅਦ ਹੱਨਾ ਮਦਦ ਮੰਗ ਰਹੀ ਸੀ। ਉਸ ਦੇ ਹੱਥ ਵਿੱਚ ਨਕਲੀ ਬੰਦੂਕ ਵੀ ਸੀ। ਪੁਲਸ ਵੱਲੋਂ ਜਾਰੀ ਕੀਤੇ ਵੀਡੀਓ ਦੇ ਨਾਲ ਆਡੀਓ ਜਾਰੀ ਕੀਤਾ ਹੈ, ਜਿਸ ਵਿੱਚ ਪਿਤਾ ਬੇਂਸਨ ਵਿਲੀਅਮਜ਼ ਬੇਟੀ ਦੇ ਲਾਪਤਾ ਹੋਣ ਦੇ ਨੱਬੇ ਮਿੰਟ ਬਾਅਦ ਰਿਪੋਰਟ ਦਰਜ ਕਰਾਉਣ ਗਏ ਸਨ। ਵਿਲੀਅਮਜ਼ ਦੇ ਮੁਤਾਬਕ ਉਹ ਘਬਰਾਏ ਹੋਏ ਸਨ। ਉਨ੍ਹਾਂ ਨੂੰ ਡਰ ਸੀ ਕਿ ਉਨ੍ਹਾਂ ਦੀ ਬੇਟੀ ਖੁਦ ਨੂੰ ਕੋਈ ਨੁਕਸਾਨ ਨਾ ਪਹੁੰਚਾ ਲਵੇ, ਕਿਉਂਕਿ ਉਹ ਡਿਪਰੈਸ਼ਨ 'ਚ ਸੀ। ਪੁਲਸ ਮੁਤਾਬਕ ਹੱਨਾ ਦੀਆਂ ਹਰਕਤਾਂ ਅਪਰਾਧੀਆਂ ਵਰਗੀਆਂ ਸਨ। ਇਸ ਤੋਂ ਪੁਲਸ ਨੂੰ ਗਲਤੀ ਹੋ ਗਈ ਅਤੇ ਇਹ ਘਟਨਾ ਵਾਪਰੀ।