ਚੰਡੀਗੜ੍ਹ, 13 ਜੁਲਾਈ (ਪੋਸਟ ਬਿਊਰੋ)- ਕੇਂਦਰ ਸਰਕਾਰ ਵੱਲੋਂ ਪਾਬੰਦੀ ਸ਼ੁਦਾ ਐਲਾਨ ਕੀਤੀ ਸਿਖਸ ਫਾਰ ਜਸਟਿਸ ਦੇ ਬੁਲਾਰੇ ਗੁਰਪਤਵੰਤ ਸਿੰਘ ਪਨੂੰ ਦੇ ਖਿਲਾਫ ਪੰਜਾਬ ਵਿੱਚ ਕਈ ਕੇਸ ਮੋਹਾਲੀ ਅਤੇ ਬਟਾਲਾ ਵਿੱਚ ਕੇਸ ਦਰਜ ਕੀਤੇ ਹੋਏ ਹਨ। ਬਟਾਲਾ ਪੁਲਸ ਇੱਕ ਕੇਸ ਵਿੱਚ ਪਨੂੰ ਨੂੰ ਅਦਾਲਤ ਤੋਂ ਭਗੌੜਾ ਕਰਾਰ ਦਿਵਾ ਚੁੱਕੀ ਹੈ। ਉਸ ਦੇ ਖਿਲਾਫ ਪੰਜਾਬ 'ਚ ਖਾਲਿਸਤਾਨੀ ਸਰਗਰਮੀਆਂ ਨੂੰ ਹੱਲਾਸ਼ੇਰੀ ਦੇਣ ਅਤੇ ਰੈਫਰੰਡਮ 2020 ਦੇ ਪੋਸਟਰ ਲਵਾਉਣ ਸਣੇ ਕਈ ਦੋਸ਼ਾਂ ਹੇਠ ਕੇਸ ਦਰਜ ਹਨ। ਰੈਫਰੰਡਮ 2020 ਦੇ ਸੰਬੰਧ ਵਿੱਚ ਅਮਰੀਕਾ ਰਹਿੰਦਾ ਪਨੂੰ ਕਈ ਵਾਰ ਪੰਜਾਬ ਦੇ ਮੁੱਖ ਮਤੰਰੀ ਅਮਰਿੰਦਰ ਸਿੰਘ ਅਤੇ ਪੰਜਾਬ ਦੇ ਪੁਲਸ ਮੁਖੀ (ਡੀ ਜੀ ਪੀ) ਨੂੰ ਸੋਸ਼ਲ ਮੀਡੀਆ 'ਤੇ ਧਮਕੀਆਂ ਦੇ ਚੁੱਕਾ ਹੈ।
ਸਮਝਿਆ ਜਾਂਦਾ ਹੈ ਕਿ ਇਸ ਸੰਸਥਾ ਨਾਲ ਜੁੜੇ ਹੋਏ ਲੋਕ ਸਿੱਖ ਨੌਜਵਾਨਾਂ ਨੂੰ ਗਲਤ ਇਤਿਹਾਸਕ ਹਵਾਲੇ ਦੇ ਕੇ ਭੜਕਾਉਂਦੇ ਹਨ। ਪੰਜਾਬ ਪੁਲਸ ਦੇ ਰਿਕਾਰਡ ਮੁਤਾਬਕ ਗੁਰਪਤਵੰਤ ਸਿੰਘ ਪਨੂੰ ਦੇ ਖਿਲਾਫ ਪਹਿਲਾ ਕੇਸ ਜੂਨ 2017 ਵਿੱਚ ਮੋਹਾਲੀ ਪੁਲਸ ਨੇ ਰਾਇਸ਼ੁਮਾਰੀ 2020 ਬਾਰੇ ਪੰਜਾਬ ਵਿੱਚ ਚਾਲੀ ਥਾਵਾਂ 'ਤੇ ਖਾਲਿਸਤਾਨ ਪੱਖੀ ਪੋਸਟਰ ਲਾਉਣ ਨੂੰ ਲੈ ਕੇ ਦਰਜ ਕੀਤਾ ਸੀ। ਇਸ ਕੇਸ ਵਿੱਚ ਪੰਨੂ ਸਣੇ ਪੰਜ ਅਨਸਰ ਨਾਮਜ਼ਦ ਕੀਤੇ ਗਏ ਸਨ, ਜਿਨ੍ਹਾਂ ਵਿੱਚੋਂ ਜਗਦੀਪ ਸਿੰਘ ਤੇ ਜਗਜੀਤ ਸਿੰਘ ਨਿਊ ਯਾਰਕ ਵਿੱਚ ਰਹਿੰਦੇ ਹਨ।
ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਜੁਲਾਈ 2016 ਵਿੱਚ ਜਦੋਂ ਕੈਪਟਨ ਅਮਰਿੰਦਰ ਸਿੰਘ ਕੈਨੇਡਾ ਤੇ ਅਮਰੀਕਾ ਦੌਰੇ ਉੱਤੇ ਗਏ ਤਾਂ ਉਨ੍ਹਾਂ ਦੇ ਵਿਰੋਧ ਵਿੱਚ ਸਿੱਖਸ ਫਾਰ ਜਸਟਿਸ (ਐੱਸ ਐੱਫ ਜੇ) ਨੇ ਮਾਣਹਾਨੀ ਦਾ ਕੇਸ ਦਾਇਰ ਕੀਤਾ ਸੀ। ਗੁਰਪਤਵੰਤ ਸਿੰਘ ਪਨੂੰ ਅਤੇ ਦੋ ਹੋਰਨਾਂ ਦੇ ਵਿਰੁੱਧ ਪੰਜਾਬ ਵਿੱਚ ਬਟਾਲਾ ਦੀ ਪੁਲਸ ਨੇ ਅਪ੍ਰੈਲ 2018 ਵਿੱਚ ਰੈਫਰੰਡਮ 2020 ਦੇ ਖਾਲਿਸਤਾਨ ਪੱਖੀ ਪੋਸਟਰ ਲਾਉਣ ਦੇ ਦੋਸ਼ਾਂ ਹੇਠ ਇੱਕ ਹੋਰ ਕੇਸ ਦਰਜ ਕੀਤਾ ਸੀ। ਐੱਸ ਐੱਫ ਜੇ ਦਾ ਨਾਂਅ ਨਿਰੰਕਾਰੀ ਭਵਨ ਰਾਜਾਸਾਂਸੀ (ਅੰਮ੍ਰਿਤਸਰ) ਵਿੱਚ ਪਿਛਲੇ ਸਾਲ ਨਵੰਬਰ ਵਿੱਚ ਹੋਏ ਹੈਂਡ ਗ੍ਰਨੇਡ ਹਮਲੇ ਦੀ ਜਾਂਚ ਦੌਰਾਨ ਵੀ ਸਾਹਮਣੇ ਆਇਆ ਸੀ। ਇਸ ਤੋਂ ਇਲਾਵਾ ਪਟਿਆਲਾ ਵਿੱਚ ਦੀਵਾਲੀ ਤੋਂ ਪਹਿਲਾਂ ਨੌਜਵਾਨ ਕੋਲੋਂ ਮਿਲੇ ਹੈਂਡ ਗਰਨੇਡ ਦੇ ਮਾਮਲੇ ਦੀ ਜਾਂਚ ਦੌਰਾਨ ਪੁਲਸ ਨੂੰ ਐੱਸ ਐੱਫ ਜੇ ਖਿਲਾਫ ਸ਼ੱਕੀ ਸੁਰਾਗ ਮਿਲੇ ਸਨ। ਪਿਛਲੇ ਸਾਲ 2018 ਨਵੰਬਰ ਦੌਰਾਨ ਗੁਰਪਤਵੰਤ ਸਿੰਘ ਪਨੂੰ ਨੂੰ ਪੰਜਾਬ ਪੁਲਸ ਨੇ ਬਟਾਲਾ ਕੇਸ ਦੇ ਸੰਬੰਧ ਵਿੱਚ ਅਦਾਲਤ ਤੋਂ ਭਗੌੜਾ ਕਰਾਰ ਦਿਵਾ ਦਿੱਤਾ ਸੀ। ਪੰਜਾਬ ਸਰਕਾਰ ਨੇ ਸੀ ਬੀ ਆਈ ਨੂੰ ਸਾਰੇ ਕੇਸਾਂ ਦਾ ਚਿੱਠਾ ਸੌਂਪ ਕੇ ਇਸ ਦੇ ਖਿਲਾਫ ਰੈੱਡ ਕਾਰਨਰ ਨੋਟਿਸ ਜਾਰੀ ਕਰਾਉਣ ਲਈ ਕਿਹਾ ਸੀ। ਨਾਭਾ ਜੇਲ੍ਹ ਬਰੇਕ ਕਾਂਡ ਦੇ ਦੋਸ਼ੀ ਰਮਨਜੀਤ ਸਿੰਘ ਰੋਮੀ ਨੂੰ ਪੰਜਾਬ ਪੁਲਸ ਨੇ ਹਾਂਗਕਾਂਗ ਪੁਲਸ ਦੀ ਮਦਦ ਨਾਲ ਜਦੋਂ ਕਾਬੂ ਕੀਤਾ ਤਾਂ ਗੁਰਪਤਵੰਤ ਸਿੰਘ ਪੰਨੂ ਉਥੇ ਵਕੀਲ ਵਜੋਂ ਰੋਮੀ ਦੀ ਮਦਦ ਕਰਨ ਗਿਆ ਸੀ। ਇਸ ਤੋਂ ਬਿਨਾ ਇਸ ਨੇ ਰਾਸ਼ਟਰੀ ਸਿੱਖ ਸੰਗਤ ਪੰਜਾਬ ਦੇ ਪ੍ਰਧਾਨ ਰੁਲਦਾ ਸਿੰਘ ਦੇ ਕਤਲ ਕੇਸ ਦੇ ਦੋਸ਼ੀ ਪਰਮਜੀਤ ਸਿੰਘ ਪੰਮਾ ਦੀ ਪੁਰਤਗਾਲ ਤੋਂ ਭਾਰਤ ਨੂੰ ਹਵਾਲਗੀ ਦਾ ਵਿਰੋਧ ਕੀਤਾ ਤੇ ਪੁਰਤਗਾਲ ਵਿੱਚ ਜਾ ਕੇ ਉਸ ਦੀ ਮਦਦ ਕੀਤੀ ਸੀ। ਪੰਜਾਬ ਪੁਲਸ ਵੱਲੋਂ ਗੁਰਪਤਵੰਤ ਸਿੰਘ ਪਨੂੰ ਖਿਲਾਫ ਤਿਆਰ ਕੀਤੇ ਡੋਜ਼ੀਅਰ ਮੁਤਾਬਕ ਕੇਂਦਰੀ ਖੁਫੀਆ ਏਜੰਸੀ ਕੋਲ ਪੁਖਤਾ ਤੱਥ ਹਨ ਕਿ ਉਹ ਪਾਕਿਸਤਾਨੀ ਏਜੰਸੀ ਦੇ ਸੰਪਰਕ ਵਿੱਚ ਹੈ। ਪੰਜਾਬ ਪੁਲਸ ਦੀ ਰਿਪੋਰਟ ਅਤੇ ਮਜ਼ਬੂਤ ਦਾਅਵੇ ਉਤੇ ਕੇਂਦਰੀ ਸੁਰੱਖਿਆ ਏਜੰਸੀਆਂ ਨੇ ਭਾਰਤ ਵਿੱਚ ਪਨੂੰ ਦੀ ਵੈੱਬਸਾਈਟ, ਫੇਸਬੁਕ ਅਕਾਊਂਟ, ਵਟਸਐਪ ਅਤੇ ਟਵਿੱਟਰ ਅਕਾਊਂਟ ਵਗੈਰਾ ਬੰਦ ਕਰਵਾ ਦਿੱਤਾ ਸੀ।