ਹਵਾਈ, 11 ਜੁਲਾਈ (ਪੋਸਟ ਬਿਊਰੋ) : ਆਸਟੇਲੀਆ ਜਾ ਰਹੀ ਏਅਰ ਕੈਨੇਡਾ ਦੀ ਫਲਾਈਟ ਨੂੰ ਜ਼ਬਰਦਸਤ ਟਰਬੂਲੈਂਸ ਵਿੱਚੋਂ ਲੰਘਣ ਕਾਰਨ ਹਵਾਈ ਵਿੱਚ ਐਮਰਜੰਸੀ ਲੈਂਡਿੰਗ ਕਰਨੀ ਪਈ। ਇਸ ਦੌਰਾਨ ਦਰਜਨਾਂ ਯਾਤਰੀ ਜ਼ਖ਼ਮੀ ਹੋ ਗਏ।
ਹੋਨੋਲੂਲੂ ਵਿੱਚ ਸਿਹਤ ਅਧਿਕਾਰੀਆਂ ਨੇ ਆਖਿਆ ਕਿ ਜਹਾਜ਼ ਵਿੱਚ ਸਵਾਰ 37 ਵਿਅਕਤੀਆਂ ਨੂੰ ਇਸ ਹਾਦਸੇ ਵਿੱਚ ਸੱਟਾਂ ਲੱਗੀਆਂ। ਇਨ੍ਹਾਂ ਵਿੱਚੋਂ ਨੌਂ ਦੀ ਹਾਲਤ ਗੰਭੀਰ ਹੈ। ਫਲਾਈਟ ਦੇ ਅਮਲੇ ਸਮੇਤ ਤੀਹ ਵਿਅਕਤੀਆਂ ਨੂੰ ਲੋਕਲ ਹਸਪਤਾਲ ਲਿਜਾਇਆ ਗਿਆ। ਜਹਾਜ਼ ਵਿੱਚ ਸਵਾਰ ਯਾਤਰੀਆਂ ਵੱਲੋਂ ਦੱਸਿਆ ਗਿਆ ਕਿ ਕੁੱਝ ਸੈਕਿੰਡ ਦੀ ਚੇਤਾਵਨੀ ਤੋਂ ਬਾਅਦ ਅਚਾਨਕ ਹੀ ਜਹਾਜ਼ ਹੇਠਾਂ ਡਿੱਗਣ ਲੱਗਿਆ ਤੇ ਯਾਤਰੀ ਤੇ ਅਮਲਾ ਮੈਂਬਰ ਇੱਧਰ ਉੱਧਰ ਤੇ ਛੱਤ ਨਾਲ ਟਕਰਾਉਣ ਲੱਗੇ।
ਏਅਰ ਕੈਨੇਡਾ ਨੇ ਦੱਸਿਆ ਕਿ ਇਹ ਜਹਾਜ਼ ਵੈਨਕੂਵਰ ਤੋਂ ਸਿਡਨੀ ਜਾ ਰਿਹਾ ਸੀ ਜਦੋਂ ਵੀਰਵਾਰ ਸਵੇਰੇ ਹਵਾਈ ਦੇ ਪੱਛਮ ਵੱਲੋਂ ਜ਼ਬਰਦਸਤ ਟਰਬੂਲੈਂਸ ਵਿੱਚ ਫਸ ਗਿਆ। ਫਿਰ ਅਚਾਨਕ ਹੀ ਫਲਾਈਟ ਏਸੀ033 ਹੋਨੋਲੂਲੂ ਦੇ ਡੇਨੀਅਲ ਕੇ ਇਨੋਯੂਏ ਇੰਟਰਨੈਸ਼ਨਲ ਏਅਰਪੋਰਟ ਉੱਤੇ ਰੁਕੀ ਜਿੱਥੇ ਛੇ ਐਂਬੂਲੈਂਸਾਂ ਤੇ 50 ਫਰਸਟ ਰਿਸਪਾਂਡਰਜ਼ ਮੌਕੇ ਉੱਤੇ ਪਹੁੰਚੇ ਹੋਏ ਸਨ। ਜਹਾਜ਼ ਵਿੱਚ ਸਵਾਰ ਯਾਤਰੀ ਮਾਈਕਲ ਬੇਲੇ ਨੇ ਦੱਸਿਆ ਕਿ ਜਦੋਂ ਜਹਾਜ਼ ਟਰਬੂਲੈਂਸ ਵਿੱਚ ਫਸਿਆ ਤਾਂ ਬਹੁਤ ਸਾਰੇ ਲੋਕ ਛੱਤ ਨਾਲ ਜਾ ਟਕਰਾਏ ਤੇ ਉਨ੍ਹਾਂ ਚੀਕਾਂ ਮਾਰਨੀਆਂ ਸੁ਼ਰੂ ਕਰ ਦਿੱਤੀਆਂ। ਉਨ੍ਹਾਂ ਦੱਸਿਆ ਕਿ ਕੈਪਟਨ ਨੇ ਟਰਬੂਲੈਂਸ ਵਿੱਚ ਫਸਣ ਤੋਂ ਕੁੱਝ ਸੈਕਿੰਡ ਪਹਿਲਾਂ ਹੀ ਯਾਤਰੀਆਂ ਨੂੰ ਚੇਤਾਵਨੀ ਦਿੱਤੀ ਸੀ।
ਉਨ੍ਹਾਂ ਦੱਸਿਆ ਕਿ ਜਹਾਜ਼ 100 ਫੁੱਟ ਦੇ ਨੇੜੇ ਤੇੜੇ ਹੇਠਾਂ ਡਿੱਗਿਆ ਹੋਵੇਗਾ ਕਿਉਂਕਿ ਸਾਰੇ ਜ਼ੋਰ ਨਾਲ ਉੱਪਰ ਸੀਲਿੰਗ ਨਾਲ ਜਾ ਟਕਰਾਏ। ਬਹੁਤ ਹੀ ਡਰਾਵਣੀ ਘੜੀ ਸੀ। ਯਾਤਰੀਆਂ ਨੇ ਦੱਸਿਆ ਕਿ ਇੰਜ ਲੱਗ ਰਿਹਾ ਸੀ ਜਿਵੇਂ ਜਹਾਜ਼ ਕਰੈਸ਼ ਹੋਣ ਜਾ ਰਿਹਾ ਹੈ। ਹੋਨੋਲੂਲੂ ਐਮਰਜੰਸੀ ਸਰਵਿਸਿਜ਼ ਡਿਪਾਰਟਮੈਂਟ ਦੇ ਡਾਇਰੈਕਟਰ ਜਿੰਮ ਹੋਵੇ ਨੇ ਆਖਿਆ ਕਿ ਇਸ ਘਟਨਾ ਵਿੱਚ ਕਿਸੇ ਦੀ ਜਾਨ ਨਹੀਂ ਗਈ ਜੋ ਕਿ ਚੰਗੀ ਗੱਲ ਹੈ।