ਖੰਨਾ, 10 ਜੁਲਾਈ (ਪੋਸਟ ਬਿਊਰੋ)- ਜੀ ਟੀ ਰੋਡ ਖੰਨਾ ਵਾਲੇ ਪੁਲ ਉੱਤੇ ਲੋਹੇ ਦੀਆਂ ਪਾਈਪਾਂ ਨਾਲ ਭਰੀ ਟਰਾਲੀ ਅਤੇ ਕੈਂਟਰ ਦੀ ਟੱਕਰ ਵਿੱਚ ਦੋ ਮਜ਼ਦੂਰਾਂ ਦੀ ਮੌਤ ਹੋ ਗਈ ਤੇ ਕੈਂਟਰ ਚਾਲਕ ਗੰਭੀਰ ਜ਼ਖਮੀ ਹੋ ਗਿਆ। ਮ੍ਰਿਤਕਾਂ ਦੀ ਸ਼ਨਾਖਤ ਰਾਕੇਸ਼ ਕੁਮਾਰ (45) ਵਾਸੀ ਸੰਗਤਪੁਰਾ ਅਤੇ ਗੇਜੀ (19) ਵਾਸੀ ਪਾਇਲ ਵਜੋਂ ਹੋਈ ਹੈ।
ਪਤਾ ਲੱਗਾ ਹੈ ਕਿ ਸੰਦੀਪ ਸਿੰਘ (23) ਵਾਸੀ ਪਾਇਲ ਨੈਸਲੇ ਕੰਪਨੀ ਦਾ ਕੈਂਟਰ ਚਲਾਉਂਦਾ ਅਤੇ ਗੇਜੀ ਉਸ ਨਾਲ ਕਲੀਨਰ ਦਾ ਕੰਮ ਕਰਦਾ ਸੀ। ਕੱਲ੍ਹ ਉਹ ਮੋਹਾਲੀ ਵਿਖੇ ਗੱਡੀ ਖਾਲੀ ਕਰ ਕੇ ਆ ਰਹੇ ਸਨ ਕਿ ਜੀ ਟੀ ਰੋਡ ਡਾਕਘਰ ਖੰਨਾ ਨੇੜੇ ਅੱਗੇ ਜਾਂਦੀ ਲੋਹੇ ਦੇ ਪਾਈਪਾਂ ਨਾਲ ਭਰੀ ਟਰਾਲੀ ਨਾਲ ਉਨ੍ਹਾਂ ਦੀ ਟੱਕਰ ਹੋ ਗਈ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਪਾਈਪਾਂ ਉੱਤੇ ਬੈਠਾ ਮਜ਼ਦੂਰ ਰਾਕੇਸ਼ ਕੁਮਾਰ ਕੈਂਟਰ ਅਤੇ ਲੋਹੇ ਦੀਆਂ ਪਾਈਪਾਂ ਵਿਚਾਲੇ ਪੀਸਿਆ ਗਿਆ। ਓਧਰ ਕੈਂਟਰ ਚਾਲਕ ਤੇ ਕਲੀਨਰ ਵੀ ਬੁਰੀ ਤਰ੍ਹਾਂ ਫਸ ਗਏ, ਜਿਨ੍ਹਾਂ ਨੂੰ ਰਾਹਗੀਰਾਂ ਨੇ ਮੁਸ਼ਕਲ ਨਾਲ ਕੱਢਿਆ। ਇਸ ਦੌਰਾਨ ਕਲੀਨਰ ਗੇਜੀ ਦੀ ਮੌਤ ਹੋ ਗਈ। ਕੈਂਟਰ ਡਰਾਈਵਰ ਸੰਦੀਪ ਦੀ ਨਾਜ਼ੁਕ ਹਾਲਤ ਕਾਰਨ ਉਸ ਨੂੰ ਸਿਵਲ ਹਸਪਤਾਲ ਲਿਆਂਦਾ ਗਿਆ, ਜਿੱਥੋਂ ਉਸ ਨੂੰ ਚੰਡੀਗੜ੍ਹ ਭੇਜ ਦਿੱਤਾ ਗਿਆ। ਹਾਦਸੇ ਦੀ ਸੂਚਨਾ ਉੱੇ ਸਿਟੀ ਥਾਣਾ ਦੋ ਤੋਂ ਸਹਾਇਕ ਥਾਣੇਦਾਰ ਜਗਦੇਵ ਸਿੰਘ ਮੌਕੇ 'ਤੇ ਪਹੁੰਚੇ ਅਤੇ ਹਾਦਸੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।