ਚੰਡੀਗੜ੍ਹ, 10 ਜੁਲਾਈ (ਪੋਸਟ ਬਿਊਰੋ)- ਹਰਿਆਣਾ ਵਿੱਚ ਸੜਕ ਹਾਦਸੇ ਘੱਟ ਹੋਣ ਦਾ ਨਾਂਅ ਨਹੀਂ ਲੈ ਰਹੇ। ਔਸਤਨ ਰੋਜ਼ ਸੜਕ ਹਾਦਸਿਆਂ ਵਿੱਚ 14 ਲੋਕਾਂ ਦੀ ਮੌਤ ਹੋ ਜਾਂਦੀ ਅਤੇ 29 ਲੋਕ ਜ਼ਖਮੀ ਹੋ ਰਹੇ ਹਨ।
ਪਿਛਲੇ ਛੇ ਮਹੀਨੇ ਵਿੱਚ ਹਰਿਆਣਾ ਵਿੱਚ ਸੜਕ ਹਾਦਸਿਆਂ ਵਿੱਚ 2532 ਲੋਕਾਂ ਦੀ ਮੌਤ ਹੋ ਗਈ ਅਤੇ 4638 ਲੋਕ ਜ਼ਖਮੀ ਹੋ ਗਏ। ਸਭ ਤੋਂ ਵੱਧ ਸੜਕ ਹਾਦਸਿਆਂ ਵਿੱਚ ਮਰਨ ਵਾਲੇ ਗੁੜਗਾਓਂ ਦੇ 211 ਲੋਕ ਸ਼ਾਮਲ ਹਨ, ਜਦ ਕਿ ਕਰੀਬ 399 ਲੋਕ ਜ਼ਖਮੀ ਹੋਏ ਸਨ। ਛੇ ਮਹੀਨਿਆਂ ਵਿੱਚ 5491 ਕੇਸ ਦਰਜ ਕੀਤੇ ਗਏ ਹਨ। ਉਂਜ ਹਰਿਆਣਾ ਵਿੱਚ ਛੇ ਮਹੀਨੇ ਵਿੱਚ ਸੜਕ ਹਾਦਸਿਆਂ ਵਿੱਚ ਤੀਹ ਫੀਸਦੀ ਕਮੀ ਆਈ ਹੈ, ਪਰ ਹਾਦਸਿਆਂ ਵਿੱਚ ਸੋਚਣ ਦਾ ਵਿਸ਼ਾ ਇਹ ਹੈ ਕਿ 54 ਫੀਸਦੀ ਯੁਵਾ ਇਨ੍ਹਾਂ ਹਾਦਸਿਆਂ ਦਾ ਸ਼ਿਕਾਰ ਹੋਏ ਹਨ। ਸ਼ਾਮ ਚਾਰ ਵਜੇ ਤੋਂ ਰਾਤ 12 ਵਜੇ ਤੱਕ ਸੜਕ ਹਾਦਸੇ ਵੱਧ ਹੁੰਦੇ ਹਨ। ਸਰਕਾਰ ਨੇ ਫੈਸਲਾ ਕੀਤਾ ਹੈ ਜਿੱਥੇ ਵੀ ਹਾਦਸਾ ਹੋਵੇ, ਉਥੇ ਪੀ ਸੀ ਆਰ ਪਹੁੰਚੇਗੀ ਅਤੇ ਸਾਈਨ ਬੋਰਡ 150 ਮੀਟਰ ਪਹਿਲਾਂ ਰੱਖਿਆ ਜਾਏਗਾ, ਤਾਂ ਕਿ ਆਉਣ ਵਾਲੇ ਵਾਹਨ ਚਾਲਕਾਂ ਨੂੰ ਰੋਡ ਵਿਚਾਲੇ ਖੜ੍ਹੇ ਵਾਹਨ ਦਾ ਪਤਾ ਚੱਲ ਸਕੇ। ਟਰੈਫਿਕ ਆਈ ਜੀ ਡਾਕਟਰ ਰਾਜਸ੍ਰੀ ਸਿੰਘ ਦੇ ਅਨੁਸਾਰ ਸੂਬੇ ਵਿੱਚ ਸਾਲ 2018 ਵਿੱਚ ਜਿੱਥੇ ਛੇ ਮਹੀਨੇ ਵਿੱਚ 5793 ਕੇਸ ਦਰਜ ਹੋਏ ਸਨ, ਇਸ ਵਾਰ 5491 ਕੇਸ ਬਣੇ ਹਨ, ਜੋ ਪਿਛਲੇ ਸਾਲ ਦੇ ਮੁਕਾਬਲੇ 302 ਘੱਟ ਹਨ। ਪਿਛਲੇ ਸਾਲ ਇਸੇ ਸਮੇਂ ਵਿੱਚ 2641 ਲੋਕਾਂ ਦੀ ਸੜਕ ਹਾਦਸੇ ਵਿੱਚ ਮੌਤ ਹੋਈ ਸੀ, ਇਸ ਵਾਰ 2532 ਦੀ ਮੌਤ ਹੋਈ ਹੈ। ਪਿਛਲੇ ਸਾਲ ਛੇ ਮਹੀਨੇ ਵਿੱਚ 5082 ਲੋਕ ਜ਼ਖਮੀ ਹੋਏ ਸਨ, ਇਸ ਵਾਰ 4638 ਲੋਕ ਜ਼ਖਮੀ ਹੋਏ ਹਨ।