ਮੁੰਬਈ, 10 ਜੁਲਾਈ (ਪੋਸਟ ਬਿਊਰੋ)- ਆਪਣੀ ਟਿੱਪਣੀ ਬਾਰੇ ਆਲੋਚਨਾਵਾਂ ਦੀ ਸ਼ਿਕਾਰ ਹੋ ਰਹੀ ਅਭਿਨੇਤਰੀ ਸ਼ਬਾਨਾ ਆਜ਼ਮੀ ਨੇ ਕੱਲ੍ਹ ਆਲੋਚਕਾਂ ਨੂੰ ਜਵਾਬ ਦਿੰਦੇ ਹੋਏ ਧਾਰਮਿਕ ਕੱਟੜਪੰਥੀਆਂ 'ਤੇ ਨਿਸ਼ਾਨਾ ਸੇਧਿਆ। ਉਸ ਦੀ ਇਸ ਟਿੱਪਣੀ ਕਾਰਨੇ ਉਨ੍ਹਾਂ ਦੀ ਆਲੋਚਨਾ ਹੋ ਰਹੀ ਹੈ ਕਿ ਜੇ ਕੋਈ ਸਰਕਾਰ ਦੀ ਆਲੋਚਨਾ ਕਰੇ ਤਾਂ ਉਸ ਨੂੰ ਰਾਸ਼ਟਰ ਵਿਰੋਧੀ ਕਿਹਾ ਜਾਂਦਾ ਹੈ। ਉਨ੍ਹਾਂ ਨੇ ਛੇ ਜੁਲਾਈ ਨੂੰ ਇੰਦੌਰ ਦੀ ਇੱਕ ਮੀਟਿੰਗ ਨੂੰ ਸੰਬੋਧਨ ਕਰਦੇ ਹੋਏ ਇਹ ਗੱਲ ਕਹੀ ਸੀ।
ਸ਼ਬਾਨਾ ਆਜ਼ਮੀ ਨੇ ਆਪਣੀ ਟਿੱਪਣੀ 'ਤੇ ਹੋ ਰਹੇ ਹੰਗਾਮੇ ਉਤੇ ਕਿੰਤੂ ਕਰਦੇ ਹੋਏ ਲਿਖਿਆ, ‘ਮੇਰੀ ਇੱਕ ਟਿੱਪਣੀ ਨੂੰ ਲੈ ਕੇ ਇੰਨਾ ਹੰਗਾਮਾ? ਮੈਨੂੰ ਨਹੀਂ ਪਤਾ ਸੀ ਕਿ ਮੈਂ ਸੱਜੇ ਪੱਖੀਆਂ ਦੀ ਨਜ਼ਰ ਵਿੱਚ ਏਨਾ ਮਹੱਤਵ ਰੱਖਦੀ ਹਾਂ। ਦੀਪਾ ਮਹਿਤਾ ਦੀ ਫਿਲਮ ‘ਵਾਟਰ' ਦੇ ਲਈ ਮੇਰਾ ਸਿਰ ਮੁੰਨਾਉਣ ਉਤੇ ਮੇਰੇ ਖਿਲਾਫ ਮੁਸਲਮ ਕੱਟੜਪੰਥੀਆਂ ਨੇ ਫਤਵਾ ਜਾਰੀ ਕੀਤਾ ਸੀ, ਜਿਸ ਉੱਤੇ ਜਾਵੇਦ ਅਖਤਰ ਦਾ ਜਵਾਬ ਸੀ ‘ਚੁੱਪ ਰਹੋ'। ਸ਼ਾਬਾਨਾ ਨੇ ਕਿਹਾ ਕਿ ਮੈਂ ਲੋਕਾਂ ਨੂੰ ਯਾਦ ਦਿਵਾਉਣਾ ਚਾਹੁੰਦੀ ਹਾਂ ਕਿ ਮੇਰੇ ਪਿਤਾ ਕੈਫੀ ਆਜ਼ਮੀ ਨੇ ਉੱਤਰ ਪ੍ਰਦੇਸ਼ ਦੇ ਇੱਕ ਮੰਤਰੀ ਦੇ ਇਸ ਬਿਆਨ ਦੇ ਵਿਰੋਧ ਵਿੱਚ ਕਾਂਗਰਸ ਦੇ ਕੇਂਦਰ ਸਰਕਾਰ ਵੇਲੇ ਆਪਣਾ ਪਦਮਸ੍ਰੀ ਸਨਮਾਨ ਵਾਪਸ ਕੀਤਾ ਸੀ ਕਿ ਉਰਦੂ ਨੂੰ ਦੂਸਰੀ ਭਾਸ਼ਾ ਦਾ ਦਰਜਾ ਦਿਵਾਉਣ ਦੀ ਮੰਗ ਕਰਨ ਵਾਲਿਆਂ ਦਾ ਮੂੰਹ ਕਾਲਾ ਕਰ ਕੇ ਗਧੇ 'ਤੇ ਘੁਮਾਉਣਾ ਚਾਹੀਦਾ ਹੈ।
ਬੀਤੇ ਸ਼ਨੀਵਾਰ ਸ਼ਬਾਨਾ ਆਜ਼ਮੀ ਨੇ ਕਿਸੇ ਰਾਜਨੀਤਕ ਦਲ ਜਾਂ ਵਿਚਾਰਧਾਰਾ ਦਾ ਨਾਂਅ ਲਏ ਬਿਨਾਂ ਕਿਹਾ ਸੀ ਕਿ ਲੋਕਾਂ ਨੂੰ ਰਾਸ਼ਟਰ ਹਿੱਤ ਵਿੱਚ ਆਪਣੇ ਮਨ ਦੀ ਗੱਲ ਕਹਿਣ ਤੋਂ ਡਰਨਾ ਨਹੀਂ ਚਾਹੀਦਾ।