ਪ੍ਰਿੰਸ ਜੌਰਜ, ਬੀਸੀ, 10 ਅਕਤੂਬਰ (ਪੋਸਟ ਬਿਊਰੋ) : ਗੈਸ ਪਾਈਪਲਾਈਨ ਫਟ ਜਾਣ ਕਾਰਨ ਇਲਾਕਾ ਖਾਲੀ ਕਰਵਾਏ ਜਾਣ ਮਗਰੋਂ ਸਥਿਤੀ ਕਾਬੂ ਵਿੱਚ ਆਉਣ ਮਗਰੋਂ ਬੀਸੀ ਦੀ ਉੱਤਰੀ ਕਮਿਊਨਿਟੀ ਦੇ ਮੈਂਬਰਾਂ ਨੂੰ ਵਾਪਿਸ ਆਪਣੇ ਘਰਾਂ ਵਿੱਚ ਆਉਣ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ। ਇਹ ਪਾਈਪਲਾਈਨ ਫਟਣ ਕਾਰਨ ਇੱਥੇ ਜ਼ਬਰਦਸਤ ਅੱਗ ਲੱਗ ਗਈ ਸੀ।
ਆਰਸੀਐਮਪੀ ਦਾ ਕਹਿਣਾ ਹੈ ਕਿ ਧਮਾਕਾ ਮੰਗਲਵਾਰ ਸ਼ਾਮੀਂ 5:30 ਵਜੇ ਹੋਇਆ। ਜਿਸ ਕਾਰਨ ਨੇੜੇ ਹੀ ਸਥਿਤ ਲਹਿਦਲੀ ਤੈਨੇਹ ਫਰਸਟ ਨੇਸ਼ਨ ਦੇ 100 ਮੈਂਬਰਾਂ ਨੂੰ ਆਪਣੇ ਘਰ ਛੱਡਣ ਲਈ ਮਜਬੂਰ ਹੋਣਾ ਪਿਆ। ਅਧਿਕਾਰੀਆਂ ਨੇ ਦੱਸਿਆ ਕਿ ਇਹ ਪਾਈਪਲਾਈਨ ਪ੍ਰਿੰਸ ਜੌਰਜ ਤੋਂ 15 ਕਿਲੋਮੀਟਰ ਉੱਤਰਪੂਰਬ ਵਿੱਚ ਸਥਿਤ ਸ਼ੈਲੇ, ਬੀਸੀ ਵਿੱਚ ਸੀ। ਪੁਲਿਸ ਨੇ ਆਖਿਆ ਕਿ ਅਹਿਤਿਆਤ ਵਜੋਂ ਕਈ ਕਿਲੋਮੀਟਰ ਤੱਕ ਦਾ ਇਲਾਕਾ ਖਾਲੀ ਕਰਵਾ ਲਿਆ ਗਿਆ ਹੈ। ਪਰ ਹੁਣ ਸਥਾਨਕ ਵਾਸੀਆਂ ਨੂੰ ਘਰ ਪਰਤਣ ਦੀ ਇਜਾਜ਼ਤ ਦੇ ਦਿੱਤੀ ਗਈ ਹੈ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਪਾਈਪਲਾਈਨ ਤੋਂ ਇਲਾਵਾ ਹੋਰ ਕਿਸੇ ਕਿਸਮ ਦਾ ਕੋਈ ਨੁਕਸਾਨ ਨਹੀਂ ਹੋਇਆ। ਗੈਸ ਸਪਲਾਈ ਬੰਦ ਕਰ ਦਿੱਤੀ ਗਈ ਹੈ ਤੇ ਪੁਲਿਸ ਦਾ ਕਹਿਣਾ ਹੈ ਕਿ ਅੱਗ ਲੱਗਣ ਦੇ ਕਾਰਨਾਂ ਦਾ ਅਜੇ ਤੱਕ ਪਤਾ ਨਹੀਂ ਲੱਗ ਸਕਿਆ ਹੈ। ਨੈਸ਼ਨਲ ਐਨਰਜੀ ਬੋਰਡ ਦੇ ਬੁਲਾਰੇ ਟੌਮ ਨਿਊਫੈਲਡ ਨੇ ਆਖਿਆ ਕਿ ਅੱਗ ਐਨਬ੍ਰਿੱਜ ਦੇ ਵੈਸਟਕੋਸਟ ਦੀ ਮੇਨਲਾਈਨ ਦੇ ਨਾਲ ਲੱਗੀ। ਵੈਸਟਕੋਸਟ ਟਰਾਂਸਮਿਸ਼ਨ ਸਿਸਟਮ ਵੈਸਟਰਨ ਕੈਨੇਡੀਅਨ ਸੈਡੀਮੈਂਟਰੀ ਬੇਸਿਨ ਵਿੱਚ ਤਿਆਰ ਕੁਦਰਤੀ ਗੈਸ ਨੂੰ ਬੀਸੀ ਤੇ ਇੱਕਦੂਜੇ ਨਾਲ ਜੁੜੀਆਂ ਪਾਈਪਲਾਈਨਜ਼ ਰਾਹੀਂ ਕੈਨੇਡਾ ਦੇ ਹੋਰਨਾਂ ਪ੍ਰੋਵਿੰਸਾਂ ਤੇ ਅਮਰੀਕਾ ਵਿੱਚ ਭੇਜਦਾ ਹੈ। ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਕੀਤੀ ਜਾ ਰਹੀ ਹੈ।