ਮਿਸੀਸਾਗਾ, 8 ਜੁਲਾਈ (ਪੋਸਟ ਬਿਊਰੋ)- ਡੈਰੀ ਅਤੇ ਮੇਵਸ ਦੇ ਏਰੀਆ ਵਿਚ ਡੈਰੀ ਵਿਲੇਜ ਸੀਨੀਅਰ ਕਲੱਬ ਵਲੋਂ ਮੇਲਾ ਮਾਪਿਆਂ ਦਾ ਕਰਵਾ ਕੇ ਕੈਨੇਡਾ ਦਾ 152ਵਾਂ ਜਨਮ ਦਿਨ ਤੇ ਨਾਲ ਹੀ ਆਸਪਾਸ ਵਸ ਰਹੇ ਮਾਪਿਆਂ ਦਾ ਦਿਨ ਮਨਾਇਆ ਗਿਆ। ਹਰ ਸਾਲ ਇਸ ਪਾਰਕ ਵਿਚ ਹੋਣ ਵਾਲਾ ਇਹ ਪ੍ਰੋਗਰਾਮ ਇਸ ਇਲਾਕੇ ਦੀ ਪਹਿਚਾਣ ਬਣ ਚੁੱਕਿਆ ਹੈ। ਇਸ ਵਾਰ ਇਸ ਪੋ੍ਰਗਰਾਮ ਵਿਚ ਮਿਸੀਸਾਗਾ ਦੀ ਮੇਅਰ ਬੌਨੀ ਕ੍ਰਾਂਬੀ ਨੇ ਤੇ ਹੋਰ ਵੱਖ-ਵੱਖ ਆਗੂਆਂ ਨੇ ਸਿ਼ਰਕਤ ਕੀਤੀ ਅਤੇ ਆਏ ਸਾਰੇ ਮਹਿਮਾਨਾਂ ਨੂੰ ਜਿਥੇ ਵਧੀਆ ਪ੍ਰਬੰਧ ਕਰਨ ਲਈ ਮੁਬਾਰਕਵਾਦ ਦਿੱਤੀ, ਉਥੇ ਹੀ ਕੈਨੇਡਾ ਡੇ ਦੀਆ ਮੁਬਾਰਕਾਂ ਵੀ ਦਿੱਤੀਆਂ। ਕਲੱਬ ਵਲੋਂ ਇਕ ਮੰਗ ਪੱਤਰ ਮੇਅਰ ਬੌਨੀ ਕ੍ਰਾਂਬੀ ਨੂੰ ਸੌਪਿਆ ਗਿਆ, ਜਿਸ ਉਤੇ ਮੇਅਰ ਨੇ ਭਰੋਸਾ ਦਿਵਾਇਆ ਕਿ ਅਸੀ ਜਰੂਰ ਵਿਚਾਰਾਂ ਕਰਾਂਗੇ। ਪ੍ਰਬੰਧਕਾਂ ਵਿਚ ਗੁਰਦੇਵ ਸਿੰਘ ਸੀਲੋਪਾਲ, ਗੁਰਮੇਲ ਸਿੰਘ ਸੱਗੂ, ਪ੍ਰਧਾਨ ਮਹਿੰਦਰਾ ਮਿਨਹਾਸ, ਚੇਅਰਮੈਨ ਬਲਦੇਵ ਸਿੰਘ ਕੰਗ, ਅਜੀਤ ਸਿੰਘ ਬੈਂਸ, ਖਜਾਨਚੀ ਗੁਰਬਚਨ ਸਿੰਘ, ਸੁਰਿੰਦਰ ਸਿੰਘ ਸੰਧੂ, ਨਿਰਮਲ ਸਿੰਘ ਪੱਲ੍ਹਣ, ਜੋਧ ਸਿੰਘ ਭਲਵਾਨ, ਸੁਦਾਗਰ ਸਿੰਘ, ਗੁਰਪਿੰਦਰ ਸਿੰਘ ਦਰਸ਼ਕ, ਅਵਤਾਰ ਸਿੰਘ ਗਰੇਵਾਲ, ਹਰਜਿੰਦਰ ਸਿੰਘ ਧਾਲੀਵਾਲ ਤੇ ਕਰਨਲ ਹਰਭਜਨ ਸਿੰਘ ਸੰਧੂ ਨੇ ਅਹਿਮ ਰੋਲ ਨਿਭਾਇਆ। ਆਸਪਾਸ ਦੇ ਇਲਾਕੇ ਵਿਚੋਂ ਆਏ ਸਾਰੇ ਪਰਿਵਾਰਾਂ ਲਈ ਜਲੇਬੀਆਂ, ਪਕੌੜੇ, ਚਾਹ-ਪਾਣੀ ਦਾ ਖੂਬ ਬੰਦੋਬਸਤ ਕੀਤਾ ਗਿਆ ਤੇ ਵੱਖ-ਵੱਖ ਸੀਨੀਅਰ ਮੈਬਰਾਂ ਨੂੰ ਸ਼ਾਦੀ ਦੀ ਸਾਲਗਿਰਾਹ ਤੇ ਜਨਮ ਦਿਨ ਦੀ ਮੁਬਾਰਕਵਾਦ ਦੇ ਸਨਮਾਨ ਚਿੰਨ੍ਹ ਵੀ ਭੇਂਟ ਕੀਤੇ ਗਏ ਤੇ ਇਸ ਦੇ ਨਾਲ ਹੀ ਬੱਚਿਆਂ ਦੀਆਂ, ਬਜੁਰਗਾਂ ਦੀਆਂ ਅਤੇ ਹੋਰ ਮਨੋਰੰਜਨ ਭਰਪੂਰ ਆਈਟਮਾਂ ਵੀ ਕਰਵਾਈਆਂ ਗਈਆਂ।