ਬਰੈਂਪਟਨ, 5 ਜੁਲਾਈ (ਪੋਸਟ ਬਿਊਰੋ) : ਬਰੈਂਪਟਨ ਵਿੱਚ ਟਰਾਂਜਿ਼ਟ ਸਿਸਟਮ ਵਿੱਚ ਇੱਕ ਨਵੀਂ ਸਕਾਰਾਤਮਕ ਤਬਦੀਲੀ ਆਉਣ ਵਾਲੀ ਹੈ। ਬਰੈਂਪਟਨ ਕਾਊਂਸਲਰਜ਼ ਨਾਲ ਮੇਅਰ ਪੈਟ੍ਰਿਕ ਬ੍ਰਾਊਨ ਵੱਲੋਂ ਸੀਨੀਅਰਜ਼ ਲਈ 15 ਡਾਲਰ ਦਾ ਬਰੈਂਪਟਨ ਟਰਾਂਜਿ਼ਟ ਪਾਸ ਲਾਂਚ ਕੀਤਾ ਜਾ ਰਿਹਾ ਹੈ।
ਇਸ ਲਈ ਜੇ ਤੁਸੀਂ ਬਰੈਂਪਟਨ ਵਾਸੀ ਹੋਂ ਤੇ ਤੁਹਾਡੀ ਉਮਰ 65 ਸਾਲ ਜਾਂ ਇਸ ਤੋਂ ਵੱਧ ਹੈ ਤਾਂ ਤੁਸੀਂ 15 ਡਾਲਰ ਦੇ ਬਰੈਂਪਟਨ ਟਰਾਂਜਿ਼ਟ ਪਾਸ ਲਈ ਯੋਗ ਹੋਂ। ਇਸ ਪਾਸ ਦੀ ਸੇਲ 6 ਅਗਸਤ ਤੋਂ ਸ਼ੁਰੂ ਹੋ ਜਾਵੇਗੀ। ਇਹ ਪਾਸ ਬਰੈਂਪਟਨ ਟਰਾਂਜਿ਼ਟ ਟਰਮੀਨਲਜ਼ ਤੇ ਫੈਸਿਲਿਟੀਜ਼ ਉੱਤੇ ਉਪਲਬਧ ਹੋਵੇਗਾ। ਬਜ਼ੁਰਗ ਲੋਕ ਪਹਿਲੀ ਸਤੰਬਰ ਤੋਂ ਆਪਣੇ ਇਸ ਵਿਸ਼ੇਸ਼ ਪਾਸ ਦੀ ਵਰਤੋਂ ਕਰ ਸਕਣਗੇ। ਸਿਟੀ ਵੱਲੋਂ 5 ਜੁਲਾਈ ਨੂੰ ਸਵੇਰੇ 10:45 ਵਜੇ ਇਹ ਪਾਸ ਲਾਂਚ ਕੀਤਾ ਜਾਵੇਗਾ। ਇਸ ਈਵੈਂਟ ਦੀ ਮੇਜ਼ਬਾਨੀ ਫਲਾਵਰ ਸਿਟੀ ਕਮਿਊਨਿਟੀ ਕੈਂਪਸ ਦੇ ਸੀਨੀਅਰ ਸੈਂਟਰ ਵੱਲੋਂ ਕੀਤੀ ਜਾਵੇਗੀ, ਜੋ ਕਿ 8870 ਮੈਕਲਾਫਲਿਨ ਰੋਡ ਸਾਊਥ ਉੱਤੇ ਸਥਿਤ ਹੈ।
ਇਸ ਛੋਟ ਵਾਲੇ ਸੀਨੀਅਰਜ਼ ਪਾਸ ਤੋਂ ਬਾਅਦ ਸਿਟੀ ਬਰੈਂਪਟਨ ਦੇ ਸੀਨੀਅਰ ਵਾਸੀਆਂ ਲਈ ਫਰੀ ਫੇਅਰ ਪਾਸ ਲਾਗੂ ਕਰਨ ਬਾਰੇ ਵਿਚਾਰ ਕਰ ਰਹੀ ਹੈ। ਇਹ ਸਿਟੀ ਦੀ ਗ੍ਰੀਨ ਸਿਟੀ ਕੈਂਪੇਨ ਦਾ ਵੀ ਹਿੱਸਾ ਹੈ।