ਲੰਡਨ, 9 ਅਕਤੂਬਰ (ਪੋਸਟ ਬਿਊਰੋ)- ਜਲਵਾਯੂ ਪਰਿਵਰਤਨ ਬਾਰੇ ਦੁਨੀਆ ਦੀ ਸਭ ਤੋਂ ਵੱਡੀ ਸਮੀਖਿਆ ਰਿਪੋਰਟ ਵਿੱਚ ਭਾਰਤ ਲਈ ਵੱਡੀ ਚੇਤਾਵਨੀ ਦਿੱਤੀ ਗਈ ਅਤੇ ਦੱਸਿਆ ਗਿਆ ਹੈ ਕਿ ਜੇ ਦੁਨੀਆ ਦਾ ਤਾਪਮਾਨ ਦੋ ਡਿਗਰੀ ਸੈਲਸੀਅਸ ਵਧਦਾ ਹੈ ਤਾਂ ਭਾਰਤ ਨੂੰ 2015 ਵਾਂਗ ਜਾਨਲੇਵਾ ਗਰਮ ਹਵਾਵਾਂ ਦਾ ਸਾਹਮਣਾ ਕਰਨਾ ਪਵੇਗਾ, ਜਿਸ ਨਾਲ ਘੱਟ ਤੋਂ ਘੱਟ 2500 ਲੋਕ ਮਾਰੇ ਗਏ ਸਨ। ਇਹ ਰਿਪੋਰਟ ਕੱਲ੍ਹ ਕਲਾਈਮੇਟ ਚੇਂਜ 'ਤੇ ਇੰਟਰਗਵਰਨਮੈਂਟਲ ਪੈਨਲ (ਆਈ ਪੀ ਸੀ ਸੀ) ਵੱਲੋਂ ਜਾਰੀ ਕੀਤੀ ਗਈ ਹੈ।
ਇਕ ਸਟੱਡੀ ਅਨੁਸਾਰ ਭਾਰਤ ਦੇ ਚਾਰ ਵੱਡੇ ਮੈਟ੍ਰੋਜ ਦਿੱਲੀ, ਮੁੰਬਈ, ਚੇਨਈ ਤੇ ਕੋਲਕਾਤਾ ਦਾ ਔਸਤ ਤਾਪਮਾਨ ਪਿਛਲੇ 147 ਸਾਲਾਂ ਦੌਰਾਨ ਇਕ ਡਿਗਰੀ ਜਾਂ ਇਸ ਤੋਂ ਜ਼ਿਆਦਾ ਵਧਿਆ ਹੈ। ਇਸ ਸਾਲ ਦਸੰਬਰ ਵਿੱਚ ਪੋਲੈਂਡ ਵਿੱਚ ਕਲਾਈਮੇਟ ਚੇਂਜ ਉੱਤੇ ਹੋਣ ਵਾਲੀ ਬੈਠਕ ਵਿੱਚ ਰਿਪੋਰਟ ਦੇ ਅਨੁਮਾਨਾਂ 'ਤੇ ਚਰਚਾ ਹੋਵੇਗੀ। ਇਥੇ ਸਰਕਾਰਾਂ ਕਲਾਈਮੇਟ ਚੇਂਜ ਨੂੰ ਰੋਕਣ ਲਈ ਪੈਰਿਸ ਐਗਰੀਮੈਂਟ ਦੀ ਸਮੀਖਿਆ ਵੀ ਕਰੇਗੀ। ਸਭ ਤੋਂ ਵੱਡੇ ਕਾਰਬਨ ਪੈਦਾ ਕਰਨ ਵਾਲੇ ਦੇਸ਼ਾਂ ਵਿੱਚ ਹੋਣ ਦੀ ਵਜ੍ਹਾ ਨਾਲ ਭਾਰਤ ਇਸ ਗਲੋਬਲ ਇਵੈਂਟ ਵਿੱਚ ਅਹਿਮ ਕਿਰਦਾਰ ਨਿਭਾ ਸਕਦਾ ਹੈ। ਇਕ ਵਾਤਾਵਰਨ ਥਿੰਕ ਟੈਂਕ ਨੇ ਕੱਲ੍ਹ ਕਿਹਾ ਕਿ ਆਈ ਪੀ ਸੀ ਸੀ ਦੀ ਜਲਵਾਯੂ ਪਰਿਵਰਤਨ ਰਿਪੋਰਟ ਤੋਂ ਇਹ ਸਪੱਸ਼ਟ ਹੈ ਕਿ ਦੁਨੀਆ ਵਧੇ ਹੋਏ ਸਮੁੰਦਰ ਦੇ ਜਲ ਪੱਧਰ ਦੀ ਗਵਾਹ ਬਣੇਗੀ, ਸੋਕਾ, ਹੜ ਅਤੇ ਲੂ ਦਾ ਦੌਰ ਵਧੇਗਾ ਅਤੇ ਅਜਿਹੇ ਵਿੱਚ ਭਾਰਤ ਵਰਗੇ ਦੇਸ਼ ਜਿਥੇ ਵੱਡੀ ਆਬਾਦੀ ਖੇਤੀ ਖੇਤਰ ਨਾਲ ਜੁੜੀ ਹੈ, ਬੇਹੱਦ ਪ੍ਰਭਾਵਿਤ ਹੋਵੇਗੀ।