ਦੇਹਰਾਦੂਨ, 25 ਜੂਨ (ਪੋਸਟ ਬਿਊਰੋ)- ਉਤਰਾਖੰਡ ਦੇ ਓਲੀ ਕਸਬੇ ਵਿਚ 200 ਕਰੋੜ ਦੇ ਹਾਈ ਪ੍ਰੋਫਾਈਲ ਵਿਆਹ ਤੋਂ ਬਾਅਦ ਛੱਡੇ 4 ਟਨ ਕੂੜੇ ਨੂੰ ਸਾਫ਼ ਕਰਨ ਲਈ ਸੰਬੰਧਤ ਪਰਿਵਾਰ ਨੇ ਨਗਰ ਨਿਗਮ ਨੂੰ ਯੂਜ਼ਰ ਚਾਰਜ ਵਿਚ ਸਿਰਫ 54 ਹਜ਼ਾਰ ਰੁਪਏ ਦਿੱਤੇ ਹਨ। ਪਰਵਾਰ ਨੇ ਕੂੜੇ ਦੇ ਪ੍ਰਬੰਧ ਲਈ ਪੂਰਾ ਭੁਗਤਾਨ ਕਰਨ ਦੀ ਸਹਿਮਤੀ ਦਿੱਤੀ ਹੈ।
ਪਹਾੜੀ ਸ਼ਹਿਰ ਓਲੀ ਵਿਚ ਵਿਆਹ ਤੋਂ ਬਾਅਦ ਕੂੜੇ ਬਾਰੇ ਪਰਵਾਰ ਦੀ ਕਾਫ਼ੀ ਅਲੋਚਨਾ ਹੋਈ ਅਤੇ ਕੇਸ ਕੋਰਟ ਵਿਚ ਚਲਾ ਗਿਆ ਹੈ। ਨਗਰ ਪਾਲਿਕਾ ਦੇ ਪ੍ਰਧਾਨ ਸ਼ੈਲੇਂਦਰ ਪਵਾਰ ਨੇ ਕਿਹਾ ਕਿ ਗੁਪਤਾ ਪਰਵਾਰ ਨੇ ਯੂਜ਼ਰ ਚਾਰਜ ਦੇ 54 ਹਜ਼ਾਰ ਰੁਪਏ ਜਮ੍ਹਾਂ ਕਰਾਏ ਸਨ। ਹਾਲੇ 150 ਕੁਇੰਟਲ ਤੋਂ ਵੱਧ ਕੂੜੇ ਦੀ ਸਫ਼ਾਈ ਕੀਤੀ ਗਈ ਹੈ। ਸਾਰਾ ਕੰਮ ਹੋਣ ਪਿੱਛੋਂ ਮੈਨੁਅਲ ਲੇਬਰ ਤੇ ਵਾਹਨਾਂ ਸਮੇਤ ਖਰਚ ਦਾ ਬਿਲ ਬਣਾ ਕੇ ਉਨ੍ਹਾਂ ਨੂੰ ਭੇਜਿਆ ਜਾਵੇਗਾ। ਪਰਵਾਰ ਪੂਰੇ ਬਿਲ ਦਾ ਭੁਗਤਾਨ ਕਰਨ ਤੇ ਸਿਵਲ ਸੰਸਥਾ ਨੂੰ ਇਕ ਵਾਹਨ ਦੇਣਾ ਮੰਨ ਗਿਆ ਹੈ।
ਹਾਈ ਕੋਰਟ ਨੇ ਜ਼ਿਲ੍ਹਾ ਪ੍ਰਸ਼ਾਸਨ ਤੇ ਪ੍ਰਦੂਸ਼ਣ ਕੰਟਰੋਲ ਬੋਰਡ ਨੂੰ ਕੂੜੇ ਨਾਲ ਵਾਤਾਵਰਨ ਨੂੰ ਹੋਏ ਨੁਕਸਾਨ ਉੱਤੇ 7 ਜੁਲਾਈ ਤੱਕ ਰਿਪੋਰਟ ਦੇਣ ਨੂੰ ਕਿਹਾ ਹੈ। ਇਸ ਕੇਸ ਦੀ ਅਗਲੀ ਸੁਣਵਾਈ 8 ਜੁਲਾਈ ਨੂੰ ਹੈ। ਇਸ ਵਿਆਹ ਬਾਰੇ ਇਕ ਜਨਤਕ ਪਟੀਸ਼ਨ ਵੀ ਪੇਸ਼ ਹੋਈ ਸੀ, ਜਿਸ ਮੁਤਾਬਕ ਵਿਆਹ ਦੀਆਂ ਤਿਆਰੀਆਂ ਏਥੇ ਵਾਤਾਵਰਨ ਨੂੰ ਨੁਕਸਾਨ ਪੁਚਾ ਰਹੀਆਂ ਹਨ। ਇਸ ਵਿਆਹ ਵਿਚ ਕੈਟਰੀਨਾ ਕੈਫ ਤੇ ਬਾਬਾ ਰਾਮਦੇਵ ਵਰਗੀਆਂ ਕਈ ਹਸਤੀਆਂ ਹਾਜ਼ਰ ਹੋਈਆਂ ਅਤੇ ਇਸ ਵਿਆਹ ਉੱਤੇ ਆਏ ਮਹਿਮਾਨਾਂ ਨੂੰ ਲਿਆਉਣ ਤੇ ਛੱਡਣ ਲਈ ਕਿਰਾਏ ਉੱਤੇ ਹੈਲੀਕਾਪਟਰ ਲਏ ਗਏ ਸਨ।