ਬੁਲੰਦ ਸ਼ਹਿਰ, 25 ਜੂਨ (ਪੋਸਟ ਬਿਊਰੋ)- ਉੱਤਰ ਪ੍ਰਦੇਸ਼ ਦੇ ਬੁਲੰਦ ਸ਼ਹਿਰ ਦੇ ਚਾਂਦਪੁਰ ਪਿੰਡ ਵਿੱਚ ਛੇੜਛਾੜ ਦਾ ਵਿਰੋਧ ਕਰਨਾ ਇਕ ਪਰਵਾਰ ਨੂੰ ਮਹਿੰਗਾ ਪੈ ਗਿਆ। ਰਸੂਖਦਾਰਾਂ ਨੇ ਵਿਰੋਧ ਕਰਦੇ ਪਰਵਾਰ ਉੱਤੇ ਗੱਡੀ ਚੜ੍ਹਾ ਦਿੱਤੀ। ਇਸ ਘਟਨਾ ਵਿੱਚ ਪਰਵਾਰ ਦੀ 2 ਔਰਤਾਂ ਦੀ ਮੌਕੇ ਉੱਤੇ ਮੌਤ ਹੋ ਗਈ ਤੇ 2 ਦੀ ਹਾਲਤ ਗੰਭੀਰ ਹੈ। ਇਸ ਤੋਂ ਨਾਰਾਜ਼ ਪਰਵਾਰ ਅਤੇ ਪਿੰਡ ਵਾਸੀਆਂ ਨੇ ਹੰਗਾਮਾ ਕੀਤਾ ਅਤੇ ਲਾਸ਼ਾਂ ਨੂੰ ਸੜਕ ਉੱਤੇ ਰੱਖ ਕੇ ਪ੍ਰਦਰਸ਼ਨ ਕੀਤਾ।
ਪੁਲਿਸ ਦਾ ਕਹਿਣਾ ਹੈ ਕਿ ਬੀਤੀ ਸ਼ਾਮ ਜਦੋਂ ਘਟਨਾ ਵਾਪਰੀ ਤਾਂ ਪਰਵਾਰ ਨੇ ਟਰੱਕ ਨਾਲ ਦਰੜੇ ਜਾਣ ਦੀ ਸੂਚਨਾ ਦਿੱਤੀ ਸੀ। ਬਾਅਦ ਵਿੱਚ ਪਰਵਾਰ ਨੇ ਇਸ ਨੂੰ ਛੇੜਛਾੜ ਦੀ ਘਟਨਾ ਦਾ ਹਿੱਸਾ ਦੱਸ ਕੇ ਕਿਹਾ ਕਿ ਪਰਵਾਰ ਦੇ 4 ਮੈਂਬਰਾਂ ਉੱਤੇ ਕਾਰ ਚੜ੍ਹਾਈ ਗਈ ਹੈ। ਸ਼ੁਰੂ ਵਿੱਚ ਪੁਲਿਸ ਨੇ ਸੜਕ ਹਾਦਸੇ ਦਾ ਕੇਸ ਦਰਜ ਕੀਤਾ ਸੀ, ਇਸ ਦੇ ਬਾਅਦ ਕਿਹਾ ਹੈ ਕਿ ਉਹ ਦਲਿਤ ਪਰਵਾਰ ਉੱਤੇ ਗੱਡੀ ਚੜ੍ਹਾਉਣ ਦੇ ਦੋਸ਼ਾਂ ਦੀ ਜਾਂਚ ਕਰ ਰਹੇ ਹਨ। ਪੁਲਿਸ ਨੂੰ ਇਕ ਸੀ ਸੀ ਟੀ ਵੀ ਫ਼ੁਟੇਜ਼ ਮਿਲੀ ਹੈ, ਜਿਸ ਵਿੱਚ ਤੇਜ਼ ਰਫ਼ਤਾਰ ਕਾਰ ਸੜਕ ਉੱਤੇ ਜਾਂਦੀ ਵਿਖਾਈ ਦੇਂਦੀ ਹੈ ਤੇ ਉਸ ਦੇ ਪਿੱਛੇ ਲੋਕ ਭੱਜ ਰਹੇ ਹਨ।
ਮਿਲੀ ਜਾਣਕਾਰੀ ਮੁਤਾਬਕ ਪੀੜਤ ਪਰਵਾਰ ਦੀ ਲੜਕੀ ਨਾਲ ਪਿੰਡ ਦੇ ਲੜਕੇ ਨੇ ਛੇੜਛਾੜ ਕੀਤੀ ਸੀ। ਲੜਕੀ ਦੇ ਭਰਾ ਨੇ ਮੌਕੇ ਉੱਤੇ ਦੋਸ਼ੀ ਲੜਕੇ ਨੂੰ ਥੱਪੜ ਮਾਰ ਦਿੱਤੇ ਤਾਂ ਇਸ ਤੋਂ ਬਾਅਦ ਲੜਕਾ ਆਪਣੇ ਘਰ ਗਿਆ ਅਤੇ ਅਰਟਿਗਾ ਕਾਰ ਲੈ ਕੇ ਲੜਕੀ ਦੇ ਘਰ ਦੇ ਬਾਹਰ ਆ ਕੇ ਖੜਾ ਹੋ ਗਿਆ। ਜਦੋਂ ਲੜਕੀ ਦੇ ਪਰਵਾਰ ਵਾਲੇ ਘਰੋਂ ਨਿਕਲੇ ਤਾਂ ਲੜਕੇ ਨੇ ਉਨ੍ਹਾਂ ਉੱਤੇ ਗੱਡੀ ਚੜ੍ਹਾ ਦਿੱਤੀ। ਮ੍ਰਿਤਕ ਔਰਤਾਂ ਦੀ ਪਛਾਣ ਲੜਕੀ ਦੀ ਮਾਂ ਅਤੇ ਚਾਚੀ ਵਜੋਂ ਹੋਈ ਹੈ। ਲੜਕੀ ਦਾ ਭਰਾ ਅਤੇ ਇਕ ਹੋਰ ਵਿਅਕਤੀ ਗੰਭੀਰ ਜ਼ਖ਼ਮੀ ਹਨ।