ਮੈਕਸੀਕੋ, 9 ਅਕਤੂਬਰ (ਪੋਸਟ ਬਿਊਰੋ)- ਅਮਰੀਕਾ ਦੇ ਸ਼ਹਿਰ ਮੈਕਸੀਕੋ ਵਿਚ ਸੀਰੀਅਲ ਕਿਲਰ ਜੋੜੇ ਦਾ ਰਹੱਸ ਖੁੱਲ੍ਹ ਗਿਆ ਹੈ। ਇਸ ਜੋੜੇ ਨੇ ਆਪਣਾ ਅਪਰਾਧ ਸਵੀਕਾਰ ਕਰ ਲਿਆ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਪੁਲਸ ਨੇ ਮਨੁੱਖੀ ਅੰਗਾਂ ਸਮੇਤ ਦੋਵਾਂ ਨੂੰ ਗ੍ਰਿਫਤਾਰ ਕਰ ਲਿਆ। ਪੁੱਛਗਿੱਛ ਵਿਚ ਜੋੜੇ ਨੇ ਘੱਟੋ-ਘੱਟ 20 ਲੋਕਾਂ ਦੀ ਹੱਤਿਆ ਕਰਨ ਦਾ ਜ਼ੁਰਮ ਮੰਨਿਆ ਹੈ। ਪੁਰਸ਼ ਨੇ ਕਈ ਮਹਿਲਾ ਪੀੜਤਾਂ ਨਾਲ ਬਲਾਤਕਾਰ ਦੀ ਗੱਲ ਵੀ ਮੰਨੀ ਹੈ। ਕੇਸ ਦੇ ਮੁੱਖ ਜਾਂਚ ਕਰਤਾ ਨੇ ਦੱਸਿਆ ਕਿ ਦੋਸ਼ੀ ਜੋੜਾ ਬੱਚਿਆਂ ਦੀ ਗੱਡੀ ਵਿਚ ਰੱਖੇ ਮਨੁੱਖੀ ਅੰਗਾਂ ਦੀ ਤਸਕਰੀ ਕਰ ਰਿਹਾ ਸੀ। ਇਸੇ ਦੌਰਾਨ ਉਨ੍ਹਾਂ ਨੂੰ ਹਿਰਾਸਤ ਵਿਚ ਲਿਆ ਗਿਆ। ਸਰਕਾਰੀ ਵਕੀਲ ਅਲਜੈਂਡਰੋ ਗੋਮੇਜ਼ ਨੇ ਦੱਸਿਆ ਕਿ ਪੁਲਸ ਨੂੰ ਸ਼ਹਿਰ ਵਿਚ 10 ਔਰਤਾਂ ਦੇ ਕਾਤਲਾਂ ਦੀ ਤਲਾਸ਼ ਸੀ, ਪਰ ਜਦੋਂ ਕਾਤਲ ਫੜੇ ਗਏ ਤਾਂ ਪਤਾ ਲੱਗਾ ਕਿ ਉਨ੍ਹਾਂ ਨੇ 10 ਨਹੀਂ, 20 ਔਰਤਾਂ ਦੀ ਹੱਤਿਆ ਕੀਤੀ ਹੈ। ਫੜੇ ਗਏ ਪੁਰਸ਼ ਨੇ ਕੁਝ ਔਰਤਾਂ ਨਾਲ ਬਲਾਤਕਾਰ ਕਰਨ ਦੀ ਗੱਲ ਵੀ ਮੰਨੀ ਅਤੇ ਦੱਸਿਆ ਕਿ ਉਹ ਸ਼ਿਕਾਰ ਹੋਏ ਲੋਕਾਂ ਦੇ ਅੰਗ ਵੇਚ ਚੁੱਕਾ ਹੈ। ਗੋਮੇਜ਼ ਨੇ ਦੱਸਿਆ ਕਿ ਇਸ ਜੋੜੇ ਨੂੰ ਵੀਰਵਾਰ ਗ੍ਰਿਫਤਾਰ ਕੀਤਾ ਗਿਆ ਸੀ।
ਇਕ ਇੰਟਰਵਿਊ ਵਿਚ ਵਕੀਲ ਗੋਮੇਜ਼ ਨੇ ਕਿਹਾ, ‘ਇਹ ਜੋੜਾ ਚਾਹੁੰਦਾ ਸੀ ਕਿ ਲੋਕ ਉਨ੍ਹਾਂ ਦੀਆਂ ਫੋਟੋ ਦੇਖਣ, ਉਨ੍ਹਾਂ ਦਾ ਨਾਮ ਜਾਣਨ। ਯਕੀਨੀ ਤੌਰ `ਤੇ ਮੈਂ ਇਸ ਜੋੜੇ ਨੂੰ ਦਿਮਾਗੀ ਬੀਮਾਰ ਦੀ ਥਾਂ ਸੀਰੀਅਲ ਕਿਲਰ ਕਹਾਂਗਾ।` ਜੋੜੇ ਨੇ ਇਹ ਵੀ ਦੱਸਿਆ ਕਿ ਉਨ੍ਹਾਂ ਨੇ ਇਕ ਜੋੜੇ ਦੀ ਹੱਤਿਆ ਕਰ ਕੇ ਉਨ੍ਹਾਂ ਦਾ ਬੱਚਾ ਕਿਸੇ ਹੋਰ ਜੋੜੇ ਨੂੰ ਵੇਚ ਦਿੱਤਾ ਸੀ। ਬਿਆਨ ਦੇ ਆਧਾਰ `ਤੇ ਪੁਲਸ ਨੇ ਉਸ ਬੱਚਾ ਖਰੀਦਣ ਵਾਲੇ ਜੋੜੇ ਨੂੰ ਵੀ ਗ੍ਰਿਫਤਾਰ ਕਰ ਲਿਆ। ਪੁਲਸ ਨੇ ਦੋਸ਼ੀਆਂ ਦੀ ਜਾਂਚ ਲਈ ਡਾਕਟਰਾਂ ਦੀ ਇਕ ਟੀਮ ਸੱਦੀ ਤਾਂ ਡਾਕਟਰਾਂ ਨੇ ਹੱਤਿਆ ਦੀ ਦੋਸ਼ੀ ਮਹਿਲਾ ਨੂੰ ਮਾਨਸਿਕ ਬੀਮਾਰ ਦੱਸਿਆ ਹੈ। ਦੋਸ਼ੀ ਜੋੜੇ ਦੇ ਤਿੰਨ ਬੱਚੇ ਹਨ। ਉਨ੍ਹਾਂ ਦੇ ਧੋਖੇ ਵਿਚ ਆਉਣ ਵਾਲੀਆਂ ਜ਼ਿਆਦਾਤਰ ਔਰਤ ਜਵਾਨ ਅਤੇ ਸਿੰਗਲ ਮਦਰ ਸਨ। ਉਨ੍ਹਾਂ ਨੂੰ ਉਸ ਵਿਅਕਤੀ ਦੀ ਤਲਾਸ਼ ਸੀ, ਜੋ ਉਨ੍ਹਾਂ ਦੇ ਬੱਚਿਆਂ ਲਈ ਸਸਤੇ ਕੱਪੜੇ ਲੱਭਣ ਵਿਚ ਮਦਦ ਕਰ ਸਕੇ। ਪੁਲਸ ਨੇ ਜਦੋਂ ਉਨ੍ਹਾਂ ਦੇ ਘਰ ਦੀ ਤਲਾਸ਼ੀ ਲਈ ਤਾਂ ਓਥੋਂ ਮਨੁੱਖੀ ਅੰਗ ਮਿਲੇ, ਜੋ ਸੀਮੈਂਟ ਨਾਲ ਭਰੀ ਬਾਲਟੀ ਅਤੇ ਫਰਿੱਜ ਵਿਚ ਰੱਖੇ ਹੋਏ ਸਨ। ਦੋਸ਼ੀ ਪੁਰਸ਼ ਨੇ ਦੱਸਿਆ ਕਿ ਉਹ ਅਤੇ ਉਸ ਦੀ ਪਤਨੀ ਆਪਣੇ ਪੀੜਤਾਂ ਨੂੰ ਲਾਲਚ ਦਿੰਦੇ ਸਨ।