ਬਰੈਂਪਟਨ, 24 ਜੂਨ (ਪੋਸਟ ਬਿਊਰੋ)- ਬੀਤੇ ਵੀਕੈਂਡ ਉਤੇ ਸਾਲ 2012 ਵਿਚ ਮੋਟਰਸਾਈਕਲ ਸਵਾਰ ਮਨਦੀਪ ਸਿੰਘ ਚੀਮਾ ਦਾ ਸੜਕ ਹਾਦਸੇ ਵਿਚ ਦੇਹਾਂਤ ਹੋ ਗਿਆ ਸੀ। ਮਨਦੀਪ ਸਿੰਘ ਚੀਮਾ, ਜਿਸ ਦਾ ਨਿਕ ਨੇਮ ਰਾਜਾ ਸੀ, ਦੀ ਯਾਦ ਵਿਚ ਚੀਮਾ ਪਰਿਵਾਰ ਵਲੋਂ ਹਰੇਕ ਸਾਲ ਇਕ ਮੋਟਰਸਾਈਕਲ ਰਾਈਡ ਦਾ ਆਯੋਜਨ ਕੀਤਾ ਜਾਂਦਾ ਹੈ। ਇਸ ਵਾਰ ਇਸ ਮੋਟਰਸਾਈਕਲ ਰਾਈਡ ਵਿਚ 100 ਦੇ ਕਰੀਬ ਮੋਟਰਸਾਈਕਲ ਸਵਾਰਾਂ ਨੇ ਹਿੱਸਾ ਲਿਆ। ਜਿਥੇ ਪ੍ਰੀਮੀਅਰ ਡੱਗ ਫੋਰਡ ਰਾਈਡ ਫਾਰ ਰਾਜਾ ਨਾਮ ਦੀ ਇਸ ਰੈਲੀ ਨੂੰ ਹਰੀ ਝੰਡੀ ਦੇਣ ਲਈ ਪਹੁੰਚੇ। ਉਥੇ ਬਾਅਦ ਦੁਪਹਿਰ ਬਰੈਂਪਟਨ ਦੇ ਮੇਅਰ ਪੈਟ੍ਰਿਕ ਬ੍ਰਾਊਨ ਨੇ ਆਪਣੀ ਹਾਜ਼ਰੀ ਦੌਰਾਨ ਇਕ ਵੱਡਾ ਐਲਾਨ ਕੀਤਾ। ਉਨ੍ਹਾਂ ਕਿਹਾ ਕਿ ਬਰਂੈਪਟਨ ਵਿਚ ਮਨਜੂਰ ਕੀਤੀ ਜਾਣ ਵਾਲੀ ਨਵੀ ਸਬ ਡਿਵੀਜਨ ਦੀ ਇਕ ਸਟਰੀਟ ਦਾ ਨਾਮ ਰਾਜਾ ਸਟਰੀਟ ਹੋਵੇਗਾ। ਇਸ ਤਰ੍ਹਾਂ ਪੰਜਾਬੀ ਭਾਈਚਾਰੇ ਵਿਚੋਂ ਮਨਦੀਪ ਸਿੰਘ ਚੀਮਾ ਉਰਫ ਰਾਜਾ ਪਹਿਲੇ ਅਜਿਹੇ ਸ਼ਖਸ ਬਣ ਗਏ ਹਨ, ਜਿਨ੍ਹਾਂ ਦੀ ਯਾਦ ਵਿਚ ਕਿਸੇ ਇਕ ਸਟਰੀਟ ਨੂੰ ਉਸ ਦਾ ਨਾਮ ਦਿੱਤਾ ਗਿਆ ਹੈ। ਰਾਜਾ ਦੇ ਪਿਤਾ ਸ: ਭੁਪਿੰਦਰ ਸਿੰਘ ਚੀਮਾ, ਉਨ੍ਹਾਂ ਦੀ ਮਾਤਾ ਤੇ ਉਨ੍ਹਾਂ ਦੀ ਭੈਣ ਮੀਕਾ ਚੀਮਾ ਗਿੱਲ ਤੇ ਪੂਰੇ ਪਰਿਵਾਰ ਨੇ ਮੇਅਰ ਪੈਟ੍ਰਿਕ ਬ੍ਰਾਊਨ ਦਾ ਤੇ ਬਰਂੈਪਟਨ ਦੀ ਸਿਟੀ ਕੌਂਸਲ ਦਾ ਵਿਸ਼ੇਸ਼ ਤੌਰ ਉਤੇ ਧੰਨਵਾਦ ਕੀਤਾ।