ਫਿਲਮਸਾਜ਼ ਮਹੇਸ਼ ਭੱਟ ਇੱਕ ਵਾਰ ਮੁੜ ਡਾਇਰੈਕਟਰ ਦੀ ਕੁਰਸੀ 'ਤੇ ਬੈਠਣ ਜਾ ਰਹੇ ਹਨ। ਉਹ 1991 ਵਿੱਚ ਸੰਜੇ ਦੱਤ ਅਤੇ ਪੂਜਾ ਭੱਟ ਦੀ ਭੂਮਿਕਾ ਵਾਲੀ ਆਪਣੀ ਫਿਲਮ ‘ਸੜਕ’ ਦਾ ਸੀਕਵਲ ਬਣਾ ਰਹੇ ਹਨ। ਇਸ ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋ ਚੁੱਕੀ ਹੈ। ਫਿਲਮ ‘ਸੜਕ' ਵਿੱਚ ਸੰਜੇ ਦੱਤ ਅਤੇ ਪੂਜਾ ਭੱਟ ਤੋਂ ਇਲਾਵਾ ਸਦਾਸ਼ਿਵ ਅਮਰਾਪੁਰਕਰ ਨੇ ਮੁੱਖ ਭੂਮਿਕਾ ਨਿਭਾਈ ਸੀ। ਅੱਗੋਂ ਫਿਲਮ ‘ਸੜਕ 2’ ਵਿੱਚ ਸੰਜੇ ਦੱਤ ਅਤੇ ਪੂਜਾ ਭੱਟ ਤੋਂ ਇਲਾਵਾ ਆਲੀਆ ਭੱਟ ਅਤੇ ਆਦਿੱਤਿਆ ਰਾਏ ਕਪੂਰ ਲੀਡ ਰੋਲ ਕਰਨਗੇ।
ਇਸ ਫਿਲਮ ਵਿੱਚ ਮਕਰੰਦ ਦੇਸ਼ਪਾਂਡੇ ਤੇ ਗੁਲਸ਼ਨ ਗਰੋਵਰ ਵੀ ਮਹੱਤਵ ਪੂਰਨ ਕਿਰਦਾਰ ਨਿਭਾ ਰਹੇ ਹਨ। ਇਸ ਫਿਲਮ ਦੀ ਸ਼ੂਟਿੰਗ ਦੌਰਾਨ ਸੈਟ ਦੇ ਮਹੇਸ਼ ਭੱਟ ਅਤੇ ਦੂਸਰੇ ਕਲਾਕਾਰਾਂ ਨਾਲ ਮੁਲਾਕਾਤ ਸਮੇਂ ਸੰਜੇ ਦੱਤ ਆਪਣੀ ਫਿਲਮ ‘ਸੜਕ’ ਨੂੰ ਯਾਦ ਕਰ ਕੇ ਬੇਹੱਦ ਭਾਵੁਕ ਹੋ ਗਿਆ। ਫਿਲਮ ‘ਸੜਕ’ ਇੱਕ ਟੈਕਸੀ ਡਰਾਈਵਰ ਅਤੇ ਵੇਸਵਾਗਮਨੀ ਵਿੱਚ ਫਸੀ ਇੱਕ ਲੜਕੀ ਦੀ ਕਹਾਣੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ‘ਸੜਕ 2’ ਵਿੱਚ ਆਲੀਆ ਡੇਰਾ ਚਲਾਉਣ ਵਾਲੇ ਅਿਕ ਨਕਲੀ ਗੁਰੂ ਨੂੰ ਜਗ ਜ਼ਾਹਰ ਕਰੇਗੀ। ਇਹ ਫਿਲਮ ਅਗਲੇ ਸਾਲ 10 ਜੁਲਾਈ ਨੂੰ ਰਿਲੀਜ਼ ਹੋਵੇਗੀ।