ਹੈਦਰਾਬਾਦ, 24 ਜੂਨ (ਪੋਸਟ ਬਿਊਰੋ)- ਆਂਧਰਾ ਪ੍ਰਦੇਸ਼ ਦੇ ਨਵੇਂ ਬਣੇ ਮੁੱਖ ਮੰਤਰੀ ਵਾਈ ਐੱਸ ਜਗਨ ਮੋਹਨ ਰੈੱਡੀ ਨੇ ‘ਪ੍ਰਜਾ ਵੇਦਿਕਾ` ਨਾਂਅ ਦੀ ਬਿਲਡਿੰਗ ਤੋੜਨ ਦਾ ਆਦੇਸ਼ ਦੇ ਦਿੱਤਾ ਹੈ। ਇਸ ਮੰਗਲਵਾਰ ਤੋਂ ਬਿਲਡਿੰਗ ਤੋੜਨ ਦਾ ਕੰਮ ਸ਼ੁਰੂ ਹੋ ਜਾਵੇਗਾ। ਇਸ ਇਮਾਰਤ ਵਿੱਚ ਸਾਬਕਾ ਮੁੱਖ ਮੰਤਰੀ ਚੰਦਰਬਾਬੂ ਨਾਇਡੂ ਰਹਿੰਦੇ ਹਨ।
ਸਾਬਕਾ ਮੁੱਖ ਮੰਤਰੀ ਚੰਦਰਬਾਬੂ ਨਾਇਡੂ ਨੇ ਪਿਛਲੇ ਦਿਨੀਂ ਜਗਨਮੋਹਨ ਰੈੱਡੀ ਨੂੰ ਇੱਕ ਚਿੱਠੀ ਲਿਖ ਕੇ ‘ਪ੍ਰਜਾ ਵੇਦਿਕਾ` ਇਮਾਰਤ ਨੂੰ ਵਿਰੋਧੀ ਧਿਰ ਦੇ ਨੇਤਾ ਦਾ ਸਰਕਾਰੀ ਘਰ ਐਲਾਨ ਕਰਨ ਦੀ ਮੰਗ ਕੀਤੀ ਸੀ। ਵਾਈ ਐੱਸ ਆਰ ਕਾਂਗਰਸ ਪਾਰਟੀ ਦੀ ਸਰਕਾਰ ਨੇ ਇਸ ਸ਼ਨੀਵਾਰ ਸਾਬਕਾ ਮੁੱਖ ਮੰਤਰੀ ਐੱਨ ਚੰਦਰਬਾਬੂ ਨਾਇਡੂ ਦੇ ਅਮਰਾਵਤੀ ਸ਼ਹਿਰ ਵਿਚਲੇ ਘਰ ‘ਪ੍ਰਜਾ ਵੇਦਿਕਾ’ ਨੂੰ ਆਪਣੇ ਕਬਜ਼ੇ ਵਿੱਚ ਲੈ ਲਿਆ। ਚੰਦਰਬਾਬੂ ਨਾਇਡੂ ਦੀ ਤੇਲਗੂ ਦੇਸ਼ਮ ਪਾਰਟੀ ਨੇ ਇਸ ਨੂੰ ਬਦਲੇ ਦੀ ਇੱਕ ਸਪੱਸ਼ਟ ਕਾਰਵਾਈ ਕਰਾਰ ਦਿੱਤਾ ਸੀ।
ਵਰਨਣ ਯੋਗ ਹੈ ਕਿ ਚੰਦਰਬਾਬੂ ਨਾਇਡੂ ਕ੍ਰਿਸ਼ਨਾ ਨਦੀ ਦੇ ਕਿਨਾਰੇ ਉਂਦਾਵੱਲੀ ਦੇ ਇਸ ਘਰ ਵਿੱਚ ਉਦੋਂ ਤੋਂ ਰਹਿ ਰਹੇ ਸਨ, ਜਦੋਂ ਆਂਧਰਾ ਪ੍ਰਦੇਸ਼ ਨੇ ਪਹਿਲੀ ਰਾਜਧਾਨੀ ਹੈਦਰਾਬਾਦ ਨੂੰ ਨਵੇਂ ਬਣੇ ਰਾਜ ਤਿਲੰਗਾਨਾ ਲਈ ਛੱਡਣ ਦੇ ਬਾਅਦ ਆਪਣਾ ਪ੍ਰਸ਼ਾਸਨ ਅਮਰਾਵਤੀ ਵਿੱਚ ਲਿਆਂਦਾ ਸੀ। ਪ੍ਰਜਾ ਵੇਦਿਕਾ ਨਾਂਅ ਦੀ ਇਮਾਰਤ ਦੀ ਉਸਾਰੀ ਆਂਧਰਾ ਸਰਕਾਰ ਨੇ ਇਸ ਦੇ ਰਾਜਧਾਨੀ ਖੇਤਰ ਦੀ ਵਿਕਾਸ ਅਥਾਰਟੀ (ਏ ਪੀ ਸੀ ਆਰ ਡੀ ਏ) ਤੋਂ ਸਾਬਕਾ ਮੁੱਖ ਮੰਤਰੀ ਦੀ ਰਿਹਾਇਸ਼ ਵਜੋਂ ਕਰਵਾਈ ਸੀ। ਪੰਜ ਕਰੋੜ ਰੁਪਏ ਨਾਲ ਬਣੇ ਇਸ ਘਰ ਦੀ ਵਰਤੋਂ ਨਾਇਡੂ ਸਰਕਾਰੀ ਕੰਮਾਂ ਦੇ ਨਾਲ ਹੀ ਆਪਣੀ ਪਾਰਟੀ ਦੀਆਂ ਬੈਠਕਾਂ ਕਰਨ ਲਈ ਵੀ ਕਰਦੇ ਸਨ। ਉਨ੍ਹਾਂ ਇਸ ਮਹੀਨੇ ਸ਼ੁਰੂ ਵਿੱਚ ਮੁੱਖ ਮੰਤਰੀ ਵਾਈ ਐੱਸ ਜਗਨ ਮੋਹਨ ਰੈੱਡੀ ਨੂੰ ਪੱਤਰ ਲਿਖ ਕੇ ਇਸ ਇਮਾਰਤ ਦੀ ਵਰਤੋਂ ਬੈਠਕਾਂ ਲਈ ਕਰਨ ਦੀ ਮਨਜ਼ੂਰੀ ਮੰਗੀ ਅਤੇ ਰਾਜ ਸਰਕਾਰ ਨੂੰ ਅਪੀਲ ਕੀਤੀ ਸੀ ਕਿ ਉਹ ਇਸ ਨੂੰ ਵਿਰੋਧੀ ਧਿਰ ਦੇ ਨੇਤਾ ਦਾ ਸਰਕਾਰੀ ਘਰ ਐਲਾਨ ਕਰ ਦੇਣ, ਪਰ ਰਾਜ ਸਰਕਾਰ ਨੇ ਪ੍ਰਜਾ ਵੇਦਿਕਾ ਨੂੰ ਕਬਜ਼ੇ ਵਿੱਚ ਲੈਣ ਦਾ ਫੈਸਲਾ ਕਰ ਕੇ ਐਲਾਨ ਕੀਤਾ ਕਿ ਇਸ ਨੂੰ ਤੋੜਿਆ ਜਾਵੇਗਾ।