ਅਦੀਸ ਅਬਾਬਾ, 24 ਜੂਨ (ਪੋਸਟ ਬਿਊਰੋ)- ਅਫਰੀਕੀ ਦੇਸ਼ ਇਥੋਪੀਆ 'ਚ ਸੱਤਾ ਪਲਟਣ ਦੀ ਕੋਸ਼ਿਸ਼ ਦੌਰਾਨ ਦੇਸ਼ ਦੇ ਫੌਜੀ ਕਮਾਂਡਰ ਸਮੇਤ ਘੱਟੋ-ਘੱਟ ਤਿੰਨ ਵਿਅਕਤੀਆਂ ਦੀ ਕੱਲ੍ਹ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ ਹੈ।
ਇਥੋਪੀਆ ਦੇ ਪ੍ਰਧਾਨ ਮੰਤਰੀ ਅਬੀ ਅਹਿਮਦ ਨੇ ਟੀ ਵੀ ਉੱਤੇ ਦੱਸਿਆ ਕਿ ਦੇਸ਼ ਦੇ ਇੱਕ ਖੁਦ ਮੁਖਤਿਆਰ ਸੂਬੇ ਅਮਹਾਰਾ ਵਿਖੇ ਤਖਤਾ ਪਲਟ ਦੇ ਯਤਨਾਂ ਦੌਰਾਨ ਇਹ ਘਟਨਾ ਵਾਪਰੀ ਹੈ। ਫੌਜ ਦੀ ਵਰਦੀ ਪਹਿਨੀ ਅਹਿਮਦ ਨੇ ਦੱਸਿਆ ਕਿ ਫੌਜ ਦੇ ਕਮਾਂਡਰ ਸੀਅਰੇ ਅਤੇ ਮੈਕੋਨੇਨ ਨੂੰ ਉਨ੍ਹਾਂ ਦੇ ਹੀ ਇੱਕ ਸੁਰੱਖਿਆ ਮੁਲਾਜ਼ਮ ਨੇ ਕਤਲ ਕੀਤਾ ਹੈ। ਇਹ ਹਮਲਾ ਅਮਹਾਰਾ ਦੇ ਸੁਰੱਖਿਆ ਮੁਖੀ ਅਸਾਮੀਨਿਊ ਦੀ ਅਗਵਾਈ ਵਿੱਚ ਕੀਤਾ ਗਿਆ। ਇਸ ਦੌਰਾਨ ਖੇਤਰ ਦੇ ਇੱਕ ਫੌਜੀ ਮੁਖੀ ਅੰਬਾਚਿਊ ਅਤੇ ਇੱਕ ਹੋਰ ਅਧਿਕਾਰੀ ਦੀ ਵੀ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਸਮਝਿਆ ਜਾਂਦਾ ਹੈ ਕਿ ਇਹ ਹਮਲਾ ਪਹਿਲਾਂ ਤੋਂ ਬਣਾਈ ਗਈ ਯੋਜਨਾ ਦਾ ਹਿੱਸਾ ਸੀ। ਇਸ ਦੌਰਾਨ ਇੱਕ ਹੋਰ ਵਿਅਕਤੀ, ਜੋ ਘਟਨਾ ਸਮੇਂ ਮੌਕੇ 'ਤੇ ਖੜ੍ਹਾ ਸੀ, ਦੀ ਵੀ ਹੱਤਿਆ ਕਰ ਦਿੱਤੀ ਗਈ। ਘਟਨਾ ਲਈ ਜ਼ਿੰਮੇਵਾਰ ਸਕਿਓਰਿਟੀ ਗਾਰਡਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ ਅਤੇ ਚੌਕਸੀ ਵਜੋਂ ਪੂਰੇ ਇਥੋਪੀਆ ਵਿੱਚ ਇੰਟਰਨੈਟ ਸੇਵਾਵਾਂ ਨੂੰ ਬੰਦ ਕਰ ਦਿੱਤਾ ਹੈ। ਇਸ ਕਾਰਨ ਦੇਸ਼ ਵਿੱਚੋਂ ਤਖਤਾ ਪਲਟਣ ਨਾਲ ਜੁੜੀਆਂ ਖਬਰਾਂ ਵਿਸਥਾਰ ਨਾਲ ਨਹੀਂ ਮਿਲ ਰਹੀਆਂ।