ਬਰੈਂਪਟਨ, 9 ਅਕਤੂਬਰ (ਪੋਸਟ ਬਿਊਰੋ) : ਬਰੈਂਪਟਨ ਵਿੱਚ ਐਤਵਾਰ ਰਾਤ ਨੂੰ ਇੱਕ ਫੂਡ ਵੰਡਣ ਵਾਲੀ ਫੈਸਿਲਿਟੀ ਵਿੱਚ ਲੱਗੀ ਜ਼ਬਰਦਸਤ ਅੱਗ ਕਾਰਨ ਸਾਰੀ ਇਮਾਰਤ ਸੜ ਕੇ ਸੁਆਹ ਹੋ ਗਈ। ਇਹ ਜਾਣਕਾਰੀ ਅਧਿਕਾਰੀਆਂ ਨੇ ਦਿੱਤੀ।
ਹਾਈਵੇਅ 407 ਤੇ ਡਿਕਸੀ ਰੋਡ ਵਾਲੇ ਇਲਾਕੇ ਵਿੱਚ ਵੈਸਟਵਿਨ ਕੋਰਟ ਸਥਿਤ ਟੀਐਨਟੀ ਫੂਡਜ਼ ਇੰਟਰਨੈਸ਼ਨਲ ਦੀ ਛੱਤ ਨੂੰ ਚੀਰਦੀਆਂ ਹੋਈਆਂ ਅੱਗ ਦੀਆਂ ਲਪਟਾਂ ਬਾਹਰ ਤੱਕ ਜਾ ਰਹੀਆਂ ਸਨ। ਇਹ ਇੱਕ ਪਰਿਵਾਰ ਵੱਲੋਂ ਚਲਾਇਆ ਜਾਣ ਵਾਲਾ ਪੋਲਟਰੀ ਪ੍ਰੋਸੈਸਿੰਗ ਪਲਾਂਟ ਹੈ ਜਿਸ ਦੀ ਇੱਕ ਬ੍ਰਾਂਚ ਮਿਸੀਸਾਗਾ ਵਿੱਚ ਵੀ ਹੈ। ਪੁਲਿਸ ਨੇ ਦੱਸਿਆ ਕਿ ਹਾਦਸੇ ਸਮੇਂ ਇਮਾਰਤ ਵਿੱਚ ਕੋਈ ਵੀ ਮੁਲਾਜ਼ਮ ਮੌਜੂਦ ਨਹੀਂ ਸੀ ਤੇ ਨਾ ਹੀ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਹੀ ਕੋਈ ਖਬਰ ਹੈ।
ਰਾਤੀਂ 9:30 ਵਜੇ ਲੱਗੀ ਅੱਗ ਕਾਰਨ ਸੰਘਣਾਂ ਧੂੰਆਂ ਚਾਰੇ ਪਾਸੇ ਫੈਲ ਗਿਆ ਤੇ ਇਹ ਨਾਲ ਲੱਗਦੇ ਹਾਈਵੇਅ 401 ਉੱਤੇ ਵੀ ਫੈਲ ਗਿਆ। ਪੀਲ ਰੀਜਨਲ ਪੁਲਿਸ ਨੂੰ ਸਾਰਿਆਂ ਨੂੰ ਇਸ ਅੱਗ ਬਾਰੇ ਐਲਰਟ ਕਰਨਾ ਪਿਆ। ਦੇਰ ਰਾਤ ਤੱਕ ਬਰੈਂਪਟਨ ਦਾ ਫਾਇਰ ਅਮਲਾ ਅੱਗ ਉੱਤੇ ਕਾਬੂ ਪਾਉਣ ਦੀ ਕੋਸਿ਼ਸ਼ ਕਰਦਾ ਰਿਹਾ। ਪੁਲਿਸ ਨੇ ਸਵੇਰੇ 6:00 ਵਜੇ ਤੱਕ ਸਾਰਾ ਇਲਾਕਾ ਖਾਲੀ ਕਰਵਾਇਆ। ਅੱਗ ਲੱਗਣ ਦੇ ਕਾਰਨਾ ਦਾ ਪਤਾ ਲਾਉਣ ਦੀ ਪੁਲਿਸ ਕੋਸਿ਼ਸ਼ ਕਰ ਰਹੀ ਹੈ।