ਬਰੈਂਪਟਨ ਪੋਸਟ ਬਿਉਰੋ: ਪੀਲ ਪੁਲੀਸ ਸਰਵਿਸਜ਼ ਬੋਰਡ ਦੇ ਵਾਈਸ ਪ੍ਰੈਜ਼ੀਡੈਂਟ ਰੌਨ ਚੱਠਾ ਨੇ ਦੱਸਿਆ ਹੈ ਕਿ ਪੀਲ ਪੁਲੀਸ ਵੱਲੋਂ ਕਿਉਬਿੱਕ ਦੇ ਉਹਨਾਂ ਪੁਲੀਸ ਅਫ਼ਸਰਾਂ ਨੂੰ ਭਰਤੀ ਹੋਣ ਦਾ ਸੱਦਾ ਦੇ ਰਹੀ ਹੈ ਜਿਹੜੇ ਉੱਤੇ ਆਪਣੇ ਦਸਤਾਰ, ਹਿਜਾਬ ਆਦਿ ਧਾਰਮਿਕ ਚਿੰਨ ਪਹਿਨ ਕੇ ਨੌਕਰੀ ਨਹੀਂ ਕਰ ਸਕਦੇ। ਵਰਨਣਯੋਗ ਹੈ ਕਿ ਕਿਉਬਿੱਕ ਵਿੱਚ ਬੀਤੇ ਦਿਨੀਂ ਬਿੱਲ 21 ਪਾਸ ਕੀਤਾ ਗਿਆ ਸੀ ਜਿਸ ਤੋਂ ਨਵੇਂ ਭਰਤੀ ਹੋਣ ਵਾਲੇ ਮੁਲਾਜ਼ਮ ਧਾਰਮਿਕ ਚਿੰਨ ਨਹੀਂ ਪਹਿਨ ਸਕਦੇ ਅਤੇ ਜੋ ਪਹਿਲਾਂ ਭਰਤੀ ਹੋ ਚੁੱਕੇ ਹਨ, ਉਹਨਾਂ ਨੂੰ ਤਰੱਕੀ ਨਹੀਂ ਦਿੱਤੀ ਜਾਵੇਗੀ।
ਪੀਲ ਪੁਲੀਸ ਸਰਵਸਿਜ਼ ਵੱਲੋਂ ਰੌਨ ਚੱਠਾ ਦੇ ਉਸ ਮਤੇ ਨੂੰ 21 ਜੂਨ ਨੂੰ ਹੋਈ ਇੱਕ ਮੀਟਿੰਗ ਵਿੱਚ ਸਰਬਸੰਮਤੀ ਨਾਲ ਪਾਸ ਕੀਤਾ ਹੈ। ਇਹ ਮਤੇ ਮੁਤਾਬਕ ਪੀਲ ਪੁਲੀਸ ਦੀਆਂ ਨੌਕਰੀਆਂ ਬਾਰੇ ਕਿਉਬਿੱਕ ਦੇ ਵੱਖ ਵੱਖ ਸ਼ਹਿਰਾਂ ਵਿੱਚ ਇਸ਼ਤਿਹਾਰ ਲਾਏ ਜਾਣਗੇ ਤਾਂ ਜੋ ਪ੍ਰਭਾਵਿਤ ਮੁਲਾਜ਼ਮ ਜੌਬਾਂ ਲਈ ਅਰਜ਼ੀਆਂ ਦੇ ਸਕਣ। ਹਾਲੇ ਇਹ ਵੇਖਣਾ ਬਾਕੀ ਹੈ ਕਿ ਕੀ ਕਿਉਬਿੱਕ ਵਿੱਚ ਅਜਿਹੇ ਇਸ਼ਤਿਹਾਰ ਲਾਉਣ ਦੀ ਇਜ਼ਾਜਤ ਮਿਲੇਗੀ ਜਾਂ ਨਹੀਂ ਅਤੇ ਇਸ ਤਰੀਕੇ ਦੀ ਪਬਲੀਸਿਟੀ ਬਾਰੇ ਕਿਉਬਿੱਕ ਦੀ ਆਮ ਪਬਲਿਕ ਵੱਲੋਂ ਕੀ ਪ੍ਰਤੀਕਰਮ ਦਿੱਤਾ ਜਾਵੇਗਾ।