ਨਿਊ ਯੌਰਕ, 9 ਅਕਤੂਬਰ (ਪੋਸਟ ਬਿਊਰੋ) : ਇੱਕ ਸਟੋਰ ਦੇ ਬਾਹਰ ਹਾਦਸਾਗ੍ਰਸਤ ਹੋਈ ਲੋੜ ਨਾਲੋਂ ਵੱਡੀ ਲਿਮੋਜਿ਼ਨ, ਜਿਸ ਕਾਰਨ 20 ਲੋਕ ਮਾਰੇ ਗਏ, ਅਜੇ ਪਿਛਲੇ ਮਹੀਨੇ ਸੇਫਟੀ ਜਾਂਚ ਵਿੱਚ ਅਸਫਲ ਰਹੀ ਸੀ। ਸੋਮਵਾਰ ਨੂੰ ਨਿਊ ਯੌਰਕ ਦੇ ਗਵਰਨਰ ਨੇ ਆਖਿਆ ਕਿ ਇਸ ਗੱਡੀ ਨੂੰ ਤਾਂ ਸੜਕ ਉੱਤੇ ਹੋਣਾ ਹੀ ਨਹੀਂ ਸੀ ਚਾਹੀਦਾ। ਇਸ ਦੇ ਡਰਾਈਵਰ ਕੋਲ ਵੀ ਸਹੀ ਲਾਇਸੰਸ ਨਹੀਂ ਸੀ।
ਇਸ ਗੱਡੀ ਦੀ ਮਾਲਕ ਪ੍ਰੈਸਟੀਜ਼ ਲਿਮੋਜਿ਼ਨ ਨੂੰ ਬੰਦ ਕਰਨ ਦੀ ਸਟੇਟ ਤੇ ਫੈਡਰਲ ਅਧਿਕਾਰੀਆਂ ਵੱਲੋਂ ਤਿਆਰੀ ਵੀ ਕੀਤੀ ਜਾ ਰਹੀ ਸੀ। ਸ਼ਨਿੱਚਰਵਾਰ ਨੂੰ ਸ਼ਕੌਹੇਰੀ ਵਿਖੇ ਹੋਏ ਹਾਦਸੇ ਦੀ ਵੀ ਸਟੇਟ ਤੇ ਫੈਡਰਲ ਅਧਿਕਾਰੀਆਂ ਵੱਲੋਂ ਜਾਂਚ ਕੀਤੀ ਗਈ। ਕੰਪਨੀ ਨੇ ਆਖਿਆ ਕਿ ਉਹ ਆਪਣੀਆਂ ਕਾਰਾਂ ਫਿਲਹਾਲ ਬੰਦ ਕਰ ਰਹੀ ਹੈ ਤੇ ਆਪ ਵੀ ਇਸ ਹਾਦਸੇ ਦੀ ਜਾਂਚ ਕਰ ਰਹੀ ਹੈ। ਜਦੋਂ ਤੱਕ ਜਾਂਚ ਮੁੰਕਮਲ ਨਹੀਂ ਹੋ ਜਾਂਦੀ ਉਦੋਂ ਤੱਕ ਕੰਪਨੀਆਂ ਆਪਣੀਆਂ ਕਾਰਾਂ ਸੜਕ ਉੱਤੇ ਨਹੀਂ ਉਤਾਰੇਗੀ।
ਨਿਊ ਯੌਰਕ ਸਿਟੀ ਤੋਂ 170 ਮੀਲ ਉੱਤਰ ਵੱਲ ਹੋਏ ਇਸ ਹਾਦਸੇ ਤੋਂ ਤਿੰਨ ਸਾਲ ਪਹਿਲਾਂ ਵੀ ਇੱਕ ਹਾਦਸਾ ਨਿਊ ਯੌਰਕ ਵਿੱਚ ਹੋ ਚੁੱਕਿਆ ਹੈ। ਲੋਕਾਂ ਵੱਲੋਂ ਗਵਰਨਰ ਐਂਡਰੀਊ ਕੁਓਮੋ ਤੋਂ ਮੰਗ ਕੀਤੀ ਜਾ ਰਹੀ ਹੈ ਕਿ ਉਹ ਇਸ ਤਰ੍ਹਾਂ ਦੇ ਹਾਦਸੇ ਰੋਕਣ ਲਈ ਗੱਡੀਆਂ ਦੀ ਸੇਫਟੀ ਸਬੰਧੀ ਜਾਂਚ ਲਈ ਕੋਈ ਠੋਸ ਕਦਮ ਚੁੱਕਣ। ਅਜੇ ਤੱਕ ਇਸ ਗੱਲ ਦੇ ਕੋਈ ਸਬੂਤ ਨਹੀਂ ਮਿਲੇ ਹਨ ਕਿ ਸਟੇਟ ਨੇ ਇਸ ਤਰ੍ਹਾਂ ਦੇ ਹਾਦਸਿਆਂ ਨੂੰ ਰੋਕਣ ਲਈ ਕੋਈ ਕਾਰਵਾਈ ਕੀਤੀ ਹੈ ਜਾਂ ਨਹੀਂ।
ਜਿਸ ਗੱਡੀ ਨੂੰ ਹਾਦਸਾ ਪੇਸ਼ ਆਇਆ ਉਸ ਵਿੱਚ ਕੁੱਝ ਪਰਿਵਾਰਕ ਮੈਂਬਰ, ਦੋਸਤ ਤੇ ਰਿਸ਼ਤੇਦਾਰ ਇੱਕਠੇ ਹੋ ਕੇ ਜਨਮਦਿਨ ਦੀ ਪਾਰਟੀ ਮਨਾਉਣ ਜਾ ਰਹੇ ਸਨ। ਅਜੇ ਤੱਕ ਅਧਿਕਾਰੀਆਂ ਨੂੰ ਇਹ ਪਤਾ ਨਹੀਂ ਲੱਗ ਸਕਿਆ ਕਿ ਲਿਮੋਜਿ਼ਨ ਕਿੰਨੀ ਤੇਜ਼ ਜਾ ਰਹੀ ਸੀ ਤੇ ਹਾਦਸਾ ਕਿਵੇਂ ਵਾਪਰਿਆ। ਨੈਸ਼ਨਲ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ ਦੇ ਚੇਅਰਮੈਨ ਰੌਬਰਟ ਸਮਵਾਲਟ ਨੇ ਦੱਸਿਆ ਕਿ 19 ਸੀਟਾਂ ਵਾਲੀ ਇਸ ਗੱਡੀ ਦੀਆਂ ਕਈ ਸੀਟ ਬੈਲਟਜ਼ ਵੀ ਸਨ ਪਰ ਇਹ ਵੀ ਸਪਸ਼ਟ ਨਹੀਂ ਹੋ ਸਕਿਆ ਕਿ ਸਾਰਿਆਂ ਨੇ ਇਹ ਸੀਟ ਬੈਲਟਸ ਪਾਈਆਂ ਹੋਈਆਂ ਸਨ।