ਭੈਣ ਏਕਤਾ ਕਪੂਰ ਦੀ ਰਾਹ ਉੱਤੇ ਚਲਦੇ ਹੋਏ ਤੁਸ਼ਾਰ ਕਪੂਰ ਨੇ ਫਿਲਮ ‘ਲਛਮੀ ਬੰਬ’ ਨਾਲ ਨਿਰਮਾਣ ਖੇਤਰ ਵਿੱਚ ਕਦਮ ਰੱਖ ਦਿੱਤਾ ਹੈ। ਫਿਲਮ ਦੀ ਸ਼ੂਟਿੰਗ ਸ਼ੁਰੂ ਹੋ ਚੁੱਕੀ ਹੈ। ਸਾਊਥ ਦੀ ਹਾਰਰ ਫਿਲਮ ‘ਮੁਨਿ 2 : ਕੰਚਨਾ’ ਦੀ ਇਸ ਹਿੰਦੀ ਰੀਮੇਕ ਵਿੱਚ ਅਕਸ਼ੈ ਕੁਮਾਰ ਮੁੱਖ ਭੂਮਿਕਾ ਵਿੱਚ ਹੋਣਗੇ। ਪਿਛਲੇ ਦਿਨੀਂ ਇਹ ਫਿਲਮ ਸੁਰਖੀਆਂ ਵਿੱਚ ਆਈ ਸੀ, ਜਦ ਫਿਲਮ ਦੇ ਨਿਰਦੇਸ਼ਕ ਰਾਘਵ ਲਾਰੈਂਸ ਨੂੰ ਬਿਨਾਂ ਦੱਸੇ ਫਿਲਮ ਦਾ ਪੋਸਟਰ ਰਿਲੀਜ਼ ਕਰ ਦਿੱਤਾ ਗਿਆ ਸੀ ਅਤੇ ਰਾਘਵ ਨੇ ਫਿਲਮ ਨਾਲੋਂ ਅਲੱਗ ਹੋਣ ਦਾ ਐਲਾਨ ਕਰ ਦਿੱਤਾ ਸੀ।
ਕੁਝ ਦਿਨਾਂ ਬਾਅਦ ਅਕਸ਼ੈ ਕੁਮਾਰ ਨੇ ਇਸ ਮਾਮਲੇ ਨੂੰ ਸੁਲਝਾਇਆ ਅਤੇ ਰਾਘਵ ਵਾਪਸ ਆਏ। ਇਸ ਕੇਸ ਵਿੱਚ ਨਿਰਮਾਤਾ ਹੋਣ ਦੇ ਬਾਵਜੂਦ ਤੁਸ਼ਾਰ ਕਪੂਰ ਨੇ ਦੂਰ ਰਹਿਣਾ ਠੀਕ ਸਮਝਿਆ। ਚੁੱਪੀ ਧਾਰਨ ਬਾਰੇ ਤੁਸ਼ਾਰ ਨੇ ਦੱਸਿਆ, ‘ਮੈਂ ਓਦੋਂ ਬੋਲਦਾ ਤਾਂ ਅੱਗ ਵਿੱਚ ਘਿਓ ਪਾਉਣ ਵਾਲੀ ਗੱਲ ਹੁੰਦੀ। ਮੈਂ ‘ਇੱਕ ਚੁੱਪ ਸੌ ਸੁੱਖ’ ਗੱਲ ਵਿੱਚ ਯਕੀਨ ਰੱਖਦਾ ਹਾਂ। ਸਮੇਂ 'ਤੇ ਸੱਚ ਖੁਦ ਸਾਹਮਣੇ ਆ ਜਾਂਦਾ ਹੈ। ਮੈਂ ਨਹੀਂ ਚਾਹੁੰਦਾ ਕਿ ਮੇਰੀ ਭੂਮਿਕਾ ਬਹੁਤੀ ਨਜ਼ਰ ਵਿੱਚ ਆਏ।”