ਮੁਜ਼ੱਫਰਪੁਰ, 23 ਜੂਨ (ਪੋਸਟ ਬਿਊਰੋ)- ਬਿਹਾਰ ਵਿੱਚ ਚਮਕੀ ਬੁਖਾਰ ਕਾਰਨ ਕੱਲ੍ਹ ਰਾਤ ਤੱਕ 173 ਬੱਚਿਆਂ ਦੀ ਮੌਤ ਹੋ ਚੁੱਕੀ ਸੀ। ਇਸ ਦੌਰਾਨ ਸ਼ਹਿਰ ਦੇ ਸ੍ਰੀ ਕ੍ਰਿਸ਼ਨਾ ਮੈਡੀਕਲ ਕਾਲਜ ਅਤੇ ਹਸਪਤਾਲ (ਐੱਸ ਕੇ ਐੱਮ ਸੀ ਐੱਚ) ਦੇ ਪਿਛਲੇ ਪਾਸੇ 108 ਮਨੁੱਖੀ ਪਿੰਜਰ ਮਿਲਣ ਨਾਲ ਸਨਸਨੀ ਫੈਲ ਗਈ ਹੈ। ਹਸਪਤਾਲ ਦੇ ਪਿਛਲੇ ਪਾਸੇ ਜੰਗਲ ਵਾਲੇ ਖੇਤਰ ਵਿੱਚ ਪਈਆਂ ਕੁਝ ਬੋਰੀਆਂ ਵਿੱਚੋਂ ਇਹ ਮਨੁੱਖੀ ਪਿੰਜਰ ਮਿਲੇ ਹਨ, ਜਿਨ੍ਹਾਂ ਦਾ ਨਾਂ ਤਾਂ ਅੰਤਿਮ ਸਸਕਾਰ ਕੀਤਾ ਗਿਆ ਸੀ ਅਤੇ ਨਾ ਹੀ ਉਨ੍ਹਾਂ ਨੂੰ ਕਬਰ ਵਿੱਚ ਦਫਨਾਇਆ ਗਿਆ ਸੀ।
ਮੈਡੀਕਲ ਕਾਲਜ ਦੀ ਇੱਕ ਜਾਂਚ ਟੀਮ ਨੇ ਪੁਲਸ ਨਾਲ ਉਸ ਥਾਂ ਦਾ ਦੌਰਾ ਕੀਤਾ। ਜਾਂਚ ਟੀਮ ਨੇ ਦੱਸਿਆ ਕਿ ਕੁਝ ਮਨੁੱਖੀ ਪਿੰਜਰ ਜ਼ਮੀਨ ਉਤੇ ਪਏ ਸੀ ਤੇ ਹੋਰਨਾਂ ਨੂੰ ਬੋਰੀਆਂ ਵਿੱਚ ਭਰਿਆ ਗਿਆ ਸੀ। ਬਿਹਾਰ ਸਿਹਤ ਵਿਭਾਗ ਨੇ ਇਸ ਸਾਰੇ ਦੀ ਉੱਚ ਪੱਧਰੀ ਜਾਂਚ ਦੇ ਹੁਕਮ ਦਿੱਤੇ ਹਨ। ਅਹੀਆਪੁਰ ਦੇ ਥਾਣਾ ਮੁਖੀ ਸੋਨਾ ਪ੍ਰਸਾਦ ਸਿੰਘ ਨੇ ਕਿਹਾ ਕਿ ਜਾਂਚ ਤੋਂ ਬਾਅਦ ਪਤਾ ਲੱਗੇਗਾ ਕਿ ਇਹ ਲਾਵਾਰਸ ਲਾਸ਼ਾਂ ਇਥੇ ਕਿਵੇਂ ਲਿਆ ਕੇ ਸਾੜੀਆਂ ਗਈਆਂ ਅਤੇ ਪਿੰਜਰਾਂ ਨੂੰ ਬੋਰੀਆਂ ਵਿੱਚ ਕਿਉਂ ਬੰਦ ਕੀਤਾ ਗਿਆ। ਨਿਯਮਾਂ ਮੁਤਾਬਕ ਜੇ ਕਿਸੇ ਮ੍ਰਿਤਕ ਦੇ ਪਰਵਾਰ ਦਾ ਕੋਈ ਮੈਂਬਰ ਲਾਸ਼ ਦੀ ਪਛਾਣ ਕਰਨ ਲਈ ਨਹੀਂ ਆਉਂਦਾ ਤਾਂ ਪੋਸਟ ਮਾਰਟਮ ਵਿਭਾਗ ਦੀ ਜ਼ਿੰਮੇਵਾਰੀ ਹੁੰਦੀ ਹੈ ਜਾਂ ਤਾਂ ਉਹ ਮ੍ਰਿਤਕ ਦੇਹ ਦਾ ਅੰਤਿਮ ਸਸਕਾਰ ਕਰੇ ਜਾਂ ਉਸ ਨੂੰ ਕਿਸੇ ਕਬਰ ਵਿੱਚ ਦਫਨਾ ਦੇਵੇ, ਪਰ ਪਿੰਜਰ ਏਥੇ ਕਿਉਂ ਮਿਲੇ, ਇਹ ਜਾਂਚ ਦਾ ਵਿਸ਼ਾ ਹੈ।