ਸ੍ਰੀ ਕੀਰਤਪੁਰ ਸਾਹਿਬ, 23 ਜੂਨ (ਪੋਸਟ ਬਿਊਰੋ)- ਕੀਰਤਪੁਰ ਸਾਹਿਬ ਵਿਖੇ ਕੱਲ੍ਹ ਸਵੇਰੇ ਦਰਗਾਹ ਪੀਰ ਬਾਬਾ ਬੁੱਢਣ ਸਾਹ ਦੇ ਮੱਥਾ ਟੇਕ ਕੇ ਵਾਪਸ ਆ ਰਹੀ ਸ਼ਰਧਾਲੂਆਂ ਦੀ ਬਸ ਪਲਟਮ ਕਰ ਕੇ ਇੱਕ ਔਰਤ ਦੀ ਮੌਤ ਹੋ ਗਈ ਅਤੇ ਚਾਰ ਜ਼ਖਮੀ ਹੋ ਗਏ ਹਨ। ਸਥਾਨਕ ਪੁਲਸ ਘਟਨਾ ਦੀ ਜਾਂਚ ਕਰ ਰਹੀ ਹੈ।
ਮਿਲੀ ਜਾਣਕਾਰੀ ਅਨੁਸਾਰ ਫਰੀਦਕੋਟ ਤੋਂ ਇੱਕ ਪਰਵਾਰ ਦੇ ਪੰਜ ਭਰਾ ਆਪਣੀ ਮਾਤਾ ਦੀਆਂ ਅਸਥੀਆਂ ਪਾਉਣ ਲਈ ਆਪਣੇ ਸਕੇ ਸੰਬੰਧੀਆਂ ਨਾਲ ਗੁਰਦੁਆਰਾ ਸ੍ਰੀ ਪਤਾਲਪੁਰੀ ਸਾਹਿਬ ਵਿਖੇ ਗਏ ਸਨ। ਸਵੇਰੇ ਅਸਥ ਪਾਉਣ ਮਗਰੋਂ ਬਾਬਾ ਬੁੱਢਣ ਸਾਹ ਦੇ ਮੱਥਾ ਟੇਕ ਕੇ ਮੁੜਦੇ ਹੋਏ ਬਸ ਦੇ ਗੇਅਰ ਵਿੱਚ ਤਕਨੀਕੀ ਖਰਾਬੀ ਕਾਰਨ ਬਸ ਬੰਦ ਹੋ ਗਈ ਅਤੇ ਡਰਾਈਵਰ ਨੇ ਮਰਦ ਸਵਾਰੀਆਂ ਨੂੰ ਬਸ ਨੂੰ ਧੱਕਾ ਲਾਉਣ ਲਈ ਕਿਹਾ। ਔਰਤਾਂ ਅਤੇ ਬੱਚੇ ਬਸ ਵਿੱਚ ਸਨ। ਬਸ ਨੂੰ ਧੱਕਾ ਲਾਉਂਦੇ ਸਮੇਂ ਕੰਟਰੋਲ ਤੋਂ ਬਾਹਰ ਹੋਈ ਬਸ ਦੀ ਬ੍ਰੇਕ ਨੇ ਕੰਮ ਛੱਡ ਦਿੱਤਾ ਜਿਸ ਕਾਰਨ ਬਸ ਬੜੀ ਤੇਜ਼ੀ ਨਾਲ ਦੌੜਦੀ ਬਿਜਲੀ ਦੇ ਖੰਭੇ ਨਾਲ ਟਕਰਾਉਣ ਪਿੱਛੋਂ ਪਲਟ ਗਈ। ਇਸ ਕਾਰਨ ਇੱਕ ਮਹਿਲਾ ਬਲਜੀਤ ਕੌਰ ਦੀ ਮੌਤ ਹੋ ਗਈ ਅਤੇ ਦੋ ਹੋਰ ਯਾਤਰੀ ਗੰਭੀਰ ਜ਼ਖਮੀ ਹੋਣ ਕਾਰਨ ਉਨ੍ਹਾਂ ਨੂੰ ਪੀ ਜੀ ਆਈ ਰੈਫਰ ਕਰ ਦਿੱਤਾ ਗਿਆ।