ਬਠਿੰਡਾ, 23 ਜੂਨ (ਪੋਸਟ ਬਿਊਰੋ)- ਪਿੰਡ ਚੁੱਘੇ ਖੁਰਦ ਦੇ ਇੱਕ ਕਿਸਾਨ ਦੀ ਦਿਮਾਗੀ ਪ੍ਰੇਸ਼ਾਨੀ ਦਾ ਲਾਭ ਉਠਾ ਕੇ ਇੱਕ ਆਰ ਐੱਮ ਪੀ ਡਾਕਟਰ ਨੇ ਉਸ ਦੀ ਜ਼ਮੀਨ ਧੋਖੇ ਨਾਲ ਆਪਣੇ ਨਾਂ ਕਰਵਾਈ ਅਤੇ ਬੈਂਕ ਲਿਮਟ ਦੇ ਰੁਪਏ ਕਢਵਾ ਕੇ 56 ਲੱਖ 50 ਹਜ਼ਾਰ ਦੀ ਠੱਗੀ ਦਾ ਮਾਰ ਲਈ ਹੈ।
ਥਾਣਾ ਨੰਦਗੜ੍ਹ ਦੇ ਐੱਸ ਆਈ ਜਸਪਾਲ ਸਿੰਘ ਦੇ ਮੁਤਾਬਕ ਗੁਰਪ੍ਰਕਾਸ਼ ਸਿੰਘ ਪਿੰਡ ਚੁੱਘੇ ਖੁਰਦ ਨੇ ਸ਼ਿਕਾਇਤ ਦਿੱਤੀ ਹੈ ਕਿ ਉਸ ਦੀ ਮਾਤਾ ਅਤੇ ਭੈਣ ਪਿਛਲੇ ਕਾਫੀ ਸਮੇਂ ਤੋਂ ਬਿਮਾਰ ਸਨ, ਜਿਨ੍ਹਾਂ ਦਾ ਇਲਾਜ ਪਿੰਡ ਦਾ ਆਰ ਐਮ ਪੀ ਡਾਕਟਰ ਰਾਜਵਿੰਦਰ ਸਿੰਘ ਕਰ ਰਿਹਾ ਸੀ। ਗੁਰਪ੍ਰਕਾਸ਼ ਸਿੰਘ ਦੀ ਮਾਤਾ ਅਤੇ ਭੈਣ ਦੇ ਬਿਮਾਰ ਰਹਿਣ ਕਾਰਨ ਉਹ ਖੁਦ ਵੀ ਦਿਮਾਗੀ ਤੌਰ 'ਤੇ ਪ੍ਰੇਸ਼ਾਨ ਰਹਿਣ ਲੱਗ ਪਿਆ ਤੇ ਉਸ ਦਾ ਇਲਾਜ ਵੀ ਰਾਜਵਿੰਦਰ ਸਿੰਘ ਨੇ ਕਰਨਾ ਸ਼ੁਰੂ ਕਰ ਦਿੱਤਾ, ਜਿਸ ਕਾਰਨ ਡਾਕਟਰ ਦਾ ਉਸ ਦੇ ਘਰ ਆਉਣਾ ਜਾਣਾ ਹੋ ਗਿਆ। ਇਸ ਤਰ੍ਹਾਂ ਡਾਕਟਰ ਨੇ ਉਸ ਨਾਲ ਘਰੇਲੂ ਸੰਬੰਧ ਬਣਾ ਲਏ। ਕਿਸਾਨ ਨੇ ਦੱਸਿਆ ਕਿ ਬਿਮਾਰੀ ਕਾਰਨ ਉਹ ਆਪਣਾ ਜ਼ਿਆਦਾ ਕੰਮ ਡਾਕਟਰ ਤੋਂ ਕਰਾਉਣ ਲੱਗ ਪਿਆ, ਜਿਸ ਦਾ ਲਾਭ ਉਠਾ ਕੇ ਡਾਕਟਰ ਨੇ ਉਸ ਨੂੰ ਧੋਖੇ ਵਿੱਚ ਰੱਖ ਕੇ ਉਸ ਦੀ ਜ਼ਮੀਨ ਆਪਣੇ ਨਾਂਅ ਕਰਵਾ ਲਈ ਤੇ ਬੈਂਕ ਲਿਮਟ ਵਿੱਚੋਂ ਵੱਖ-ਵੱਖ ਸਮੇਂ ਪੈਸੇ ਕਢਵਾ ਕੇ ਉਸ ਨਾਲ 56 ਲੱਖ 50 ਹਜ਼ਾਰ ਰੁਪਏ ਦੀ ਠੱਗੀ ਮਾਰ ਲਈ ਹੈ। ਕਿਸਾਨ ਨੇ ਦੱਸਿਆ ਕਿ ਉਸ ਨੂੰ ਇਸ ਠੱਗੀ ਦਾ ਓਦੋਂ ਪਤਾ ਲੱਗਾ ਜਦ ਉਹ ਬੈਂਕ ਵਿੱਚ ਰੁਪਏ ਕਢਵਾਉਣ ਗਿਆ ਤਾਂ ਬੈਂਕ ਵਾਲਿਆਂ ਨੇ ਦੱਸਿਆ ਕਿ ਡਾਕਟਰ ਕੁਝ ਦਿਨ ਪਹਿਲਾਂ 11 ਲੱਖ ਰੁਪਏ ਖਾਤੇ ਵਿੱਚੋਂ ਕਢਵਾ ਕੇ ਲੈ ਗਿਆ ਹੈ। ਸਬ ਇੰਸਪੈਕਟਰ ਜਸਪਾਲ ਸਿੰਘ ਨੇ ਦੱਸਿਆ ਕਿ ਦੋਸ਼ੀ ਰਾਜਵਿੰਦਰ ਸਿੰਘ ਖਿਲਾਫ ਧੋਖਾਧੜੀ ਦਾ ਕੇਸ ਦਰਜ ਕਰ ਕੇ ਉਸ ਦੀ ਭਾਲ ਸ਼ੁਰੂ ਕਰ ਦਿੱਤੀ ਹੈ।