ਵਾਸ਼ਿੰਗਟਨ, 23 ਜੂਨ, (ਪੋਸਟ ਬਿਊਰੋ)- ਨਿਊਯਾਰਕ ਦੀ ਲੇਖਿਕਾ ਤੇ ਲੰਬੇ ਸਮੇਂ ਤੱਕ ਔਰਤਾਂ ਲਈ ਸਲਾਹਾਂ ਦਾ ਕਾਲਮ ਲਿੱਖਣ ਵਾਲੀ ਈ. ਜੀਨ ਕੈਰੋਲ ਨੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਉੱਤੇ ਸੈਕਸ ਸ਼ੋਸ਼ਣ ਦਾ ਦੋਸ਼ ਲਾਇਆ ਹੈ। ਕੈਰੋਲ ਨੇ ਇਕ ਕਿਤਾਬ ਵਿੱਚ ਇਸ ਘਟਨਾ ਨਾਲ ਸੰਬੰਧਤ ਹਵਾਲਾ ਦਿੱਤਾ ਹੈ, ਜਿਸ ਦੇ ਹਿੱਸੇ ਨਿਊਯਾਰਕ ਮੈਗਜ਼ੀਨ ਵਿੱਚ ਇਸ ਸ਼ੁੱਕਰਵਾਰ ਨੂੰ ਛਪੇ ਹਨ। ਇਨ੍ਹਾਂ ਵਿੱਚ ਕਿਹਾ ਗਿਆ ਹੈ ਕਿ ਮੈਨਹੱਟਨ ਦੇ ਇਕ ਡਿਪਾਰਟਮੈਂਟਲ ਸਟੋਰ ਦੇ ਡ੍ਰੈਸਿੰਗ ਰੂਮ ਵਿੱਚ 2 ਦਹਾਕੇ ਪਹਿਲਾਂ ਟਰੰਪ ਨੇ ਕੈਰੋਲ ਦਾ ਸੈਕਸ ਸ਼ੋਸ਼ਣ ਕੀਤਾ ਸੀ।
ਇਸ ਸ਼ੁੱਕਰਵਾਰ ਵਾਸ਼ਿੰਗਟਨ ਪੋਸਟ ਨਾਲ ਇਕ ਇੰਟਰਵਿਊ ਵਿੱਚ ਕੈਰੋਨ ਨੇ ਕਿਹਾ ਕਿ ਸਾਲ 1995 ਦੇ ਅੰਤ ਜਾਂ 1996 ਦੇ ਸ਼ੁਰੂ ਵਿੱਚ ਬਰਗਡਾਰਫ ਗੁਡਮੈਨ ਵਿੱਚ ਓਦੋਂ ਦੇ ਰੀਅਲ ਅਸਟੇਟ ਡਿਵੈਲਪਰ ਨਾਲ ਬੈਠਕ ਦੌਰਾਨ ਟਰੰਪ ਨੇ ਡ੍ਰੈਸਿੰਗ ਰੂਮ ਵਿੱਚ ਉਨ੍ਹਾਂ ਉੱਤੇ ਹਮਲਾ ਕੀਤਾ ਸੀ। ਲੇਖਿਕਾ ਨੇ ਕਿਹਾ ਕਿ ਟਰੰਪ ਨੇ ਉਸ ਦਾ ਸਿਰ ਕੰਧ ਨਾਲ ਲਾ ਦਿੱਤਾ ਤੇ ਸੈਕਸ ਸ਼ੋਸ਼ਣ ਕੀਤਾ ਸੀ, ਪਰ ਉਹ ਟਰੰਪ ਨੂੰ ਧੱਕਾ ਦੇ ਕੇ ਉਥੋਂ ਕਿਸੇ ਤਰ੍ਹਾਂ ਭੱਜ ਨਿਕਲੀ ਸੀ।
ਇਸ ਵਕਤ 75 ਸਾਲ ਦੀ ਹੋ ਚੁੱਕੀ ਕੈਰੋਲ ਨੇ ਕਿਹਾ ਕਿ ਉਸ ਨੇ ਓਦੋਂ ਇਸ ਘਟਨਾ ਬਾਰੇ 2 ਕਰੀਬੀ ਦੋਸਤਾਂ ਨੂੰ ਦੱਸਿਆ ਸੀ। ਉਨ੍ਹਾਂ ਵਿੱਚੋਂ ਇਕ ਨੇ ਇਸ ਸ਼ੁੱਕਰਵਾਰ ਮੰਨਿਆ ਕਿ ਕੈਰੋਲ ਨੇ ਘਟਨਾ ਤੋਂ ਬਾਅਦ ਇਹ ਜਾਣਕਾਰੀ ਦਿੱਤੀ ਸੀ। ਉਸ ਨੇ ਕੈਰੋਲ ਨੂੰ ਪੁਲਸ ਕੋਲ ਜਾਣ ਨੂੰ ਕਿਹਾ ਸੀ, ਪਰ ਉਹ ਨਹੀਂ ਗਈ। ਲੇਖਿਕਾ ਨੇ ਕਿਹਾ ਕਿ ਉਸ ਨੂੰ ਆਸ ਹੈ ਕਿ ਉਸ ਦੀ ਕਹਾਣੀ ਤੋਂ ਔਰਤਾਂ ਮਜ਼ਬੂਤ ਹੋਣਗੀਆਂ ਤੇ ਇਨ੍ਹਾਂ ਘਟਨਾਵਾਂ ਬਾਰੇ ਅੱਗੇ ਆਉਣਗੀਆਂ। ਉਸ ਦਾ ਕਹਿਣਾ ਹੈ ਕਿ ਇਸ ਘਟਨਾ ਪਿੱਛੋਂ ਮੈਂ ਖੁਦ ਨੂੰ ਦੋਸ਼ੀ ਮੰਨਿਆ ਅਤੇ ਚੁੱਪ ਰਹੀ ਅਤੇ ਮੈਨੂੰ ਦੋਸ਼ੀ ਮਹਿਸੂਸ ਹੋਇਆ।
ਇਹ ਦੋਸ਼ ਲੱਗਣ ਤੋਂ ਬਾਅਦ ਡੋਨਾਲਡ ਟਰੰਪ ਨੇ ਇਨਾਂ ਨੂੰ ਰੱਦ ਕੀਤਾ ਅਤੇ ਇੱਕ ਬਿਆਨ ਵਿੱਚ ਇਸ ਨੂੰ ‘ਫੇਕ ਨਿਊਜ਼` ਕਹਿ ਕੇ ਸਵਾਲ ਕੀਤਾ ਕਿ ਇਸ ਘਟਨਾ ਦਾ ਕੋਈ ਸਬੂਤ ਜਾਂ ਗਵਾਹ ਕਿਉਂ ਨਹੀਂ ਹੈ। ਉਸ ਨੇ ਕਿਹਾ ਕਿ ਕੋਈ ਸਰਵੀਲਾਂਸ ਨਹੀਂ, ਕੋਈ ਵੀਡੀਓ ਨਹੀਂ, ਕੋਈ ਰਿਪੋਰਟ ਨਹੀਂ? ਟਰੰਪ ਨੇ ਇਸ ਬਿਆਨ ਵਿੱਚ ਕਿਹਾ ਕਿ ਮੈਂ ਕਦੇ ਇਸ ਮਹਿਲਾ ਨੂੰ ਨਹੀਂ ਮਿਲਿਆ। ਉਸ ਨੇ ਕਿਹਾ ਕਿ ਕੈਰੋਲ ਆਪਣੀ ਨਵੀਂ ਕਿਤਾਬ ਵੇਚਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਇਸ ਨੂੰ ਫਿਕਸ਼ਨ ਸੈਕਸ਼ਨ ਵਿੱਚ ਵੇਚਿਆ ਜਾਣਾ ਚਾਹੀਦਾ ਹੈ।