ਸਰ੍ਹੀ, 23 ਜੂਨ (ਪੋਸਟ ਬਿਊਰੋ) : ਕਿਰਨ ਢੇਸੀ ਕਤਲ ਕਾਂਡ ਵਿੱਚ ਇੱਕੋ ਪਰਿਵਾਰ ਦੇ ਪੰਜ ਜੀਆਂ ਨੂੰ ਚਾਰਜ ਕੀਤਾ ਗਿਆ ਹੈ।
ਇੰਟੇਗ੍ਰੇਟਿਡ ਹੋਮੀਸਾਈਡ ਇਨਵੈਸਟੀਗੇਸ਼ਨ ਟੀਮ (ਆਈਐਚਆਈਟੀ) ਦਾ ਕਹਿਣਾ ਹੈ ਕਿ 25 ਸਾਲਾ ਗੁਰਵਿੰਦਰ ਦਿਓ ਤੇ 22 ਸਾਲਾ ਤਲਵਿੰਦਰ ਖੁਨ ਖੁਨ ਨੂੰ ਸੁ਼ੱਕਰਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਦੋਵਾਂ ਵਿਅਕਤੀਆਂ ਉੱਤੇ ਕਤਲ ਵਿੱਚ ਮਦਦ ਕਰਨ ਤੇ ਮਨੁੱਖੀ ਅਸਥੀਆਂ ਦੀ ਬੇਅਦਬੀ ਕਰਨ ਦਾ ਦੋਸ਼ ਹੈ। ਆਈਐਚਆਈਟੀ ਵੱਲੋਂ ਇੱਕ ਹੋਰ 21 ਸਾਲਾ ਵਿਅਕਤੀ ਉੱਤੇ ਢੇਸੀ ਨੂੰ ਕਤਲ ਕਰਨ ਦੇ ਚਾਰਜ ਲਾਏ ਗਏ ਹਨ। 21 ਸਾਲਾ ਹਰਜੋਤ ਸਿੰਘ ਦਿਓ ਉੱਤੇ ਪਹਿਲਾਂ ਸੈਕਿੰਡ ਡਿਗਰੀ ਮਰਡਰ ਦਾ ਚਾਰਜ ਸੀ ਤੇ ਹੁਣ ਉਸ ਉੱਤੇ ਮਨੁੱਖੀ ਅਸਥੀਆਂ ਨਾਲ ਛੇੜਛਾੜ ਕਰਨ ਦਾ ਚਾਰਜ ਵੀ ਲਾਇਆ ਗਿਆ ਹੈ।
ਆਈਐਚਆਈਟੀ ਦੇ ਕਾਰਪੋਰਲ ਡੇਵਿਡ ਲੀ ਨੇ ਦੱਸਿਆ ਕਿ ਆਈਐਚਆਈਟੀ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਜਾਂਦੀ ਹੈ ਕਿ ਗੁਰਵਿੰਦਰ ਦਿਓ, ਹਰਜੋਤ ਦਿਓ ਦਾ ਭਰਾ ਹੈ ਤੇ ਤਲਵਿੰਦਰ ਖੁਨ ਖੁਨ ਉਨ੍ਹਾਂ ਦਾ ਰਿਸ਼ਤੇਦਾਰ ਹੈ। ਹਰਜੋਤ ਉੱਤੇ ਅਗਸਤ 2017 ਵਿੱਚ 19 ਸਾਲਾ ਕਿਰਨ ਢੇਸੀ ਦਾ ਕਤਲ ਕਰਨ ਦਾ ਦੋਸ਼ ਲੱਗਿਆ ਸੀ। ਉਸ ਸਮੇਂ ਢੇਸੀ ਕਾਲਜ ਦੀ ਵਿਦਿਆਰਥਣ ਸੀ ਤੇ ਉਸ ਦੇ ਕਦੇ ਹਰਜੋਤ ਨਾਲ ਦੋਸਤਾਨਾ ਸਬੰਧ ਸਨ। ਉਸ ਦੀ ਲਾਸ਼ ਸਰ੍ਹੀ ਵਿੱਚ ਇੱਕ ਸੜਦੀ ਹੋਈ ਐਸਯੂਵੀ ਵਿੱਚੋਂ ਮਿਲੀ ਸੀ।
ਇਸ ਮਾਮਲੇ ਵਿੱਚ ਹਰਜੋਤ ਦੇ ਪਰਿਵਾਰ ਦੇ ਦੋ ਹੋਰ ਮੈਂਬਰ, ਉਸ ਦੀ ਵੱਡੀ ਭੈਣ ਇੰਦਰਦੀਪ ਦਿਓ ਤੇ ਉਸ ਦੀ ਮਾਂ ਮਜੀਤ ਕੌਰ ਦਿਓ ਨੂੰ ਵੀ ਇਸ ਮਾਮਲੇ ਵਿੱਚ ਚਾਰਜ ਕੀਤਾ ਗਿਆ ਹੈ। ਦੋਵਾਂ ਉੱਤੇ ਹਰਜੋਤ ਨੂੰ ਕਾਨੂੰਨ ਦੀ ਗ੍ਰਿਫਤ ਤੋਂ ਬਚਾਉਣ ਵਿੱਚ ਮਦਦ ਕਰਨ ਦਾ ਦੋਸ਼ ਹੈ। ਕਾਰਪੋਰਲ ਲੀ ਨੇ ਆਖਿਆ ਕਿ ਅਜੇ ਵੀ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ ਇਹ ਖ਼ਤਮ ਨਹੀਂ ਹੋਈ। ਜੇ ਇਸ ਮਾਮਲੇ ਨਾਲ ਸਬੰਧਤ ਕੋਈ ਹੋਰ ਵਿਅਕਤੀ ਵੀ ਕਸੂਰਵਾਰ ਹੈ ਤਾਂ ਉਸ ਨੂੰ ਜਲਦ ਗ੍ਰਿਫਤਾਰ ਕਰ ਲਿਆ ਜਾਵੇਗਾ। ਉਨ੍ਹਾਂ ਆਖਿਆ ਕਿ ਹਾਲ ਦੀ ਘੜੀ ਇਹ ਆਖਣਾ ਜਲਦਬਾਜ਼ੀ ਹੋਵੇਗੀ ਕਿ ਕਿਸੇ ਹੋਰ ਨੂੰ ਵੀ ਇਸ ਮਾਮਲੇ ਵਿੱਚ ਗ੍ਰਿਫਤਾਰ ਕੀਤਾ ਜਾਵੇਗਾ ਜਾਂ ਨਹੀਂ।