ਓਨਟਾਰੀਓ, 23 ਜੂਨ (ਪੋਸਟ ਬਿਊਰੋ) : ਪ੍ਰੀਮੀਅਰ ਡੱਗ ਫੋਰਡ ਨੇ ਸ਼ਨਿੱਚਰਵਾਰ ਨੂੰ ਆਪਣੇ ਸਾਲਾਨਾ ਫੋਰਡ ਫੈਸਟ ਵਿੱਚ ਹਿੱਸਾ ਲੈਣ ਆਏ ਇੱਕਠ ਨੂੰ ਸੰਬੋਧਨ ਕਰਦਿਆਂ ਆਖਿਆ ਕਿ ਪਹਿਲੇ ਸਾਲ ਉਨ੍ਹਾਂ ਦੀ ਸਰਕਾਰ ਨੇ ਤੇਜ਼ੀ ਨਾਲ ਕੰਮ ਕੀਤੇ। ਇਸ ਦੇ ਨਾਲ ਹੀ ਆਪਣੇ ਆਲੋਚਕਾਂ ਦਾ ਮੂੰਹ ਬੰਦ ਕਰਵਾਉਂਦਿਆਂ ਫੋਰਡ ਨੇ ਆਖਿਆ ਕਿ ਜਿਹੜੇ ਉਨ੍ਹਾਂ ਦਾ ਭਵਿੱਖ ਗੰਧਲਾ ਦੱਸਦੇ ਹਨ ਉਹ ਗ਼ਲਤ ਹਨ।
ਨਥਾਨ ਫਿਲਿਪ ਸਕੁਏਅਰ ਉੱਤੇ ਰੈਪਟਰਜ਼ ਦੇ ਚੈਂਪੀਅਨਸਿ਼ਪ ਜਸ਼ਨਾਂ ਦੌਰਾਨ ਫੋਰਡ ਖਿਲਾਫ ਰੌਲਾ ਪਾਉਣ ਵਾਲਿਆਂ, ਵੱਡੇ ਕੈਬਨਿਟ ਫੇਰਬਦਲ-ਜਿੱਥੇ ਪ੍ਰੀਮੀਅਰ ਨੇ ਆਪਣੇ ਵਿੱਤ ਮੰਤਰੀ ਨੂੰ ਡੀਮੋਟ ਕੀਤਾ ਤੇ ਫਿਰ ਉਨ੍ਹਾਂ ਦਾ ਚੀਫ ਆਫ ਸਟਾਫ ਹੀ ਉਨ੍ਹਾਂ ਨੂੰ ਛੱਡ ਗਿਆ, ਆਦਿ ਵਰਗੇ ਮੁੱਦਿਆਂ ਉੱਤੇ ਆਲੋਚਨਾ ਸਹਿ ਰਹੇ ਫੋਰਡ ਨੂੰ ਲੋਅ ਇਨਕਮ ਟੈਕਸ ਕਟੌਤੀਆਂ, ਡੇਅ ਕੇਅਰ ਟੈਕਸ ਕ੍ਰੈਡਿਟ ਆਦਿ ਵਰਗੇ ਮੁੱਦਿਆਂ ਉੱਤੇ ਸ਼ਲਾਘਾ ਵੀ ਸੁਣਨ ਨੂੰ ਮਿਲੀ। ਇਸ ਮੌਕੇ ਫੋਰਡ ਨੇ ਆਖਿਆ ਕਿ ਅਸੀਂ ਜਾਣਦੇ ਹਾਂ ਕਿ ਜਦੋਂ ਇਹ ਆਲੋਚਕ ਸਾਡੇ ਉੱਤੇ ਵਰ੍ਹਨਗੇ ਤਾਂ ਸਾਡੀ ਪਿੱਠ ਉੱਤੇ ਤੁਸੀਂ ਸਾਰੇ ਹੋਵੋਂਗੇ। ਸਾਡੇ ਲਈ ਸਿਰਫ ਇਹੀ ਗੱਲ ਮਾਇਨੇ ਰੱਖਦੀ ਹੈ। ਉਨ੍ਹਾਂ ਆਖਿਆ ਕਿ ਅਸੀਂ ਸਿਰਫ ਓਨਟਾਰੀਓ ਦੇ ਲੋਕਾਂ ਲਈ ਜਵਾਬਦੇਹ ਹਾਂ ਤੇ ਸਿਰਫ ਇਹੀ ਸਾਡੇ ਲਈ ਮਾਇਨੇ ਰੱਖਦੇ ਹਨ। ਉਨ੍ਹਾਂ ਆਪਣੇ ਆਲੋਚਕਾਂ ਨੂੰ ਮੀਡੀਆ ਪਾਰਟੀ ਦੱਸਿਆ।
ਨਵੇਂ ਟੈਕਸ ਕ੍ਰੈਡਿਟਸ ਤੋਂ ਇਲਾਵਾ ਫੋਰਡ ਨੇ ਹਾਈਡਰੋ ਵੰਨ ਦੇ ਸੀਈਓ, ਜਿਸ ਨੂੰ ਉਹ ਛੇ ਮਿਲੀਅਨ ਡਾਲਰ ਮੈਨ ਆਖਦੇ ਸਨ, ਮੇਓ ਸ਼ਮਿਡਟ ਨੂੰ ਚੱਲਦਾ ਕਰਨ, ਕੈਪ ਐਂਡ ਟਰੇਡ ਕਾਰਬਨ ਸਕੀਮ ਨੂੰ ਖ਼ਤਮ ਕਰਨ ਨੂੰ ਫੋਰਡ ਆਪਣੀ ਸਰਕਾਰ ਦੀ ਵੱਡੀ ਪ੍ਰਾਪਤੀ ਦੱਸਦੇ ਹਨ। ਇਸ ਤੋਂ ਇਲਾਵਾ ਫੋਰਡ ਨੇ ਹੁੱਭ ਕੇ ਦੱਸਿਆ ਕਿ ਇੱਕ ਸਾਲ ਪਹਿਲਾਂ ਨਾਲੋਂ ਸਾਡੇ ਕੋਲ ਹੁਣ 190,000 ਵਧੇਰੇ ਰੋਜ਼ਗਾਰ ਦੇ ਮੌਕੇ ਹਨ।
ਸ਼ਨਿੱਚਰਵਾਰ ਨੂੰ ਕਰਵਾਇਆ ਗਿਆ ਇਹ ਈਵੈਂਟ ਫਰੀ ਤੇ ਸਾਰਿਆਂ ਲਈ ਖੁੱਲ੍ਹਾ ਸੀ ਪਰ ਪਿਛਲੇ ਸਾਲਾਂ ਦੇ ਮੁਕਾਬਲੇ ਇਸ ਸਾਲ ਇਸ ਈਵੈਂਟ ਵਿੱਚ ਹਿੱਸਾ ਲੈਣ ਵਾਲਿਆਂ ਨੂੰ ਟਿਕਟਾਂ ਰਜਿਸਟਰ ਕਰਵਾਉਣੀਆਂ ਪਈਆਂ ਤੇ ਇਸ ਵਾਰੀ ਕਿਸੇ ਦੇ ਵੀ ਇਸ ਈਵੈਂਟ ਵਿੱਚ ਹਿੱਸਾ ਲੈਣ ਲਈ ਐਂਟਰੀ ਉੱਤੇ ਰੋਕ ਲਾਈ ਜਾ ਸਕਦੀ ਸੀ। ਇਸ ਵਾਰੀ 6 ਜੂਨ ਨੂੰ ਵਿਧਾਨਸਭਾ ਉਠਾਅ ਦਿੱਤੀ ਗਈ ਤੇ ਹੁਣ ਇਸ ਦੀ ਅਗਲੀ ਕਾਰਵਾਈ 29 ਅਕਤੂਬਰ ਨੂੰ ਹੋਣ ਵਾਲੀਆਂ ਫੈਡਰਲ ਚੋਣਾਂ ਤੋਂ ਬਾਅਦ ਹੀ ਸੁ਼ਰੂ ਹੋਵੇਗੀ।