ਓਟਵਾ, 23 ਜੂਨ (ਪੋਸਟ ਬਿਊਰੋ) : ਫੈਡਰਲ ਕੰਜ਼ਰਵੇਟਿਵ ਆਗੂ ਐਂਡਰਿਊ ਸ਼ੀਅਰ ਵੱਲੋਂ ਇਹ ਸਵੀਕਾਰ ਕੀਤਾ ਗਿਆ ਹੈ ਕਿ ਵੱਡੇ ਪੌਲਿਊਟਰਜ਼ ਉੱਤੇ ਪ੍ਰਦੂਸ਼ਣ ਘਟਾਉਣ ਲਈ ਜਿਹੜੀ ਰੋਕ ਲਾਈ ਜਾਵੇਗੀ ਉਸ ਤਹਿਤ ਸਰਕਾਰ ਵਾਧੂ ਦੇ ਪ੍ਰਤੀ ਟੰਨ ਰਿਸਾਅ ਉੱਤੇ ਲਾਗਤ ਤੈਅ ਕਰੇਗੀ। ਪਰ ਸ਼ੀਅਰ ਉਸ ਨੂੰ ਕੀਮਤ ਮੰਨਣ ਤੋਂ ਇਨਕਾਰ ਕਰਦੇ ਹਨ।
ਉਨ੍ਹਾਂ ਦੀ ਯੋਜਨਾ ਤਹਿਤ ਵੱਡੀ ਪੱਧਰ ਉੱਤੇ ਪ੍ਰਦੂਸ਼ਣ ਫੈਲਾਉਣ ਵਾਲਿਆਂ, ਜੋ ਕਿ ਸਾਲ ਵਿੱਚ 40 ਕਿਲੋਟੰਨ ਤੋਂ ਵੱਧ ਪ੍ਰਦੂਸ਼ਣ ਫੈਲਾਉਂਦੇ ਹਨ, ਨੂੰ ਹੱਦ ਨਾਲੋਂ ਜਿ਼ਆਦਾ ਪ੍ਰਦੂਸ਼ਣ ਫੈਲਾਉਣ ਬਦਲੇ ਪ੍ਰਮਾਣਿਤ ਰਿਸਾਅ ਘਟਾਉਣ ਵਾਲੀ ਤਕਨਾਲੋਜੀ ਵਿੱਚ ਮੁੜ ਨਿਵੇਸ਼ ਕਰਨਾ ਹੋਵੇਗਾ। ਇਸ ਲਈ ਉਨ੍ਹਾਂ ਨੂੰ ਸਰਕਾਰ ਕੋਲ ਜੁਰਮਾਨੇ ਨਹੀਂ ਭਰਨੇ ਹੋਣਗੇ। ਇੱਕ ਇੰਟਰਵਿਊ ਵਿੱਚ ਸ਼ੀਅਰ ਨੇ ਆਖਿਆ ਕਿ ਜੇ ਉਹ ਪ੍ਰਧਾਨ ਮੰਤਰੀ ਚੁਣ ਲਏ ਜਾਂਦੇ ਹਨ ਤਾਂ ਉਨ੍ਹਾਂ ਦੀ ਸਰਕਾਰ ਰਿਸਾਅ ਸਬੰਧੀ ਟੀਚੇ ਤੈਅ ਕਰੇਗੀ। ਸਵੱਛ ਊਰਜਾ ਉੱਤੇ ਅਜਿਹੀਆਂ ਕੰਪਨੀਆਂ ਤੇ ਫੈਕਟਰੀਆਂ ਨੂੰ ਜਿਹੜੀ ਰਕਮ ਖਰਚਣੀ ਹੋਵੇਗੀ ਇਹ ਉਨ੍ਹਾਂ ਦੀ ਸਰਕਾਰ ਤੈਅ ਕਰੇਗੀ। ਪਰ ਉਨ੍ਹਾਂ ਇਸ ਨੂੰ ਟੈਕਸ ਜਾਂ ਕੀਮਤ ਆਖਣ ਤੋਂ ਇਨਕਾਰ ਕੀਤਾ।
ਉਨ੍ਹਾਂ ਆਖਿਆ ਕਿ ਟੈਕਸ ਤੇ ਉਨ੍ਹਾਂ ਦੀ ਯੋਜਨਾ ਵਿੱਚ ਵੱਡਾ ਅੰਤਰ ਇਹ ਹੈ ਕਿ ਸਰਕਾਰ ਇਸ ਤੋਂ ਕੋਈ ਆਮਦਨ ਨਹੀਂ ਹਾਸਲ ਕਰੇਗੀ। ਇਹ ਇੱਕ ਪ੍ਰਕਿਰਿਆ ਹੈ, ਇੱਕ ਮੈਕੇਨਿਜ਼ਮ ਹੈ ਜਿੱਥੇ ਅਜਿਹੇ ਪ੍ਰਦੂਸ਼ਣ ਫੈਲਾਉਣ ਵਾਲੇ ਲੋਕ ਰਿਸਾਅ ਨੂੰ ਘੱਟ ਕਰਨ ਲਈ ਨਿਵੇਸ਼ ਕਰ ਸਕਣਗੇ। ਸ਼ੀਅਰ ਇਸ ਨੂੰ ਕਾਰਬਨ ਟੈਕਸ ਤੋਂ ਬਿਨਾਂ ਪੈਰਿਸ ਸਮਝੌਤੇ ਦੇ ਟੀਚਿਆਂ ਦੀ ਪ੍ਰਾਪਤੀ ਲਈ ਕੈਨੇਡਾ ਦਾ ਬਿਹਤਰੀਨ ਮੌਕਾ ਦੱਸ ਰਹੇ ਹਨ। ਪਰ ਉਨ੍ਹਾਂ ਦੀਆਂ ਨੀਤੀਆਂ ਕਿੰਨੀਆਂ ਸਫਲ ਹੋਣਗੀਆਂ ਇਸ ਬਾਰੇ ਆਰਥਿਕ ਤੌਰ ਉੱਤੇ ਉਨ੍ਹਾਂ ਵੱਲੋਂ ਕੋਈ ਅੰਦਾਜ਼ਾ ਨਹੀਂ ਦਿੱਤਾ ਗਿਆ।