ਲੰਡਨ, 21 ਜੂਨ (ਪੋਸਟ ਬਿਊਰੋ)- ਛੁੱਟੀਆਂ ਬਿਤਾਉਣ ਲਈ ਆਇਰਲੈਂਡ ਵਿੱਚ ਗਏ ਭਾਰਤੀ ਪਰਿਵਾਰ ਨਾਲ ਨਸਲੀ ਬਦਸਲੂਕੀ ਦਾ ਕੇਸ ਸਾਹਮਣੇ ਆਇਆ ਹੈ। ਮੀਡੀਆ ਰਿਪੋਰਟ ਅਨੁਸਾਰ ਡਬਲਿਨ ਜਾਣ ਵਾਲੀ ਟ੍ਰੇਨ ਵਿੱਚ ਸਵਾਰ ਨਸ਼ੇ ਵਿੱਚ ਇਕ ਸ਼ਖ਼ਸ ਨੇ ਕਰੀਬ ਘੰਟਾ ਭਰ ਇਸ ਭਾਰਤੀ ਪਰਿਵਾਰ ਉੱਤੇ ਬੋਲਣ ਦੇ ਢੰਗ, ਰੰਗ ਅਤੇ ਦੇਸ਼ ਬਾਰੇ ਨਸਲੀ ਟਿੱਪਣੀ ਕੀਤੀ, ਜਿਸ ਦੀ ਚਰਚਾ ਦੇ ਬਾਅਦ ਵਿਵਾਦ ਛਿੜ ਗਿਆ ਹੈ।
ਪਤਾ ਲੱਗਾ ਹੈ ਕਿ ਤਿੰਨ ਦਿਨਾਂ ਲਈ ਆਇਰਲੈਂਡ ਘੁੰਮਣ ਗਏ ਪ੍ਰਸੂਨ ਭੱਟਾਚਾਰੀਆ ਨਾਲ ਉਨ੍ਹਾਂ ਦਾ ਪਰਿਵਾਰ ਵੀ ਸੀ। ਉਹ ਬੈਲਫਾਸਟ ਤੋਂ ਡਬਲਿਨ ਚੱਲੀ ਟ੍ਰੇਨ ਵਿੱਚ ਸਵਾਰ ਸਨ, ਜਦੋਂ ਉਨ੍ਹਾਂ ਨਾਲ ਨਸਲੀ ਬਦਸਲੂਕੀ ਦੀ ਘਟਨਾ ਹੋਈ। ਇੱਕ ਰਿਪੋਰਟ ਅਨੁਸਾਰ ਭੱਟਾਚਾਰੀਆ ਨੇ ਕਿਹਾ ਕਿ ਉਸ ਸ਼ਖ਼ਸ ਨੇ ਉਨ੍ਹਾਂ ਦੇ ਪਰਿਵਾਰ ਉੱਤੇ ਰੰਗ ਅਤੇ ਹੋਰ ਚੀਜ਼ਾਂ ਬਾਰੇ ਨਸਲੀ ਟਿੱਪਣੀਆਂ ਕੀਤੀਆਂ। ਭੱਟਾਚਾਰੀਆ ਦਾ ਕਹਿਣਾ ਹੈ ਕਿ ਇਸ ਸ਼ਖ਼ਸ ਨੇ ਬੀਅਰ ਪੀਤੀ ਹੋਈ ਸੀ, ਇਸ ਲਈ ਉਹ ਨਸ਼ੇ ਦੀ ਹਾਲਤ ਵਿੱਚ ਸੀ। ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨਾਲ ਬੈਠਾ ਉਹ ਸ਼ਖ਼ਸ ਪੂਰੇ ਰਸਤੇ ਉਨ੍ਹਾਂ ਅਤੇ ਉਨ੍ਹਾਂ ਦੇ ਪਰਿਵਾਰ ਬਾਰੇ ਅਜਿਹੇ ਕਮੈਂਟ ਕਰਦਾ ਰਿਹਾ ਤਾਂ ‘ਸਾਨੂੰ ਬਹੁਤ ਬੁਰਾ ਲੱਗਾ।` ਇਸੇ ਟ੍ਰੇਨ ਦੇ ਸਵਾਰ ਇਕ ਹੋਰ ਯਾਤਰੀ, ਪੀਟਰ ਨੇ ਦੱਸਿਆ ਕਿ ਇਸ ਦੌਰਾਨ ਟ੍ਰੇਨ ਗਾਰਡ ਓਥੋਂ ਗੁਜ਼ਰਿਆ, ਪਰ ਇਸ ਵਿੱਚ ਉਸ ਨੇ ਦਖ਼ਲ ਨਹੀਂ ਦਿੱਤਾ, ਸਿਰਫ਼ ਉਸ ਸ਼ਖ਼ਸ ਨੂੰ ਬੈਠ ਜਾਣ ਨੂੰ ਕਿਹਾ। ਇਸ ਤੋਂ ਬਾਅਦ ਪੀਟਰ ਨੇ ਭੱਟਾਚਾਰੀਆ ਤੇ ਉਸ ਦੇ ਪਰਿਵਾਰ ਤੋਂ ਮਾਫ਼ੀ ਮੰਗੀ। ਆਇਰਲੈਂਡ ਦੇ ਪ੍ਰਵਾਸੀ ਕੌਂਸਲ ਦੇ ਸੰਚਾਰ ਅਤੇ ਐਡਵੋਕੇਟਸ ਮੈਨੇਜਰ ਪਿੱਪਾ ਵੁਲਨਫ ਨੇ ਕਿਹਾ ਕਿ ਇਸ ਘਟਨਾ ਤੋਂ ਬਾਅਦ ਇਹ ਸਪਸ਼ਟ ਹੈ ਕਿ ਨਸਲਵਾਦੀ ਘਟਨਾਵਾਂ ਰੋਕਣ ਲਈ ਹੋਰ ਵੀ ਕੰਮ ਕਰਨ ਦੀ ਜ਼ਰੂਰਤ ਹੈ।