ਨਵੀਂ ਦਿੱਲੀ, 21 ਜੂਨ (ਪੋਸਟ ਬਿਊਰੋ)- ਇਸ ਸਾਲ ਜਨਵਰੀ ਵਿੱਚ ਕੇਰਲ ਤੱਟ ਤੋਂ ਬੇੜੀ ਰਾਹੀਂ ਨਿਊਜ਼ੀਲੈਂਡ ਜਾਂਦੇ ਹੋਏ 243 ਭਾਰਤੀ ਲਾਪਤਾ ਹੋ ਗਏ ਹਨ। ਉਨ੍ਹਾਂ ਦਾ ਕੋਈ ਸੁਰਾਗ ਨਹੀਂ ਮਿਲ ਰਿਹਾ। ਪਰਵਾਰਕ ਮੈਂਬਰਾਂ ਨੇ ਉਨ੍ਹਾਂ ਦੀ ਭਾਲ ਲਈ ਕੇਰਲ ਸਰਕਾਰ ਨੂੰ ਬੇਨਤੀ ਕੀਤੀ, ਪਰ ਉਸ ਨੇ ਕੋਈ ਧਿਆਨ ਨਹੀਂ ਦਿੱਤਾ।
ਪਤਾ ਲੱਗਾ ਹੈ ਕਿ ਰਵਿੰਦਰ ਨਾਂਅ ਦੇ ਇੱਕ ਵਿਅਕਤੀ ਨੇ ਮਦਨਗਿਰ ਪਿੰਡ ਦੇ ਲੋਕਾਂ ਨੂੰ ਨਿਊਜ਼ੀਲੈਂਡ ਵਿੱਚ ਚੰਗੇ ਜੀਵਨ ਦਾ ਸੁਫਨਾ ਦਿਖਾ ਕੇ ਚੱਲਣ ਨੂੰ ਮਨਾਇਆ ਕੀਤਾ ਸੀ। ਲਾਪਤਾ ਲੋਕਾਂ ਵਿੱਚੋਂ ਇੱਕ ਦੀ ਪਰਵਾਰਕ ਮੈਂਬਰ ਅਨੰਤੀ ਨੇ ਦੱਸਿਆ, ਮੇਰੇ ਪਰਵਾਰ ਦੇ 35 ਤੋਂ ਵੱਧ ਲੋਕ ਬੇੜੀ ਰਾਹੀਂ ਗਏ ਸਨ ਅਤੇ ਅਸੀਂ ਕੇਰਲ ਸਰਕਾਰ ਨਾਲ ਵੀ ਇਸ ਕੇਸ ਦੀ ਜਾਂਚ ਲਈ ਸੰਪਰਕ ਕੀਤਾ ਸੀ, ਪਰ ਸਰਕਾਰ ਸਾਡੇ ਬਾਰੇ ਕੋਈ ਧਿਆਨ ਨਹੀਂ ਦੇ ਰਹੀ। ਪੁਲਸ ਨੇ ਕੁਝ ਪੁੱਛਗਿੱਛ ਕੀਤੀ, ਪਰਕਾਰਵਾਈ ਨਹੀਂ ਕੀਤੀ। ਇੱਕ ਹੋਰ ਵਿਅਕਤੀ ਦੇ ਪਰਵਾਰਕ ਮੈਂਬਰ ਕਸਤੂਰੀ ਨੇ ਦੱਸਿਆ, ਮੇਰੇ ਪਰਵਾਰ ਨੇ ਸਾਨੂੰ ਦੱਸਿਆ ਸੀ ਕਿ ਉਹ ਕੇਰਲ ਜਾ ਰਹੇ ਹਨ ਅਤੇ ਬਾਅਦ ਵਿੱਚ ਸਾਨੂੰ ਸੁਣਨ ਵਿੱਚ ਆਇਆ ਕਿ ਕੇਰਲ ਤੱਟ ਤੋਂ ਰਵਾਨਾ ਹੋ ਰਹੀ ਬੇੜੀ ਤੋਂ ਨਿਊਜ਼ੀਲੈਂਡ ਜਾ ਰਹੇ ਹਨ। ਅਸੀਂ ਇਥੇ ਸਰਕਾਰ ਤੋਂ ਮਦਦ ਮੰਗਣ ਲਈ ਆਏ ਹਾਂ। ਇੱਕ ਹੋਰ ਲਾਪਤਾ ਵਿਅਕਤੀ ਦੇ ਪਰਵਾਰਕ ਮੈਂਬਰ ਸੁੰਦਰ ਲਿੰਗਮ ਨੇ ਦੱਸਿਆ, ਅਸੀਂ ਵਿਦੇਸ਼ ਮੰਤਰੀ ਨੂੰ ਮਿਲਣ ਅਤੇ ਸਰਕਾਰ ਨੂੰ ਇਸ ਪਾਸੇ ਧਿਆਨ ਦੇਣ ਦੀ ਅਪੀਲ ਕਰਨ ਆਏ ਹਾਂ। ਮੇਰੇ ਪਰਵਾਰ ਤੇ ਰਿਸ਼ਤੇਦਾਰ ਲਾਪਤਾ ਹਨ ਅਤੇ ਉਨ੍ਹਾਂ ਦਾ ਕੋਈ ਸੁਰਾਗ ਨਹੀਂ ਮਿਲਿਆ। ਮੈਨੂੰ ਨਹੀਂ ਪਤਾ ਕਿ ਇਸ ਕੇਸ ਵਿੱਚ ਸ਼ਾਮਲ ਤੀਜੀ ਧਿਰ ਕੌਣ ਹੈ। ਬੇੜੀ ਵਿੱਚ ਆਪਣੀ ਪਤਨੀ ਤੇ ਬੱਚਿਆਂ ਨਾਲ ਨਾ ਜਾ ਸਕੇ ਦੇਵੇਂਦਰ ਨੇ ਕਿਹਾ ਕਿ ਲੋਕਾਂ ਨੂੰ ਬਸ ਜ਼ਰੀਏ ਸਮੁੰਦਰ ਤੱਕ ਲਿਜਾਇਆ ਗਿਆ ਸੀ। ਜਦੋਂ ਮੇਰੀ ਵਾਰੀ ਆਈ ਤਾਂ ਬਸ ਚਾਲਕ ਨੇ ਦੱਸਿਆ ਕਿ ਮੈਨੂੰ ਬਾਅਦ ਵਿੱਚ ਲਿਜਾਇਆ ਜਾਵੇਗਾ।