ਐੱਸ ਏ ਐੱਸ ਨਗਰ, 21 ਜੂਨ (ਪੋਸਟ ਬਿਊਰੋ)- ਖੰਨਾ ਜਿ਼ਲੇ ਦੀ ਪੁਲਸ ਵੱਲੋਂ ਜਲੰਧਰ ਦੇ ਪਾਦਰੀ ਐਂਥਨੀ ਦੇ ਘਰ ਤੋਂ ਫੜੇ ਛੇ ਕਰੋੜ 65 ਲੱਖ ਰੁਪਏ ਗਾਇਬ ਕਰਨ ਦੇ ਕੇਸ ਵਿੱਚ ਥਾਣਾ ਸਟੇਟ ਕਰਾਈਮ ਸੈਲ ਨੇ ਗ੍ਰਿਫਤਾਰ ਕੀਤੇ ਹੋਏ ਤਿੰਨ ਏ ਐਸ ਆਈਜ਼ ਜੋਗਿੰਦਰ ਸਿੰਘ, ਰਾਜਪ੍ਰੀਤ ਸਿੰਘ, ਦਿਲਬਾਗ ਸਿੰਘ, ਹਵਾਲਦਾਰ ਅਮਰੀਕ ਸਿੰਘ ਅਤੇ ਟਾਊਟ ਸੁਰਿੰਦਰ ਸਿੰਘ, ਗੁਰਪ੍ਰੀਤ ਸਿੰਘ, ਮੁਹੰਮਦ ਸ਼ਕੀਲ, ਸੰਜੀਵ ਕੁਮਾਰ, ਦਵਿੰਦਰ ਕੁਮਾਰ, ਨਿਰਮਲ ਸਿੰਘ, ਸੁਰਿੰਦਰਪਾਲ ਸ਼ਰਮਾ ਉਰਫ ਚਿੜੀ ਦੇ ਖਿਲਾਫ ਐਡੀਸ਼ਨਲ ਜ਼ਿਲ੍ਹਾ ਸੈਸ਼ਨ ਜੱਜ ਦੀ ਅਦਾਲਤ ਵਿੱਚ ਦੋਸ਼ ਪੱਤਰ ਪੇਸ਼ ਕੀਤਾ ਹੈ। ਪੁਲਸ ਨੇ ਚਾਰ ਕਰੋੜ 49 ਲੱਖ 50 ਹਜ਼ਾਰ ਰੁਪਏ ਬਰਾਮਦ ਕਰ ਲਏ ਸਨ ਜਿਨ੍ਹਾਂ ਵਿੱਚ ਨਿਰਮਲ ਸਿੰਘ ਨਾਂਅ ਦੇ ਵਿਅਕਤੀ ਦੇ ਘਰੋਂ ਇੱਕ ਲੱਖ ਰੁਪਏ, ਸੁਰਿੰਦਰਪਾਲ ਸ਼ਰਮਾ ਚਿੜੀ ਤੋਂ ਚਾਲੀ ਲੱਖ, ਮੁਹੰਮਦ ਸ਼ਕੀਲ ਵਾਸੀ ਬਲਬੀਰ ਖਾਨ ਕਲੋਨੀ ਪਟਿਆਲਾ ਤੋਂ 20 ਲੱਖ, ਹੌਲਦਾਰ ਅਮਰੀਕ ਸਿੰਘ ਵਾਸੀ ਮਾਨਸਾ ਤੋਂ 30 ਲੱਖ, ਦਵਿੰਦਰ ਕੁਮਾਰ ਉਰਫ ਕਾਕਾ ਵਾਸੀ ਗਰਿੱਡ ਕਲੋਨੀ ਮੂਣਕ, ਜ਼ਿਲ੍ਹਾ ਸੰਗਰੂਰ ਤੋਂ ਤੀਹ ਲੱਖ ਅਤੇ ਸੰਜੀਵ ਕੁਮਾਰ ਵਾਸੀ ਰਾਮਪੁਰ ਗੁੱਜਰਾਂ, ਜ਼ਿਲ੍ਹਾ ਸੰਗਰੂਰ ਤੋਂ 18 ਲੱਖ ਰੁਪਏ ਬਰਾਮਦ ਕੀਤੇ ਗਏ ਸਨ।
ਵਰਨਣ ਯੋਗ ਹੈ ਕਿ ਪੁਲਸ ਨੇ ਜਦੋਂ ਮੁਲਜ਼ਮ ਸੁਰਿੰਦਰਪਾਲ ਸ਼ਰਮਾ ਨੂੰ ਪੈਸਿਆਂ ਨਾਲ ਗ੍ਰਿਫਤਾਰ ਕੀਤਾ ਸੀ ਤਾਂ ਦਿਲ ਦੀ ਬਿਮਾਰੀ ਕਾਰਨ ਧਾਰਾ 437 ਹੇਠ ਉਸ ਨੂੰ ਮੌਕੇ 'ਤੇ ਜ਼ਮਾਨਤ ਮਿਲ ਗਈ ਅਤੇ ਮੁਲਜ਼ਮ ਗੁਰਪ੍ਰੀਤ ਸਿੰਘ ਨੂੰ ਐਡੀਸ਼ਨਲ ਜ਼ਿਲ੍ਹਾ ਸੈਸ਼ਨ ਜੱਜ ਨੇ ਜ਼ਮਾਨਤ 'ਤੇ ਰਿਹਾਅ ਕਰਨ ਦੇ ਹੁਕਮ ਦੇ ਦਿੱਤੇ ਸਨ। ਇਸ ਕੇਸ ਵਿੱਚ ਨਾਮਜ਼ਦ ਏ ਐੱਸ ਆਈ ਦਿਲਬਾਗ ਸਿੰਘ ਉਤੇ ਦੋਸ਼ ਹੈ ਕਿ ਉਸ ਦੀ ਸਵਿਫਟ ਕਾਰ ਰਾਹੀਂ ਕਰੋੜਾਂ ਰੁਪਏ ਖੰਨਾ ਤੋਂ ਅੱਗੇ ਲਿਜਾਏ ਗਏ ਸਨ। ਜਾਂਚ ਟੀਮ ਨੇ ਜਦੋਂ ਜੋਗਿੰਦਰ ਸਿੰਘ ਤੇ ਰਾਜਪ੍ਰੀਤ ਸਿੰਘ ਦੇ ਮੋਬਾਈਲ ਫੋਨ ਦੀ ਕਾਲ ਡਿਟੇਲ ਫੋਲੀ ਤਾਂ ਉਸ ਵਿੱਚੋਂ ਏ ਐੱਸ ਆਈ ਦਿਲਬਾਗ ਸਿੰਘ ਦਾ ਨੰਬਰ ਮਿਲਿਆ ਤੇ ਪਤਾ ਲੱਗਾ ਕਿ ਏ ਐੱਸ ਆਈ ਜੋਗਿੰਦਰ ਸਿੰਘ ਨੇ 29 ਮਾਰਚ ਨੂੰ ਦਿਲਬਾਗ ਸਿੰਘ ਨੂੰ ਕਾਲ ਕੀਤੀ ਸੀ ਅਤੇ ਦੋਵਾਂ ਦੀ ਟਾਵਰ ਲੋਕੇਸ਼ਨ ਖੰਨਾ ਦੀ ਆ ਰਹੀ ਸੀ।
ਜਾਣਕਾਰ ਸੂਤਰਾਂ ਮੁਤਾਬਕ ਜੋਗਿੰਦਰ ਸਿੰਘ ਦੇ ਕਹਿਣ ਉੱਤੇ ਦਿਲਬਾਗ ਸਿੰਘ ਖੰਨਾ ਵਿਖੇ ਕਾਰ ਲੈ ਗਿਆ ਅਤੇ ਵਰਨਾ ਕਾਰ ਵਿੱਚੋਂ ਕਰੋੜਾਂ ਦੀ ਨਕਦੀ ਨੂੰ ਉਸ ਦੀ ਸਵਿਫਟ ਕਾਰ 'ਚ ਰੱਖਿਆ ਸੀ। ਏ ਐੱਸ ਆਈ ਦਿਲਬਾਗ ਸਿੰਘ ਦੀ ਗ੍ਰਿਫਤਾਰੀ ਪਿੱਛੋਂ ਸਟੇਟ ਕਰਾਈਮ ਬ੍ਰਾਂਚ ਨੇ ਗੁਪਤ ਸੂਹ ਮਿਲਣ 'ਤੇ ਕੋਚੀ (ਕੇਰਲਾ) ਦੀ ਪੁਲਸ ਨੂੰ ਸੂਚਨਾ ਦਿੱਤੀ ਕਿ ਥਾਣੇਦਾਰ ਜੋਗਿੰਦਰ ਸਿੰਘ ਤੇ ਰਾਜਪ੍ਰੀਤ ਸਿੰਘ ਉਥੇ ਇੱਕ ਹੋਟਲ 'ਚ ਹਨ ਤਾਂ ਕੋਚੀ ਪੁਲਸ ਨੇ ਦੋਵਾਂ ਨੂੰ ਗ੍ਰਿਫਤਾਰ ਕਰ ਵਿੱਚ ਲਿਆ, ਜਿੱਥੋਂ ਪੰਜਾਬ ਪੁਲਸ ਦੀ ਟੀਮ ਨੇ ਇਨ੍ਹਾਂ ਥਾਣੇਦਾਰਾਂ ਚੀਫ ਜੁਡੀਸ਼ਲ ਮੈਜਿਸਟਰੇਟ ਕੋਚੀ ਕੋਲ ਪੇਸ਼ ਕੀਤਾ ਅਤੇ ਦੋਵਾਂ ਨੂੰ ਟਰਾਂਜ਼ਿਟ ਰਿਮਾਂਡ 'ਤੇ ਵਾਪਸ ਮੁਹਾਲੀ ਲਿਆਂਦਾ ਸੀ।