ਬਰੈਂਪਟਨ, 21 ਜੂਨ (ਪੋਸਟ ਬਿਊਰੋ) : ਸਥਾਨਕ ਵਾਸੀਆਂ ਵੱਲੋਂ ਹਾਸਲ ਹੋਈ ਫੀਡਬੈਕ ਤੋਂ ਬਾਅਦ ਡਰਾਈਵੇਅਜ਼ ਵਿੱਚ ਕੀਤੀ ਜਾਣ ਵਾਲੀ ਸੋਧ ਲਈ ਨਵੇਂ ਪਰਮਿਟ ਦੀ ਗੁੰਜਾਇਸ਼ ਦੇ ਫੈਸਲੇ ਨੂੰ ਹਾਲ ਦੀ ਘੜੀ ਸਾਲ ਦੇ ਅੰਤ ਤੱਕ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਇਸ ਸਬੰਧੀ ਫੈਸਲਾ 19 ਜੂਨ ਨੂੰ ਹੋਈ ਸਿਟੀ ਕਾਉਂਸਲ ਦੀ ਮੀਟਿੰਗ ਵਿੱਚ ਲਿਆ ਗਿਆ ਸੀ।
ਨਵੇਂ ਨਿਯਮ ਅਸਲ ਵਿੱਚ 2 ਜੁਲਾਈ ਤੋਂ ਲਾਗੂ ਹੋਣੇ ਸਨ। ਹੁਣ ਇਹ 22 ਨਵੰਬਰ ਨੂੰ ਪ੍ਰਭਾਵੀ ਹੋਣਗੇ। ਸਿਟੀ ਸਟਾਫ ਇਸ ਪਰਮਿਟ ਪ੍ਰੋਗਰਾਮ ਦਾ ਮੁਲਾਂਕਣ ਕਰੇਗਾ ਤੇ ਕਿਸੇ ਵੀ ਤਰ੍ਹਾਂ ਦੀਆਂ ਤਬਦੀਲੀਆਂ ਬਾਰੇ ਕਮੇਟੀ ਆਫ ਕਾਉਂਸਲ ਨੂੰ ਰਿਪੋਰਟ ਕਰਨਾ ਹੋਵੇਗਾ। ਇਸ ਸਮੇਂ ਜੇ ਕੋਈ ਆਪਣੇ ਮਿਉਂਸਪਲ ਖਰਚੇ ਵਿੱਚ ਕਟੌਤੀ ਚਾਹੁੰਦਾ ਹੈ ਤਾਂ ਉਸ ਨੁੰ ਆਪਣਾ ਡਰਾਈਵ-ਵੇਅ ਚੌੜਾ ਕਰਵਾਉਣ ਲਈ ਸਿਟੀ ਤੋਂ ਪਰਮਿਟ ਲੈਣਾ ਹੋਵੇਗਾ।
ਸਥਾਨਕ ਵਾਸੀਆਂ ਨੂੰ ਇਹ ਵੀ ਚੇਤੇ ਕਰਵਾਇਆ ਗਿਆ ਹੈ ਕਿ ਉਨ੍ਹਾਂ ਦੇ ਲੌਟ ਦੀ ਚੌੜਾਈ ਦੇ ਹਿਸਾਬ ਨਾਲ ਸਿਟੀ ਦੇ ਡਰਾਈਵ-ਵੇਅਜ਼ ਦੀ ਚੌੜਾਈ ਪਹਿਲਾਂ ਹੀ ਵੱਧ ਹੈ। ਪ੍ਰਾਪਰਟੀ ਉੱਤੇ ਡਰੇਨੇਜ ਨੂੰ ਯਕੀਨੀ ਬਣਾਉਣ ਲਈ 0.6 ਮੀਟਰ ਦੀ ਲੈਂਡਸਕੇਪਿੰਗ (ਜਿਸ ਵਿੱਚ ਘਾਹ, ਬਾਗ, ਕਿਆਰੀਆਂ ਆਦਿ ਹੋਣ) ਹੋਣੀ ਜ਼ਰੂਰੀ ਹੈ।