ਅਦਾਕਾਰਾ ਕਿਆਰਾ ਅਡਵਾਨੀ ਖੁਦ ਨੂੰ ਕਿਸੇ ਮਾਧਿਅਮ ਜਾਂ ਭਾਸ਼ਾ ਤੱਕ ਸੀਮਿਤ ਨਹੀਂ ਰੱਖਣਾ ਚਾਹੁੰਦੀ ਅਤੇ ਆਸ ਕਰਦੀ ਹੈ ਕਿ ਉਹ ਖੁਦ ਨੂੰ ਪੂਰੇ ਭਾਰਤ ਦੀ ਕਲਾਕਾਰ ਵਜੋਂ ਸਥਾਪਤ ਕਰਨ ਵਿੱਚ ਸਫਲ ਹੋਵੇਗੀ। ‘ਐਮ ਐੱਸ ਧੋਨੀ : ਦ ਅਨਟੋਲਡ ਸਟੋਰੀ’ ਨਾਲ ਬਾਲੀਵੁੱਡ ਵਿੱਚ ਸਫਲਤਾ ਹਾਸਲ ਕਰਨ ਵਾਲੀ 26 ਸਾਲਾ ਅਦਾਕਰਾ ਨੇ ਮਹੇਸ਼ ਬਾਬੂ (ਭਾਰਤ ਅਨੇ ਨੇਨੂ) ਅਤੇ ਰਾਮ ਚੰਦਰ (ਵਿਨੇ ਵਿਧੇਯਾ ਰਾਮਾ) ਵਰਗੇ ਤੇਲਗੂ ਸਿਤਾਰਿਆਂ ਨਾਲ ਫਿਲਮਾਂ 'ਚ ਕੰਮ ਕੀਤਾ ਹੈ।
ਕਿਆਰਾ ਨੇ ਕਿਹਾ, ‘‘ਅੱਜਕੱਲ੍ਹ ਆਪਣਾ ਹੁਨਰ ਦਿਖਾਉਣ ਲਈ ਕਈ ਬਦਲ ਮਿਲ ਜਾਂਦੇ ਹਨ, ਭਾਵੇਂ ਉਹ ਆਪਣੀ ਭਾਸ਼ਾ ਦੀਆਂ ਫਿਲਮਾਂ ਹੋਣ ਜਾਂ ਖੇਤਰੀ ਸਿਨੇਮਾ ਵਿੱਚ ਕੰਮ ਕਰਨਾ ਜਾਂ ਵੈਬ ਦੁਨੀਆ ਦਾ ਹਿੱਸਾ ਬਣਨਾ ਹੋਵੇ। ਭਾਸ਼ਾ ਕੋਈ ਸੀਮਾ ਨਹੀਂ। ਮੈਂ ਚਾਹੁੰਦੀ ਹਾਂ ਕਿ ਮੈਨੂੰ ਪੂਰੇ ਭਾਰਤ ਦੀ ਕਲਾਕਾਰ ਵਜੋਂ ਜਾਣਿਆ ਜਾਵੇ।” ਉਸ ਨੇ ਕਿਹਾ ਕਿ ਸਫਲਤਾ ਤੋਂ ਬਾਅਦ ਉਹ ਬਹੁਤ ਸਾਵਧਾਨੀ ਨਾਲ ਆਪਣਾ ਕੰਮ ਚੁਣਦੀ ਹੈ। ਉਹ ਛੇਤੀ ਹੀ ਬਾਲੀਵੁੱਡ ਫਿਲਮ ‘ਕਬੀਰ ਸਿੰਘ’ ਵਿੱਚ ਨਜ਼ਰ ਆਉਣ ਵਾਲੀ ਹੈ।