ਸ਼ਿਵਮੋਗਾ, 20 ਜੂਨ (ਪੋਸਟ ਬਿਊਰੋ)- ਮੱਧ ਪ੍ਰਦੇਸ਼ ਦੇ ਸ਼ਿਵਮੋਗਾ ਜ਼ਿਲ੍ਹਾ ਖਪਤਕਾਰ ਵਿਵਾਦ ਨਿਵਾਰਨ ਫੋਰਮ ਨੇ ਇੱਕ ਮਰੀਜ਼ ਦੇ ਇਲਾਜ ਵਿੱਚ ਲਾਪਰਵਾਹੀ ਵਰਤਣ ਵਾਲੇ ਦੋ ਡਾਕਟਰਾਂ ਨੂੰ 6.30 ਲੱਖ ਰੁਪਏ ਭਰਨ ਦਾ ਹੁਕਮ ਦਿੱਤਾ ਹੈ। ਪੀੜਤ ਔਰਤ ਹਿਸਟੇਰੇਕਟਾਮੀ (ਬੱਚੇਦਾਨੀ) ਦੇ ਰੋਗ ਤੋਂ ਪੀੜਤ ਸੀ।
ਇਸ ਸੰਬੰਧ ਵਿੱਚ ਪੀੜਤ ਔਰਤ ਕੇ ਏ ਗੀਤਾ ਨੇ ਦੱਸਿਆ ਕਿ ਪੰਜ ਅਕਤੂਬਰ 2012 ਨੂੰ ਹਿਸਟੇਰੇਕਟਾਮੀ ਦਾ ਇਲਾਜ ਕਰਵਾਉਣ ਲਈ ਉਸ ਨੂੰ ਕਰਨਾਟਕ ਦੇ ਸ਼ਿਵਮੋਗਾ ਸ਼ਹਿਰ 'ਚ ਰਾਘਵੇਂਦਰ ਨਰਸਿੰਗ ਹੋਮ ਲਿਆਂਦਾ ਗਿਆ ਸੀ, ਜਿੱਥੇ ਡਾਕਟਰ ਐਮ ਮੁਰਲੀਧਰ ਰਾਓ ਅਤੇ ਡਾਕਟਰ ਵਿਜੇ ਲਕਸ਼ਮੀ ਰਵੀਸ਼ ਨੇ ਉਸ ਦਾ ਇਲਾਜ ਕੀਤਾ ਤਾਂ ਇਸ ਦੌਰਾਨ ਉਸ ਦੀ ਹਾਲਤ ਵਿਗੜਨ ਲੱਗੀ। ਇਹ ਵੇਖ ਕੇ ਉਸ ਨੂੰ ਹੋਰ ਹਸਪਤਾਲ ਰੈਫਰ ਕਰ ਦਿੱਤਾ ਗਿਆ, ਜਿੱਥੇ ਟੈਸਟ ਦੌਰਾਨ ਉਸ ਨੂੰ ਪਤਾ ਲੱਗਾ ਕਿ ਇਲਾਜ ਵਿੱਚ ਉਸ ਦਾ ਗੁਪਤ ਅੰਗ ਖਰਾਬ ਹੋ ਗਿਆ ਹੈ। ਬਾਅਦ 'ਚ ਹਿਸਟੇਰੇਕਟਾਮੀ ਪ੍ਰੇਸ਼ਾਨੀ ਦੇ ਹੱਲ ਲਈ ਉਸ ਨੂੰ ਬੰਗਲੌਰ ਵਿੱਚ ਇੱਕ ਹੋਰ ਸਰਜਰੀ ਕਰਾਉਣੀ ਪਈ। ਗੀਤਾ ਨੇ ਖਪਤਕਾਰ ਫੋਰਮ ਨਾਲ ਸੰਪਰਕ ਕਰ ਕੇ ਦੋਸ਼ ਲਾਇਆ ਕਿ ਉਸ ਨੂੰ ਹਿਸਟੇਰੇਕਟਾਮੀ ਦੌਰਾਨ ਡਾਕਟਰਾਂ ਦੀ ਲਾਪਰਵਾਹੀ ਕਾਰਨ ਸਰੀਰਕ ਅਤੇ ਮਾਨਸਿਕ ਪੀੜ ਝੱਲਣੀ ਪਈ ਸੀ। ਡਾਕਟਰੀ ਇਲਾਜ ਨਾਲ ਸੰਬੰਧਤ ਦਸਤਾਵੇਜ਼ਾਂ ਦੀ ਜਾਂਚ ਕਰਨ ਤੋਂ ਬਾਅਦ ਫੋਰਮ ਨੇ ਡਾਕਟਰਾਂ ਨੂੰ ਲਾਪਰਵਾਹੀ ਦਾ ਦੋਸ਼ੀ ਦੱਸਿਆ ਹੈ। ਫੋਰਮ ਦੇ ਸਹਾਇਕ ਪ੍ਰਬੰਧਕੀ ਅਧਿਕਾਰੀ ਨੇ ਹਿਸਟੇਰੇਕਟਾਮੀ ਦੌਰਾਨ ਗੁਪਤ ਅੰਗ ਦੇ ਖਰਾਬ ਹੋਣ ਤੋਂ ਬਾਅਦ ਸਾਹਮਣੇ ਆਉਣ ਵਾਲੀਆਂ ਮੁਸ਼ਕਲਾਂ ਦੇ ਇਲਾਜ ਅਤੇ ਮਾਨਸਿਕ ਪਰੇਸ਼ਾਨੀ ਦੀ ਪੂਰਤੀ ਲਈ ਪੀੜਤ ਨੂੰ ਮੁਆਵਜ਼ੇ ਦੇ ਰੂਪ ਵਿੱਚ ਛੇ ਲੱਖ ਅਤੇ ਮੁਕੱਦਮੇਬਾਜ਼ੀ ਖਰਚ ਦੇ ਰੂਪ ਵਿੱਚ 30,000 ਰੁਪਏ ਛੇ ਹਫਤਿਆਂ ਵਿੱਚ ਦੇਣ ਦਾ ਹੁਕਮ ਦਿੱਤਾ ਹੈ।