ਦੇਵਘਰ, 20 ਜੂਨ (ਪੋਸਟ ਬਿਊਰੋ)- ਝਾਰਖੰਡ ਰਾਜ ਦੇ ਦੇਵਘਰ ਵਿੱਚ ਵਿਆਹ ਤੋਂ ਮਸਾਂ 10 ਘੰਟੇ ਬਾਅਦ ਤਲਾਕ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਤੋਂ ਹਰ ਕੋਈ ਹੈਰਾਨ ਹੋ ਗਿਆ ਹੈ।
ਪਤਾ ਲੱਗਾ ਹੈ ਕਿ ਏਥੇ ਸਾਰਫ ਕੇ ਪਿੰਡਾਰੀ ਪਿੰਡ ਵਿੱਚ ਸ਼ਗਨ ਵਿੱਚ ਪੁਰਾਣੇ ਕੱਪੜੇ ਦੇਣ ਉੱਤੇ ਵਿਆਹ ਮਸਾਂ 10 ਘੰਟੇ ਟੁੱਟ ਗਿਆ। ਮੁਸਲਿਮ ਸਮਾਜ ਵਿੱਚ ਵਹੁਟੀ ਨੂੰ ਸ਼ਗਨ ਵਿੱਚ ਨਕਾਬ, ਲੰਹਿਗਾ ਤੇ ਸਲਵਾਰ ਸੂਟ ਦੇਣ ਦਾ ਰਿਵਾਜ ਹੈ ਤੇ ਇਸ ਵਿਆਹ ਦੇ ਸ਼ੁਰੂ ਹੋਣ ਤੋਂ ਪਹਿਲਾਂ ਸ਼ਗਨ ਦੇ ਕੱਪੜੇ ਪੁਰਾਣੇ ਦਿਖਾਈ ਦੇਣ ਨਾਲ ਵਿਵਾਦ ਹੋ ਗਿਆ। ਲਾੜਾ ਪੱਖ ਦੇ ਲੋਕਾਂ ਨੇ ਸਮਝਾਇਆ ਕਿ ਨਵੇਂ ਕੱਪੜੇ ਘਰ ਰਹਿ ਗਏ ਹਨ, ਵਿਆਹ ਹੋਣ ਤਕ ਮੰਗਵਾ ਲਵਾਂਗੇ। ਜਦੋਂ ਵਿਆਹ ਹੋ ਗਿਆ ਤਾਂ ਓਦੋਂ ਤਕ ਸ਼ਗਨ ਦੇ ਨਵੇਂ ਕੱਪੜੇ ਨਹੀਂ ਸਨ ਆਏ। ਇਸ ਗੱਲ ਉੱਤੇ ਲੜਕੀ ਵਾਲੇ ਨਾਰਾਜ਼ ਹੋ ਗਏ ਅਤੇ ਸਵਾਲ ਉਠਾ ਦਿੱਤਾ ਕਿ ਜੇ ਵਿਆਹ ਵਿੱਚ ਸ਼ਗਨ ਦੇ ਪੁਰਾਣੇ ਕੱਪੜੇ ਦੇ ਰਹੇ ਹਨ ਤਾਂ ਬਾਅਦ ਵਿੱਚ ਕੀ ਹੋਵੇਗਾ। ਇਸ ਤੋਂ ਗੱਲ ਜ਼ਿਆਦਾ ਵਧ ਗਈ ਤੇ ਦੋਨਾਂ ਪੱਖਾਂ ਦੀ ਤੂੰ-ਤੂੰ, ਮੈਂ-ਮੈਂ ਦੌਰਾਨ ਬਰਾਤੀਆਂ ਨੂੰ ਬੰਦੀ ਬਣਾ ਲਿਆ ਗਿਆ। ਵਿਵਾਦ ਹੋਰ ਵਧ ਗਿਆ ਤਾਂ ਜਰਮੁੰਡੀ ਹਲਕੇ ਦੇ ਵਿਧਾਇਕ ਬਾਦਲ ਪੱਤਰਲੇਖ ਆਏ ਅਤੇ ਪੰਚਾਇਤ ਕੀਤੀ ਗਈ। ਲੜਕੇ ਦੇ ਪੱਖ ਨੇ 3.40 ਲੱਖ ਰੁਪਏ ਵਾਪਸ ਕੀਤੇ ਤਾਂ ਰਾਜ਼ੀਨਾਮੇ ਪਿੱਛੋਂ ਮੁਸਲਿਮ ਰੀਤੀਆਂ ਹੇਠ ਲਾੜੇ-ਲਾੜੀ ਨੇ ਇਕ-ਦੂਜੇ ਨੂੰ ਤਲਾਕ ਦੇ ਦਿੱਤਾ।
ਅਸਲ ਵਿੱਚ ਸਾਰਫਕੇ ਪਿੰਡਾਰੀ ਪਿੰਡ ਦੇ ਵਸਨੀਕ ਮੁਹੰਮਦ ਨਿਸ਼ਾਦ ਨੇ ਆਪਣੀ ਧੀ ਦਾ ਵਿਆਹ ਸੋਨਾਰਾਇ ਠਾਢੀ ਦੇ ਮਹਾਪੁਰ ਪਿੰਡ ਵਿੱਚ ਰਹਿੰਦੇ ਖੁਰਸ਼ੀਦ ਮਿਆਂ ਦੇ ਪੁੱਤਰ ਆਰਿਫ ਅਖਤਰ ਨਾਲ ਤੈਅ ਕੀਤਾ ਸੀ। ਆਰਿਫ ਆਪਣੇ ਪਿੰਡ ਵਿੱਚ ਕਰਿਆਨੇ ਦੀ ਦੁਕਾਨ ਕਰਦਾ ਸੀ। ਮੰਗਲਵਾਰ ਰਾਤ 150 ਬਰਾਤੀ ਪਿੰਡਾਰੀ ਆਏ। ਬਰਾਤ ਦਾ ਸ਼ਾਨਦਾਰ ਸਵਾਗਤ ਕੀਤਾ ਗਿਆ। ਫਿਰ ਵਿਆਹ ਦੀ ਰਸਮ ਸ਼ੁਰੂ ਹੋਈ ਤਾਂ ਰਾਤ 12 ਵਜੇ ਲਾੜੀ ਲਈ ਸਹੁਰਿਆਂ ਵੱਲੋਂ ਲਿਆਂਦੇ ਸ਼ਗਨ ਵਾਲੇ ਕੱਪੜੇ ਤੇ ਗਹਿਣਿਆਂ ਦੀ ਮੰਗ ਹੋਈ। ਲੜਕੇ ਵਾਲਿਆਂ ਨੇ ਜਲਦੀ ਵਿੱਚ ਸ਼ਗਨ ਦੇ ਕੱਪੜਿਆਂ ਦਾ ਬੈਗ ਘਰ ਛੱਡ ਆਉਣ ਦੀ ਗੱਲ ਕਹੀ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਘਰੋਂ ਸ਼ਗਨ ਦੇ ਕੱਪੜੇ ਮੰਗਵਾ ਲੈਣਗੇ, ਵਿਆਹ ਦੀ ਰਸਮ ਕਰ ਲਓ। ਵਿਆਹ ਹੋਣ ਤੱਕ ਵੀ ਸ਼ਗਨ ਦੇ ਕੱਪੜੇ ਨਾ ਆਏ ਤਾਂ ਲੜਕੀ ਵਾਲੇ ਭੜਕ ਪਏ। ਉਨ੍ਹਾਂ ਕਿਹਾ ਬੁਰਕਾ ਅਤੇ ਲਹਿੰਗਾ ਵੀ ਪੁਰਾਣਾ ਹੈ, ਗਹਿਣੇ ਹਲਕੇ ਹਨ। ਝਗੜਾ ਹੋਣ ਲੱਗਾ ਤਾਂ ਲੜਕੀ ਨੂੰ ਭਵਿੱਖ ਵਿੱਚ ਬਦਸਲੂਕੀ ਦਾ ਡਰ ਪੈ ਜਾਣ ਕਾਰਨ ਉਸ ਨੇ ਸਹੁਰੇ ਜਾਣ ਤੋਂ ਇਨਕਾਰ ਕਰ ਦਿੱਤਾ। ਇਸ ਪਿੱਛੋਂ ਪਿੰਡਾਰੀ ਪਿੰਡ ਦੇ ਲੋਕਾਂ ਨੇ ਬਰਾਤ ਨੂੰ ਬੰਦੀ ਬਣਾ ਲਿਆ।