ਹੇਗ, 20 ਜੂਨ (ਪੋਸਟ ਬਿਊਰੋ)- ਪੰਜ ਸਾਲ ਪਹਿਲਾਂ ਯੂਕ੍ਰੇਨ ਦੇ ਅਸਮਾਨ 'ਚ ਮਲੇਸ਼ੀਆ ਦਾ ਯਾਤਰੀ ਜਹਾਜ਼ ਡੇਗਣ ਦੇ ਮਾਮਲੇ 'ਚ ਤਿੰਨ ਰੂਸੀ ਤੇ ਇਕ ਯੂਕ੍ਰੇਨ ਦੀ ਨਾਗਰਿਕ ਦੀ ਹੱਤਿਆ ਦੇ ਦੋਸ਼ੀ ਬਣਾਏ ਗਏ ਹਨ। ਨੀਦਰਲੈਂਡ ਦੀ ਅਗਵਾਈ 'ਚ ਹੋਈ ਕੌਮਾਂਤਰੀ ਜਾਂਚ 'ਚ ਇਨ੍ਹਾਂ ਚਾਰ ਲੋਕਾਂ ਨੂੰ ਮੁਲਜ਼ਮ ਬਣਾਇਆ ਗਿਆ ਹੈ। ਇਨ੍ਹਾਂ ਸਾਰਿਆਂ 'ਤੇ ਨੀਦਰਲੈਂਡਸ ਦੀ ਅਦਾਲਤ 'ਚ ਮਾਰਚ 2020 ਤੋਂ ਕੇਸ ਚਲਾਇਆ ਜਾਵੇਗਾ।
ਮਿਜ਼ਾਈਲ ਹਮਲੇ ਦਾ ਸ਼ਿਕਾਰ ਹੋਇਆ ਜਹਾਜ਼ ਐਮਸਟਡਰਮ ਤੋਂ ਕੁਆਲਾਲੰਪੁਰ ਜਾ ਰਿਹਾ ਸੀ, ਉਸ ਦੇ ਬਹੁਤੇ ਯਾਤਰੀ ਨੀਦਰਲੈਂਡ ਦੇ ਸਨ। ਹਮਲੇ 'ਚ ਚਾਲਕ ਦਲ ਦੇ ਮੈਂਬਰਾਂ ਸਮੇਤ ਜਹਾਜ਼ ਵਿੱਚ ਸਵਾਰ ਸਾਰੇ 298 ਲੋਕ ਮਾਰੇ ਗਏ ਸਨ। ਜਾਂਚ ਕਰਤਾਵਾਂ ਨੇ ਦੇਖਿਆ ਕਿ ਮਲੇਸ਼ੀਆ ਏਅਰਲਾਈਨਸ ਦੀ ਫਲਾਈਟ ਉੱਤੇ ਰੂਸੀ ਬੀ ਯੂ ਕੇ ਮਿਜ਼ਾਈਲ ਦਾਗੀ ਗਈ ਸੀ। ਬੋਇੰਗ 777 ਜਹਾਜ਼ 'ਤੇ ਇਹ ਮਿਜ਼ਾਈਲ ਰੂਸੀ ਫੌਜ ਦੇ ਕੁਰਕ ਟਿਕਾਣੇ ਤੋਂ ਛੱਡੀ ਗਈ ਸੀ। ਜਾਂਚ ਦੇ ਨਤੀਜੇ ਨੂੰ ਜਨਤਕ ਕਰਦਿਆਂ ਨੀਦਰਲੈਂਡ ਦੇ ਚੀਫ ਪ੍ਰੋਸੀਕਿਊਟਰ ਫਰੈਂਡ ਵੇਸਟਰੇਵਕ ਨੇ ਕਿਹਾ ਕਿ ਜ਼ਰੂਰੀ ਨਹੀਂ ਕਿ ਮੁਲਜ਼ਮਾਂ 'ਚੋਂ ਕਿਸੇ ਨੇ ਮਿਜ਼ਾਈਲ ਛੱਡਣ ਦਾ ਬਟਨ ਦਬਾਇਆ ਹੋਵੇ, ਪਰ ਇਹ ਤੈਅ ਹੈ ਕਿ ਇਨ੍ਹਾਂ ਚਾਰਾਂ ਦੀ ਅਪਰਾਧ 'ਚ ਪ੍ਰਮੁੱਖ ਭੂਮਿਕਾ ਸੀ। ਜਾਂਚ ਵਿੱਚ ਰੂਸ ਵੱਲੋਂ ਸਹਿਯੋਗ ਨਾ ਦੇਣ ਨਾਲ ਮਿਜ਼ਾਈਲ ਛੱਡਣ ਵਾਲੇ ਦਾ ਨਾਂ ਸਪੱਸ਼ਟ ਨਹੀਂ ਹੋ ਸਕਿਆ। ਹਮਲੇ ਲਈ ਜ਼ਿੰਮੇਵਾਰ ਠਹਿਰਾਏ ਗਏ ਸਰਗੇਈ ਡੁਬਿੰਸਕੀ, ਓਲੇਗਪੁਲਾਤੋਵ ਅਤੇ ਇਗੋਰ ਗਿਰਕਿਨ (ਸਾਰੇ ਰੂਸੀ) ਅਤੇ ਯੂਕਰੇਨ ਦੇ ਲਿਓਨਿਦ ਖਾਰਚੇਂਕੋ ਦੇ ਖਿਲਾਫ ਕੌਮਾਂਤਰੀ ਗ੍ਰਿਫਤਾਰੀ ਵਾਰੰਟ ਜਾਰੀ ਕਰ ਦਿੱਤਾ ਗਿਆ ਹੈ। ਇਸ ਤੋਂ ਪਹਿਲਾਂ ਕੱਲ੍ਹ ਪ੍ਰਤੀਕਿਰਿਆ ਵਿੱਚ ਇਗੋਰ ਗਿਰਕਿਨ ਨੇ ਕਿਹਾ ਸੀ ਕਿ ਯੂਕਰੇਨ ਦੇ ਰੂਸ ਸਮਰਥਿਤ ਬਾਗੀ ਹਮਲੇ ਲਈ ਜ਼ਿੰਮੇਵਾਰ ਨਹੀਂ ਹਨ। ਗਿਰਕਿਨ ਰੂਸੀ ਖੁਫੀਆ ਏਜੰਸੀ ਦਾ ਸਾਬਕਾ ਕਰਨਲ ਹੈ ਅਤੇ ਉਸ ਨੂੰ ਕੱਟੜ ਰੂਸੀ ਰਾਸ਼ਟਰਵਾਦੀ ਮੰਨਿਆ ਜਾਂਦਾ ਹੈ। ਜਦ ਕਿ ਡੁਬਿੰਸਕੀ ਹਮਲੇ ਵੇਲੇ ਫੌਜੀ ਖੁਫੀਆ ਵਿਭਾਗ ਦਾ ਮੁਖੀ ਸੀ।