ਵਾਸ਼ਿੰਗਟਨ, 20 ਜੂਨ (ਪੋਸਟ ਬਿਊਰੋ)- ਅਮਰੀਕਾ ਦੇ ਕੈਲੀਫੋਰਨੀਆ ਰਾਜ ਵਿੱਚ ਬੀਤੇ ਦਿਨੀਂ ਪਹਿਲੀ ਵਾਰ ਸੜਕ 'ਤੇ ਰੋਬੋਕਾਪ ਨੂੰ ਡਿਊਟੀ ਉੱਤੇ ਲਾਇਆ ਗਿਆ ਹੈ। ਇਸ ਨੂੰ ਐਚ ਪੀ ਰੋਬੋਕਾਪ ਨਾਂਅ ਦਿੱਤਾ ਗਿਆ ਹੈ।
ਪੁਲਾੜ ਕੈਪਸੂਲ ਦੇ ਆਕਾਰ ਦਾ ਇਹ ਰੋਬੋਕਾਪ ਪੂਰੀ ਤਰ੍ਹਾਂ ਆਪਣੇ ਆਪ ਚਲਦੇ ਹੋਏ ਸੜਕ ਉਤੇ ਪੈਟਰੋਲਿੰਗ ਕਰਦੇ ਵਕਤ 360 ਡਿਗਰੀ ਉੱਤੇ ਨਜ਼ਰ ਰੱਖੇਗਾ। ਇਸ ਦੇ ਨਾਲ ਸੜਕਾਂ, ਆਸਪਾਸ ਦੇ ਪਾਰਕਾਂ ਅਤੇ ਇਮਾਰਤਾਂ ਉਤੇ ਹੋਣ ਵਾਲੀਆਂ ਸ਼ੱਕੀ ਗਤੀਵਿਧੀਆਂ ਦੀ ਜਾਣਕਾਰੀ ਪੁਲਸ ਹੈੱਡਕੁਆਰਟਰ ਨੂੰ ਮਿਲੇਗੀ ਤੇ ਕਿਸੇ ਵੀ ਐਮਰਜੈਂਸੀ ਵਿੱਚ ਪੁਲਸ ਨੂੰ ਉਥੇ ਤੁਰੰਤ ਪਹੁੰਚਣ ਦੀ ਸਹੂਲਤ ਹੋਵੇਗੀ। ਇਥੋਂ ਦੇ ਸ਼ਾਪਿਗ ਮਾਲ ਅਤੇ ਇਮਾਰਤਾਂ ਵਿੱਚ ਪਹਿਲਾਂ ਹੀ ਰੋਬੋਟ ਤੈਨਾਤ ਹਨ, ਪਰ ਸੜਕ 'ਤੇ ਇਸ ਤਰ੍ਹਾਂ ਦੀ ਤੈਨਾਤੀ ਦਾ ਇਹ ਪਹਿਲਾ ਯਤਨ ਹੈ। ਇਸ ਰੋਬੋਟ ਨੂੰ ਲਾਸ ਏਂਜਲਸ ਤੋਂ 10 ਕਿਲੋਮੀਟਰ ਦੂਰ 50 ਹਜ਼ਾਰ ਦੀ ਆਬਾਦੀ ਵਾਲੇ ਹੰਟਿਗਟਨ ਦੀ ਸੜਕ 'ਤੇ ਤੋਰਿਆ ਗਿਆ ਹੈ। ਜੇ ਇਹ ਪ੍ਰਯੋਗ ਸਫਲ ਹੁੰਦਾ ਹੈ ਤਾਂ ਲਾਸ ਏਂਜਲਸ ਅਤੇ ਕੈਲੀਫੋਰਨੀਆ ਸਮੇਤ ਪੂਰੇ ਅਮਰੀਕਾ ਦੀਆਂ ਸੜਕਾਂ 'ਤੇ ਵੱਡੀ ਗਿਣਤੀ ਵਿੱਚ ਰੋਬੋਕਾਪ ਦੀ ਤੈਨਾਤੀ ਹੋਵੇਗੀ। ਅਸਲ ਵਿੱਚ ਪੁਲਸ ਇਸ ਰੋਬੋਕਾਪ ਦੇ ਰਾਹੀਂ ਹਰ ਇਲਾਕੇ ਦੀਆਂ ਸ਼ੱਕੀ ਗਤੀਵਿਧੀਆਂ 'ਤੇ ਨਜ਼ਰ ਰੱਖੇਗੀ। ਕਿਸੇ ਵੀ ਸੰਵੇਦਨਸ਼ੀਲ ਅਤੇ ਸ਼ੱਕੀ ਹਾਲਾਤ ਪਾਏ ਜਾਣ ਉੱਤੇ ਪੈਟਰੋਲਿੰਗ ਟੀਮ ਬਿਨਾਂ ਸਮਾਂ ਗਵਾਏ ਮੌਕੇ 'ਤੇ ਪਹੁੰਚ ਜਾਏਗੀ। ਇਸ ਦਾ ਆਪਣਾ ਟਵਿੱਟਰ ਅਕਾਊਂਟ 083 ਹੋਵੇਗਾ। ਇਸ ਰੋਬੋਟ ਦੇ ਸੀਨੇ 'ਤੇ ਇੱਕ ਟਚ-ਸਕਰੀਨ ਲਾਇਆ ਗਿਆ ਹੈ। ਇਸ 'ਤੇ ਲੋਕ ਆਪਣੀ ਸ਼ਿਕਾਇਤ ਦਰਜ ਕਰ ਸਕਦੇ ਹੋ। ਰੋਬੋਟ ਨੂੰ ਇਸ ਤਰ੍ਹਾਂ ਤਿਆਰ ਕੀਤਾ ਗਿਆ ਹੈ ਕਿ ਇਹ ਸਮੱਸਿਆ ਦਾ ਮੁਲਾਂਕਣ ਕਰ ਕੇ ਬਣਦੀ ਕਾਰਵਾਈ ਕਰੇਗਾ। ਇਸ ਵਿੱਚ ਲੋਕਾਂ ਨੂੰ ਪਿਛਲੀਆਂ ਸ਼ਿਕਾਇਤਾਂ ਦੀ ਮੌਜੂਦਾ ਸਥਿਤੀ ਦਾ ਵੀ ਵੇਰਵਾ ਮਿਲੇਗਾ।
ਭਾਰਤ ਵਿੱਚ ਵੀ ਰੋਬੋਕਾਪ ਕੰਮ ਕਰ ਰਿਹਾ ਹੈ। ਕੇਰਲ ਪੁਲਸ ਨੇ ਦੇਸ਼ ਦਾ ਪਹਿਲਾ ਰੋਬੋਟ ਕੇ ਪੀ ਬੋਟ ਪੁਲਸ ਹੈੱਡਕੁਆਰਟਰ ਵਿੱਚ ਲੋਕਾਂ ਦੀ ਮਦਦ ਲਈ ਲਾਇਆ ਹੈ। ਇਸ ਦੀ ਵਰਤੋਂ ਹੈੱਡਕੁਆਰਟਰ ਵਿੱਚ ਮਿਲਦੀਆਂ ਸੇਵਾਵਾਂ ਦੀ ਜਾਣਕਾਰੀ ਦੇਣ ਲਈ ਕੀਤੀ ਜਾਂਦੀ ਹੈ। ਇਹ ਇਥੋਂ ਆਉਣ ਵਾਲੇ ਲੋਕਾਂ ਦੀਆਂ ਸ਼ਿਕਾਇਤਾਂ ਦਾ ਰਿਕਾਰਡ ਰੱਖਦਾ ਹੈ, ਜਿਸ ਨੂੰ ਕਦੇ ਵੀ ਦੇਖਿਆ ਜਾ ਸਕਦਾ ਹੈ। ਇਸ ਨੂੰ ਸਬ ਇੰਸਪੈਕਟਰ ਦਾ ਗ੍ਰੇਡ ਦਿੱਤਾ ਗਿਆ ਹੈ।