ਜਿਨੇਵਾ, 20 ਜੂਨ (ਪੋਸਟ ਬਿਊਰੋ)- ਅਮਰੀਕੀ ਪੱਤਰਕਾਰ ਜਮਾਲ ਖਸ਼ੋਗੀ ਦੇ ਕਤਲ ਕੇਸ ਵਿੱਚ ਸਾਊਦੀ ਅਰਬ ਦੇ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਦੇ ਖਿਲਾਫ ਸਬੂਤ ਯੂ ਐੱਨ ਓ ਨੂੰ ਪੱਕੇ ਜਾਪਦੇ ਹਨ।
ਇਹ ਗੱਲ ਯੂ ਐੱਨ ਦੇ ਨਾਲ ਕੰਮ ਕਰਦੇ ਇੱਕ ਮਨੁੱਖੀ ਅਧਿਕਾਰ ਮਾਹਰ ਨੇ ਕਹੀ ਹੈ। ਇੱਕ ਜਾਂਚ ਦੇ ਨਤੀਜੇ ਦੇ ਆਧਾਰ ਉੱਤੇ ਉਨ੍ਹਾਂ ਨੇ ਮੁਹੰਮਦ ਬਿਨ ਸਲਮਾਨ ਦੀਆਂ ਵਿਦੇਸ਼ ਜਾਇਦਾਦਾਂ ਦੀ ਜ਼ਬਤ ਕਰਨ ਦੀ ਮੰਗ ਕੀਤੀ ਹੈ, ਪਰ ਸਾਊਦੀ ਅਰਬ ਨੇ ਇਸ ਜਾਂਚ ਰਿਪੋਰਟ ਨੂੰ ਆਧਾਰਹੀਣ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਹੈ ਕਿ ਇਸ ਕੇਸ ਦੇ ਦੋਸ਼ੀਆਂ 'ਤੇ ਮੁਕੱਦਮਾ ਚਲਾਇਆ ਜਾ ਰਿਹਾ ਹੈ। ਵਰਨਣ ਯੋਗ ਹੈ ਕਿ ਸਾਊਦੀ ਅਰਬ ਦੇ ਮੂਲ ਵਾਲੇ ਅਮਰੀਕੀ ਅਖਬਾਰ ਨਾਲ ਸੰਬੰਧਤ ਪੱਤਰਕਾਰ ਜਮਾਲ ਖਸ਼ੋਗੀ ਦੀ ਅਕਤੂਬਰ 2018 ਵਿੱਚ ਤਰੁਕੀ ਦੇ ਇਸਤਾਂਬੁਲ ਸ਼ਹਿਰ ਵਿੱਚ ਸਾਊਦੀ ਅਰਬ ਦੇ ਵਪਾਰਕ ਕੌਂਸਲੇਟ ਵਿੱਚ ਓਦੋਂ ਹੱਤਿਆ ਹੋਈ ਸੀ, ਜਦੋਂ ਉਹ ਆਪਣੇ ਵੀਜ਼ਾ ਦਸਤਾਵੇਜ਼ ਪੇਸ਼ ਕਰਨ ਲਈ ਗਿਆ ਸੀ। ਸਾਊਦੀ ਅਰਬ ਦੇ ਸਾਬਕਾ ਨਾਗਰਿਕ ਖਸ਼ੋਗੀ ਆਪਣੇ ਦੇਸ਼ ਦੀ ਸ਼ਾਹੀ ਸੱਤਾ ਦੇ ਤੌਰ-ਤਰੀਕਿਆਂ ਦੇ ਆਲੋਚਕ ਸਨ ਤੇ ਤੁਰਕੀ ਵਿੱਚ ਰਹਿ ਕੇ ਅਮਰੀਕੀ ਅਖਬਾਰ ਵਾਸ਼ਿੰਗਟਨ ਪੋਸਟ ਲਈ ਲੇਖ ਲਿਖਦੇ ਸਨ। ਇਸ ਕਾਰਨ ਪ੍ਰਿੰਸ ਮੁਹੰਮਦ ਬਿਨ ਸਲਮਾਨ ਪੱਤਰਕਾਰ ਖਸ਼ੋਗੀ ਨਾਲ ਨਾਰਾਜ਼ ਸਨ। ਅੰਤਰਰਾਸ਼ਟਰੀ ਦਬਾਅ ਵਿੱਚ ਸਾਊਦੀ ਅਰਬ ਨੇ ਕੇਸ ਦੀ ਜਾਂਚ ਕਰਵਾਈ, ਪਰ ਪ੍ਰਿੰਸ ਨੂੰ ਸ਼ੱਕ ਤੋਂ ਬਰੀ ਕਰ ਦਿੱਤਾ ਸੀ। ਸਾਊਦੀ ਅਰਬ ਦੀ ਜਾਂਚ ਵਿੱਚ 11 ਉੱਚ ਅਧਿਕਾਰੀਆਂ 'ਤੇ ਹੱਤਿਆ ਅਤੇ ਸਾਜ਼ਿਸ਼ ਰਚਣ ਦਾ ਮੁਕੱਦਮਾ ਦਰਜ ਕਰ ਕੇ ਬੰਦ ਕਮਰੇ ਵਿੱਚ ਸੁਣਵਾਈ ਚੱਲ ਰਹੀ ਹੈ। ਯੂ ਐੱਨ ਓ ਦੀ ਦੂਤ ਏਗਨੇਸ ਕਾਲਾਮਾਰਡ ਦੇ ਅਨੁਸਾਰ ਜੋ ਸਬੂਤ ਮਿਲੇ ਹਨ, ਉਨ੍ਹਾਂ ਤੋਂ ਸੰਕੇਤ ਮਿਲਦਹਾ ਹੈ ਕਿ ਖਸ਼ੋਗੀ ਹੱਤਿਆ ਕਾਂਡ ਵਿੱਚ ਪ੍ਰਿੰਸ ਦੀ ਸਿੱਧੀ ਭੂਮਿਕਾ ਸੀ, ਅਰਥਾਤ ਵਾਰਦਾਤ ਪ੍ਰਿੰਸ ਦੇ ਨਿਰਦੇਸ਼ 'ਤੇ ਕੀਤੀ ਗਈ ਸੀ।
ਵਰਨਣ ਯੋਗ ਹੈ ਕਿ ਕਾਲਾਮਾਰਡ ਆਜ਼ਾਦਾਨਾ ਤੌਰ 'ਤੇ ਕੰਮ ਕਰਨ ਵਾਲੀ ਮਨੁੱਖੀ ਅਧਿਕਾਰ ਮਾਹਰ ਹਨ। ਉਨ੍ਹਾਂ ਨੂੰ ਯੂ ਐੱਨ ਓ ਵੱਲੋਂ ਬੋਲਣ ਦਾ ਅਧਿਕਾਰ ਨਹੀਂ ਹੈ।